Yaxayas 19
19
Vajtswv Yuav Rautxim Rau Tebchaws Iziv
1No yog cov lus uas hais txog lub tebchaws Iziv.
Saib maj, tus TSWV caij rawv ib tauv huab ceev heev nqis los rau hauv lub tebchaws Iziv. Cov neeg Iziv tej mlom ntshai tsheehnyo ntawm Nws xubntiag, thiab cov neeg Iziv tej siab-ntsws yaj tas. 2Tus TSWV hais tias, “Kuv yuav tshoov cov Iziv siab kom kwvtij tawmtsam kwvtij, zejzog tawmtsam zejzog, ib lub nroog tawmtsam ib lub nroog, thiab ib lub tebchaws tawmtsam ib lub tebchaws. 3Kuv yuav ua rau cov Iziv poobsiab loj heev, ua rau lawv tsis paub yuav ua dabtsi tagnrho. Lawv yuav mus thov lawv tej mlom pab lawv, mus saib yaig thiab mus thov cov neeg uas tuag lawm tej ntsujplig pub tswvyim rau lawv. 4Kuv yuav muab cov Iziv cob rau ib tug nom uas limhiam txhais tes, thiab cia tus vajntxwv uas nrujtsiv tshajplaws kav lawv. Kuv, uas yog tus TSWV muaj Hwjchim Loj Kawg Nkaus, yog tus hais li ntawd.”
5Tus Dej Nais yuav nqhuab thiab yuav qhuav mus. 6Tej kwjdeg yuav tsw phem heev thaum cov dej hauv tebchaws Iziv pib qhuav. Tej lojkov thiab kavtheej los yuav qhuav, 7thiab tej qoobloo uas cog ntawm ob sab ntug Dej Nais yuav qhuav thiab cua yuav muab ntsawj ya tas. 8Cov neeg nrhiav ntses hauv tus Dej Nais yuav tusiab thiab quaj; lawv yuav tsis tau siv lawv tej nuv thiab tej vas ntxiv lawm. 9Cov neeg uas tshuab ntuas los yuav tusiab heev, thiab cov neeg ntos ntaub los yuav tas kev ciasiab. 10Cov neeg ntos ntaub thiab muaj txujtes zoo hauv lub tebchaws yuav nyuajsiab, thiab cov neeg uas mus nrhiav zog yuav tusiab heev.
11Cov thawjcoj hauv lub nroog Xau-as ruam heev! Iziv cov neeg uas txawj tuavxam tshajplaws los kuj qhia tej tswvyim uas ruam kawg li thiab! Lawv yuav ua licas hais tau rau vajntxwv tias lawv yog tubtxawg tubntse thiab yog cov vajntxwv thaum ub li cajces? 12Falaus, koj cov tuavxam uas txawjntse nyob qhovtwg? Cia lawv qhia rau koj seb tus TSWV uas muaj Hwjchim Loj Kawg Nkaus tej homphiaj rau tebchaws Iziv yog dabtsi. 13Cov thawjcoj hauv lub nroog Xau-as thiab lub nroog Meefis puavleej yog neeg ruam. Lawv twb yog cov ncej zeb uas txheem haivneeg ntag, tiamsis lawv tseem coj cov Iziv mus yuamkev tas. 14Tus TSWV ua kom lawv tawm tswvyim yuamkev tas. Thaum kawg, cov Iziv thiaj ua txhua yam yuamkev thiab ntog pujpoog ib yam li tus neeg qaugcawv uas nws rov tsuj nws cov ntuav ua rau nplua ntog. 15Tsis muaj leejtwg hauv lub tebchaws Iziv, tsis hais tus npluanuj lossis tus pluag, tus tseemceeb lossis tus tsis tseemceeb, yuav muaj peevxwm pab tau li.
Cov Iziv Yuav Pehawm Vajtswv
16Hnub ntawd cov neeg Iziv yuav muaj lub siab muag ib yam li tej pojniam. Lawv yuav ntshai tsheehnyo, thaum lawv pom tus TSWV uas muaj Hwjchim Loj Kawg Nkaus tsa Nws txhais tes rautxim rau lawv. 17Cov Yudais yuav ua rau cov Iziv ntshai heev; txhua tus Iziv uas hnov txog cov Yudais lub npe, lawv ntshai heev, vim qhov tus TSWV uas muaj Hwjchim Loj Kawg Nkaus npaj yuav ua rau lawv.
18Thaum ntawd tsuas tshuav tsib lub nroog hauv tebchaws Iziv thiaj haislus Henplais lawm xwb. Cov neeg uas nyob hauv yuav tuav tus TSWV uas muaj Hwjchim Loj Kawg Nkaus lub npe coglus tias lawv yuav ua rawsli Nws tej lus. Cov nroog ntawd muaj ib lub yuav muab hu ua “Lub Nroog Hnub.”
19Hnub ntawd yuav muaj ib lub thaj rau tus TSWV nyob hauv tebchaws Iziv, thiab muaj ib tug ncej zeb muab fij rau Nws nyob ntawm Iziv tus ciamteb. 20Ob yam ntawd yuav ua cim thiab ua timkhawv txog tus TSWV uas muaj Hwjchim Loj Kawg Nkaus uas nyob hauv tebchaws Iziv. Thaum cov neeg ntawd raug caijtsuj, lawv yuav quaj hu thov tus TSWV pab lawv, Nws yuav txib ib tug cawmseej los tivthaiv thiab cawm lawv. 21Tus TSWV yuav qhia Nws tuskheej rau cov neeg Iziv paub. Thaum ntawd lawv yuav lees paub thiab pehawm Nws, thiab yuav coj tej tsiajtxhu tuaj fij rau Nws. Lawv yuav coglus rau Nws thiab ua rawsli tej lus uas lawv cogtseg. 22Tus TSWV yuav muab cov Iziv nplawm, tiamsis Nws yuav rov kho kom lawv zoo. Lawv yuav tig los cuag Nws thiab Nws yuav mloog lawv tej lus thov, thiab kho lawv.
23Hnub ntawd yuav muaj ib txoj niamkev loj nram tebchaws Iziv mus txog rau pem tebchaws Axilias. Cov Axilias yuav mus nram tebchaws Iziv thiab cov Iziv yuav tuaj pem tebchaws Axilias. Ob haivneeg no yuav pehawm Vajtswv uake. 24Hnub ntawd cov Yixalayees yuav muaj vajhuam sibluag ib yam li cov Iziv thiab cov Axilias, mas peb haivneeg no yuav ua koobhmoov rau lub ntiajteb. 25Tus TSWV uas muaj Hwjchim Loj Kawg Nkaus yuav foom koobhmoov rau lawv hais tias, “Kuv foom koobhmoov rau cov Iziv, uas yog Kuv haivneeg; cov Axilias, uas yog Kuv ua tus tsim, thiab cov Yixalayees, uas yog cov Kuv tau xaiv tseg.” #Yelemi 46:2-26; Exek 29:1—32:32
Currently Selected:
Yaxayas 19: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
