Yaxayas 15
15
Vajtswv Yuav Ua Kom Tebchaws Mau-am Puastsuaj
1No yog cov lus uas hais txog lub tebchaws Mau-am.
Ib hmos xwb lub nroog As thiab lub nroog Khaw raug kev puastsuaj tag, ua rau lub tebchaws Mau-am nyob ntsiagto. #Yaxaya 25:10-12; Yelemi 48:1-47; Exek 25:8-11; Amaus 2:1-3; Xefani 2:8-11 2Cov neeg hauv lub nroog Dinpoos#15:2: Nqe no sau hais tias Cov neeg hauv lub nroog Dinpoos; phau lus Henplais hais tias Cov neeg thiab cov Dinpoos. nce mus quaj ntawm lawv tej tsev teev dab saum tej ncov roob. Cov Mau-am quaj tusiab rau lub nroog Nenpaus thiab Medenpas; muab lawv tej plaubhau thiab tej hwjtxwv chais vim txoj kev quajntsuag. 3Tej neeg puavleej npua ntaub tsaj mus nyob tom tej kev, nyob hauv tej plawv nroog, thiab saum tej rutsev tsa suab quaj. 4Cov neeg hauv lub nroog Hesenpoos thiab Ele-ales tsa suab hlo quaj; lawv tej suab quaj nrov mus txog puag tim Yahaj. Txawm yog tej tubrog los ntshai tsheehnyo, thiab lawv zog ntaug tag huv tibsi.
5Kuv lub siab quaj dhi rau lub tebchaws Mau-am! Cov neeg tau khiav mus rau lub nroog Xau-as, thiab mus rau lub nroog Enkelas Selisiyas. Muaj ibtxhia quaj taug kev nce mus rau lub moos Luhij; muaj ibtxhia taug kev khiav mus rau lub moos Haulaunayees, lawv quaj nrov heev rau lawv tej kev piamsij ntawd. 6Tus Dej Neelees nqhuab lawm, tej nyom uas tuaj ntawm ob sab ntug dej tuag tag, yeej tsis tshuav ib yam nrojtsuag dabtsi tseem ntsuab nyob qhovtwg li. 7Cov neeg nrhiav kev coj lawv tej khoom uas seem khiav mus hla lub Hav Ntoo Lwgzaj. 8Tej suab quaj nrov ncig thoobplaws tebchaws Mau-am. Nyob hauv lub moos Enkela-ees thiab Npe-elelees los yeej hnov tej suab quaj huv tibsi. 9Tus dej hauv lub moos Dinpoos yeej yog ntws ntshav liabploog xwb, tiamsis Vajtswv tseem npaj tej yam uas phem tshaj ntawd cia rau cov neeg uas nyob hauv lub moos ntawd thiab. Cov neeg Mau-am uas khiav tawm thiab cov uas seem nyob hauv lub tebchaws, los puavleej raug tsov ntxhuav tom tuag tas.
Currently Selected:
Yaxayas 15: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
