Yaxayas 17

Vajtswv Yuav Rautxim Rau Cov Xilias Thiab Cov Yixalayees

1Tus TSWV hais tias, “Damaxakas yuav tsis tau ua ib lub nroog ntxiv lawm; nws yuav puastsuaj tag ua ib pawg cia lawm xwb. 2Cov Xilias tej nroog yuav ciaj quavpoj mus ibtxhis li.#17:2: Ib phau ntawv qub-qub thaum ub sau hais tias Cov Xilias tej nroog … ibtxhis li; phau lus Henplais hais tias Cov Alu-aws tej nroog yuav ciaj quavpoj tas. Tej nroog ntawd yuav ua tshav zaub rau yaj thiab nyuj noj, thiab tsis muaj leejtwg yuav raws tau tej tsiaj ntawd tawm khiav. 3Cov Yixalayees tej chaw fajxwm yuav pob puas tas, thiab lub nroog Damaxakas yuav poob hwjchim. Cov Xilias uas seem, los yuav poob ntsejmuag ib yam li cov Yixalayees. Kuv, uas yog tus TSWV muaj Hwjchim Loj Kawg Nkaus, yog tus hais li ntawd.” #Yelemi 49:23-27; Amaus 1:3-5; Xekhali 9:1

4Tus TSWV hais tias, “Hnub ntawd cov Yixalayees tus tshwjchim yuav xaus mus, thiab txoj kev pluag yuav los hloov lawv kev npluanuj. 5Cov Yixalayees lub tebchaws yuav zoo li thaj teb uas twb hlais nplej thiab sau qoob tag, zoo li daim teb hauv lub Hav Lefayees thaum uas neeg muab tej qoobloo sau tag lawm. 6Cov Yixalayees qeeleej thiaj yuav dim xwb, lawv yuav zoo yam li tsob txiv ntoo-roj uas luag muab tej txiv de tag, tshuav ob-peb lub txiv nyob saum ntsis, lossis seem lub puav nyob rau hauv tej ceg uas qis xwb. Kuv yog tus TSWV uas yog cov Yixalayees tus Vajtswv, yog tus hais li ntawd.”

7Hnub ntawd tej neeg yuav tig los nrhiav kev pab ntawm tus uas tsim lawv, uas yog cov Yixalayees tus Vajtswv uas dawbhuv. 8Lawv yuav tsis quavntsej txog tej thaj uas lawv txua tau ntawm lawv txhais tes, lossis tsis tsosiab rau tej uas lawv txhais tes txua hlo li—tej mlom pojniam Aselas thiab tej thaj hlawv hmoov tshuaj tswqab.

9Hnub ntawd tej nroog uas muaj ntsayeej thaiv zoo-zoo lawm yuav ciaj quavpoj thiab puastsuaj ib yam li cov Hivis thiab cov Amaules#17:9: Ib phau ntawv qub-qub thaum ub sau hais tias cov Hivis thiab cov Amaules; phau lus Henplais hais tias havzoov thiab roob mojsab. khiav cov Yixalayees thiab muab lawv tej nroog tsotseg ntag.

10Cov Yixalayees, nej ciali tsis nco tus Vajtswv uas cawm nej thiab tivthaiv nej yam li ib phab zeb lawm. Nej mus cog tej ntoo zoo heev rau hauv tej vaj#17:10: tej vaj: Saib 1:29. kom tau chaw pehawm cov neeg txawv tebchaws tej nyuag vajtswv. 11Tiamsis txawm yog tias tej noob ntawd tuaj mosnyoos thiab tawgpaj kiag tagkis sawvntxov uas nej cog ntawd los, nej yuav tsis tau sau li. Hnub ntawd tsuas muaj kev txomnyem thiab kev mob uas tsis muaj leejtwg kho tau li xwb.

Tej Haivneeg Uas Ua Yeebncuab Swb Lawm

12Muaj suab nrov ntsoogqees ntawm ntau haivneeg tuaj, cuag li dej hiavtxwv ntas, thiab cuag li tej nthwv dej loj-loj ntsawj. 13Txawm yog ntau haivneeg sawv los ua suab nrov ntsoogqees cuag li dej ntas los, thaum Vajtswv cem lawv ces lawv txawm khiav mus deb kawg li. Lawv yuav khiav ib yam li cua ntsawj tej hmoov av saum roob, thiab ib yam li khaubzeeg cua ntsawj tej quavnyab ya ri niab. 14Thaum tsausntuj lawv mus tsim kev kubntxhov, tiamsis thaum kajntug tsis muaj lawv lawm. Tej ntawd yog tej uas tshwm rau txhua tus uas tuaj huab peb lub tebchaws.

Currently Selected:

Yaxayas 17: MWW2022

Highlight

Copy

Compare