Yaxayas 14

Cov Neeg Raug Ntes Mus Rovqab Los

1Tus TSWV yuav tabncuab Nws haivneeg Yixalayees dua thiab rov xaiv lawv ua Nws tug. Nws yuav cia lawv rov los nyob hauv lawv lub tebchaws, thiab tej neeg txawv tebchaws yuav los nrog lawv nyob. 2Ntau haivneeg yuav pab coj cov Yixalayees rovqab los rau hauv lawv lub tebchaws uas tus TSWV tau muab pub rau lawv lawm, thiab cov neeg ntawd yuav ua cov Yixalayees qhev nyob hauv lub tebchaws. Cov neeg uas thaum ub ntes cov Yixalayees, nimno cov Yixalayees yuav ntes lawv, thiab cov Yixalayees yuav tswjhwm cov neeg uas thaum ub caijtsuj lawv.

Cov Npanpiloos Tus Vajntxwv Nyob Hauv Tubtuag Teb

3Tus TSWV yuav tso cov Yixalayees dim ntawm lawv tej kev lwjsiab, kev txomnyem, thiab kev raug luag yuam ua haujlwm hnyav. 4Thaum tus TSWV ua tej no, lawv yuav thuam tus vajntxwv uas kav lub nroog Npanpiloos hais tias:

“Tus vajntxwv uas limhiam ntog lawm lau! Nws yuav tsimtxom tsis tau leejtwg ntxiv lawm! 5Tus TSWV twb muab cov neeg nrujtsiv tus qws thiab tus cwj lov povtseg lawm, 6vim lawv siv lawv txoj kev npautaws los caijtsuj tej neeg thiab tsis tseg txoj kev tsimtxom tej haivneeg uas lawv mus tua yeej li. 7Zaumno lub ntiajteb tau so lossiav thiab nyob kajsiab lug, thiab txhua tus hunkauj zoosiab. 8Tej ntoo thuv thiab ntoo ciab uas nyob hauv Lenpanoos zoosiab tias tus vajntxwv ntawd ntog lawm, mas yuav tsis muaj leejtwg tuaj muab lawv ntov lawm!

9“Tubtuag teb twb npaj qhib qhovrooj tos tus vajntxwv uas kav lub nroog Npanpiloos lawm. Cov nomtswv thiab cov vajntxwv thaum ub uas kav lub ntiajteb no tej plig sawv zomzaws ntawm lawv tej zwmtxwv tuaj tos nws. 10Lawv yuav hais rau nws tias, ‘Nimno koj los tsaugmuag thiab zoo ib yam li peb lawm xwb! 11Koj tus hwjchim, meejmom, thiab tej suab nkauj nogncas tau poob nrog koj los nyob rau hauv tubtuag teb lawm; kas yog koj daim ntaub pua chaw thiab cab yog koj daim pam vov.’ ”

12Tus vajntxwv uas kav Npanpiloos, koj yog lub hnubqub uas ci thaum yuav kajntug, koj tau poob saum ntuj los lawm! Yav tas los koj kovyeej ntau haivneeg, tiamsis nimno koj twb raug muab pov rau hauv av lawm. #Tshwm 8:10; 9:1 13Koj tau xav hauv siab tias koj yuav nce mus saum ntuj thiab coj koj lub zwmtxwv mus teeb rau saum Vajtswv tej hnubqub uas siab tshajplaws. Koj xav tias koj yuav mus nyob li tus vajntxwv rau saum lub roob ntawd sab qaumteb, qhov chaw uas tej nyuag vajtswv tuaj sibsau uake. 14Koj tau hais tias koj yuav nce mus rau txheej siab saum cov huab thiab zoo ib yam li Vajtswv tus uas muaj Hwjchim Loj Kawg Nkaus. 15Tiamsis koj tau raug muab coj mus pov rau hauv tubtuag teb lub qhov uas tob tshajplaws. #Math 11:23; Lukas 10:15

16Cov neeg tuag uas pom koj tuaj, yuav tsa qhovmuag saib koj. Lawv yuav nug hais tias, “Tus no puas yog tus txivneej uas co lub ntiajteb thiab txhua lub tebchaws uazog koog? 17Tus no puas yog tus txivneej uas ua rau ntau lub nroog raug puastsuaj thiab muab lub ntiajteb ntxeev ua suabpuam tag lawm? Tus no puas yog tus txivneej uas tsis tso nws cov neeg raug txim mus tsev li?”

