Yaxayas 16
16
Cov Mau-am Tas Kev Ciasiab
1Cov neeg Mau-am tau xa ib cov menyuam yaj hauv lub nroog Xelas uas nyob hauv tiaj suabpuam, mus rau saum lub roob Xi-oos, ua khoomplig rau tus nom kav lub tebchaws uas nyob hauv lub nroog Yeluxalees. 2Mau-am cov ntxhais mus sawv ntawm ntug Dej Anoos thiab mus-mus los-los tos hla dej, zoo li tej menyuam noog uas muab tshem tawm ntawm lub zes.
3Lawv hais rau cov Yudais tias, “Qhia peb seb yuav ua licas. Thov nej tivthaiv peb yam li tus ntoo uas ua duab ntxoovntxoo txias zias thaum tavsu, thiab cia peb so hauv nej tus duab ntxoovntxoo. Peb yog neeg tawg rog; thov muab peb zais kom tsis txhob muaj leejtwg nrhiav tau hlo li. 4Thov cia peb nyob hauv nej lub tebchaws. Thov tivthaiv peb ntawm cov neeg uas nrhiav peb tua.”
(Cov neeg limhiam thiab kev puastsuaj twb yuav xaus mus, thiab cov neeg uas tsim kev kubntxhov rau lub tebchaws kom puastsuaj twb yuav ploj mus. 5Ces Daviv ib tug xeebntxwv ua vajntxwv, nws yuav tswjhwm tsoom pejxeem ntawm txoj kev ncajncees thiab kev hlub. Nws yuav majnroos ua qhov yog thiab ua kom txoj kev ncajncees ntawd tiav.)
6Cov Yudais teb tias, “Peb twb hnov txog cov neeg Mau-am txoj kev khavtheeb lawm. Peb paub tias lawv yog neeg khavtheeb thiab muajplhus, tiamsis lawv tej lus khavtheeb ntawd tsis muaj qabhau dabtsi li.”
7Cov neeg Mau-am yuav quaj vim tej kev txomnyem uas lawv raug. Lawv txhua tus yuav quaj thaum lawv nco txog tej zaub-mov qab uas lawv txeev noj hauv lub nroog Khaw Halexes los lawm. Lawv yuav raug txoj kev txomnyem. 8Tej teb uas nyob ze lub nroog Hesenpoos thiab cov Ximas tej vaj txivhmab raug puastsuaj tag. Cov txivhmab ntawd yog cov uas luag de los ua cawv rau ntau haivneeg tej nomtswv haus. Muaj ib zaug cov txivhmab ntawd hlav mus deb heev, mus txog ntua ntawm lub nroog Yaxaws, thiab sab hnubtuaj yog hlav mus txog ntua tiaj suabpuam, thiab sab hnubpoob yog hlav mus txog dua ntawm Hiavtxwv Tuag sab tim ub.
9Yogli ntawd, kuv thiaj quaj li cov neeg Yaxaws quaj, rau cov Ximas cov txivhmab. Kuv tej kuamuag poob rau lub nroog Hesenpoos thiab Ele-ales, vim tsis muaj qoobloo rau lawv sau, thiaj ua rau lawv tsis muaj kev zoosiab. 10Nimno tsis muaj leejtwg zoosiab rau tej teb uas zoo qoobloo. Tsis muaj leejtwg qw lossis hunkauj hauv tej vaj txivhmab. Tsis muaj leejtwg tsuam tej txivhmab ua cawv; tej suab qw zoosiab tau ntsiag tag li lawm.#16:10: Ib phau ntawv qub-qub thaum ub saum hais tias tej suab qw zoosiab tau ntsiag tag li lawm; phau lus Henplais hais tias Kuv ua rau tej suab qw zoosiab ntawd ntsiag tag lawm. 11Kuv seev nrog txoj kev tusiab rau lub tebchaws Mau-am, seev nrog txoj kev mobsiab mobntsws rau lub nroog Khaw Halexes. 12Cov Mau-am nce vau zujzis mus rau saum lub roob teev dab thiab mus thov lawv tej dab pab lawv, tiamsis tej dab ntawd pab tsis tau lawv li.
13Ntawd yog tus TSWV cov lus uas twb hais txog cov Mau-am ntxov los lawm. 14Tiamsis nimno tus TSWV hais tias, “Tshuav peb xyoos lawm xwb, cov Mau-am lub meejmom yuav poob mus. Ntawm lawv tej pejxeem uas coob heev ntawd, tsuas tshuav qeeleej thiaj seem nyob lawm xwb, tiamsis lawv yuav qaugzog heev.”
Currently Selected:
Yaxayas 16: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