18Tagnrho tej vajntxwv ntawm txhua haivneeg, nyias pw nrog nyias lub meejmom hauv nyias lub qhovntxa, 19tiamsis koj tsis muaj qhovntxa, thiab koj lub cev raug muab povtseg rau sabnraud ua lwj tsus cia. Tej tubrog uas tuag rau hauv tshavrog tej cev tsuam koj lub cev sibxyaw rau hauv lub qhov pobzeb thiab muab txhub rau. 20Vim koj tau muab koj lub tebchaws ua puastsuaj tag thiab koj tau tua koj haivneeg, koj yuav tsis raug muab faus zoo li lwmtus vajntxwv. Yuav tsis muaj leejtwg hais txog koj tsev neeg phem no ib zaug li lawm. 21Ciali npaj chaw thiab coj nws cov tub mus tua, vim tej kev txhaum uas lawv cov yawgkoob tau ua los lawm. Lawv yuav tsis muaj ib tug tau kav lub ntiajteb no lossis tsim lawv tej nroog kom puv ntiajteb hlo li.

Vajtswv Yuav Ua Kom Lub Nroog Puastsuaj

22Tus TSWV uas muaj Hwjchim Loj Kawg Nkaus hais tias, “Kuv yuav ua rau lub nroog Npanpiloos kom puastsuaj tag. Kuv yuav tsis tseg ib yam dabtsi hlo li, menyuam yaus los tsis tseg, tsis pub kom muaj ib tug seem hlo li. Kuv yog tus TSWV uas hais li ntawd. 23Kuv yuav muab lub nroog Npanpiloos ntxeev ua hav iav, thiab ua chaw rau plas nyob. Kuv yuav muab rab khaub-rhuab uas yog kev puastsuaj cheb lub nroog Npanpiloos thiab txhua yam mus povtseg. Kuv, uas yog tus TSWV muaj Hwjchim Loj Kawg Nkaus, yog tus hais li ntawd.”

Vajtswv Yuav Ua Kom Cov Axilias Puastsuaj

24Tus TSWV uas muaj Hwjchim Loj Kawg Nkaus coglus hais tias, “Kuv tau npaj tseg licas lawm, Kuv yuav ua li ntawd. Kuv tau txiavtxim siab licas lawm, Kuv yuav ua kom tiav li ntawd. 25Kuv yuav muab cov Axilias ua kom puastsuaj tag rau hauv Kuv lub tebchaws Yixalayees, thiab muab lawv tsuj rau saum Kuv tej hauv roob. Kuv yuav tso kom Kuv haivneeg dim ntawm cov Axilias tus quab thiab kom dim ntawm tej kev nyuajsiab uas lawv raug. 26No yog Kuv lub homphiaj rau lub ntiajteb, thiab Kuv xyab Kuv txhais tes mus rautxim rau ntau haivneeg.” 27Tus TSWV uas muaj Hwjchim Loj Kawg Nkaus tau txiavtxim siab ua li ntawd lawm; Nws twb xyab Nws txhais tes mus rautxim lawm, leejtwg thiaj yuav cheem tau Nws? #Yaxaya 10:4-24; Nehemi 1:1—3:19; Xefani 2:13-15

Vajtswv Yuav Ua Kom Cov Filixatees Puastsuaj

28Xyoo uas Vajntxwv Ahaj tuag, tus TSWV tau muab cov lus no rau kuv. #2Vaj 16:20; 2Xwm 28:27

29Cov neeg Filixatees, tus nplawm uas nplawm nej lov lawm, tiamsis nej tsis txhob rawm zoosiab. Thaum ib tug nab tuag lawm, yuav muaj dua lwmtus uas tseem nyaum tshaj los hloov tus ntawd chaw. Lub qe nab daug tau ib tug zaj uas ya tau. 30Tus TSWV yuav ua tus tswv yug yaj rau cov neeg txomnyem uas yog Nws haivneeg thiab yuav cia lawv nyob kajsiab lug. Tiamsis Nws yuav tso kev tshaib nqhis los rau nej cov Filixatees, mas yuav tsis pub kom nej ib tug muaj sia nyob li.

31Cov Filixatees tej nroog thiab tej roojloog, ciali quaj qw! Nej ciali ntshai! Yuav muaj pa ncho auv niab tuaj pem sab qaumteb tuaj, uas yog ib cov tubrog siab tawv tsis ntshai tuag hlo li. #Yelemi 47:1-7; Exek 25:15-17; Yau 3:4-8; Amaus 1:6-8; Xefani 2:4-7; Xekhali 9:5-7

32Peb yuav teb cov Filixatees tsab xov uas lawv hais tuaj rau peb licas? Peb yuav teb rau lawv tias Vajtswv yog tus tsimtsa Xi-oos, mas Nws haivneeg uas raug kev txomnyem yuav nyob kajsiab lug rau qhov chaw ntawd.

Currently Selected:

Yaxayas 14: MWW2022

Highlight

Copy

Compare