Yaxayas 13
13
Vajtswv Yuav Rautxim Rau Npanpiloos
1Zaj no yog hais txog Npanpiloos. Yog zaj uas Amoj tus tub Yaxayas tau txais los ntawm Vajtswv. #Yaxaya 47:1-15; Yelemi 50:1—51:64
2Tsa ib tug chij ntaus rog rau saum ib lub ncov roob do-do! Qw nrov-nrov rau cov tubrog thiab co tes rau lawv kom ciali mus txeem cov nomtswv tej roojloog. 3Tus TSWV tau hu Nws cov tubrog uas muaj cuabkav thiab siab tawv tuaj tua npluav rog dawbhuv thiab rautxim rau cov neeg uas Nws chim rau.
4Mloog cov suab nrov saum tej roob—lub suab ntawm ib pab neeg coob-coob, lub suab ntawm ntau haivneeg thiab ntau lub tebchaws tuaj sibsau uake. Tus TSWV uas yog tus Thawj Tubrog, tabtom txhij Nws cov tubrog mus ntaus rog. 5Lawv tuaj hauv tej tebchaws uas nyob deb tim qabntug kawg tuaj. Vim tus TSWV txoj kev chim, Nws thiaj yuav ua kom tej tebchaws ntawd puastsuaj tagnrho.
6Nej ciali quaj vim txoj kev ntshai! Hnub uas tus TSWV yuav txiavtxim twb los ze heev lawm, hnub ntawd yog hnub uas tus muaj Hwjchim Loj Kawg Nkaus yuav coj kev puastsuaj los rau nej. #Yau 1:15 7Txhua tus neeg txhais npab yuav tsaugleeg, thiab txhua tus lub siab yuav yaj tas. 8Lawv yuav ntshai heev thiab ibce mob cuag li tus pojniam mob plab yug menyuam. Lawv ib leeg saib ib leeg hle muag hlo thiab ua ntsejmuag thimxem tas. 9Hnub uas tus TSWV yuav txiavtxim twb los yuav txog, hnub ntawd yog hnub uas Nws yuav qhia Nws txoj kev npautaws thiab kev chim. Lub ntiajteb yuav ua suabpuam tas, thiab txhua tus neeg txhaum yuav raug puastsuaj. 10Txhua lub hnubqub thiab tej ntsauv hnubqub saum nruabntug yuav tsis ci, lub hnub yuav tsaus, thiab lub hli yuav tsis pomkev. #Khiav 32:7; Math 24:29; Malak 13:24-25; Lukas 21:25; Tshwm 6:12-13; 8:12
11Tus TSWV hais tias, “Kuv yuav tso kev puastsuaj los rau lub ntiajteb, thiab rautxim rau txhua tus neeg phem vim tej kev txhaum uas lawv ua. Kuv yuav txo cov neeg khavtheeb lub hwjchim thiab rautxim rau cov neeg khavtxiv thiab uanruj uatsiv. 12Nrhiav cov neeg uas tseem muaj sia, tseem nrhiav nyuaj tshaj li nrhiav tej tseem kub, nyuaj tshaj tej kub Aufaw thiab. 13Hnub ntawd, Kuv, uas yog tus TSWV muaj Hwjchim Loj Kawg Nkaus, yuav qhia Kuv txoj kev chim, Kuv yuav ua kom lub ntuj uazog koog, lub ntiajteb yuav co thiab txav tawm ntawm nws qhov chaw mus.
14“Cov neeg txawv tebchaws uas nyob hauv lub nroog Npanpiloos yuav khiav rovqab mus rau lawv lub tebchaws, ib yam li tej kauv uas neeg mus raws tua, thiab zoo ib yam li pab yaj uas tsis muaj tus tswv saib. 15Tus uas luag ntes tau yuav raug muab ntaj chob kom tshab kom tuag. 16Thaum lawv ntshaw kom muaj kev pab ntawd, lawv tej menyuam mos yuav raug luag nplawm kom tuag tabmeeg lawv, lawv tej tsev yuav raug luag txeeb, thiab lawv tej pojniam yuav raug luag coj mus yuam.”
17Tus TSWV hais tias, “Kuv tabtom tshoov cov Medes#13:17: Medes: Yog ib haivneeg uas nyob ntawm Npanpiloos sab hnubtuaj, yog ib co uas cov Pawxias kav. siab kom mus tua lub nroog Npanpiloos. Nyiaj los lawv tsis quavntsej thiab kub los lawv yeej tsis ntshaw li. 18Lawv yuav muab hneevnti thiab xubvos tua cov tub hluas. Lawv yuav tsis tabncuab cov menyuam mos thiab tsis hlub tshua cov menyuam yaus li. 19Lub nroog Npanpiloos yog lub nroog uas zoonkauj tshajplaws; yog lub nroog uas lawv cov neeg khav ntxhias txog. Tiamsis Kuv uas yog tus TSWV, yuav ua rau lub nroog Npanpiloos puastsuaj mus ib yam li Kuv tau ua rau lub nroog Xaudoos thiab Kaumaulas lawm! #Chiv 19:24 20Yuav tsis muaj neeg mus nyob rau hauv ib zaug ntxiv lawm. Cov neeg Alav uas tsis muaj chaw nyob los yuav tsis mus teeb lawv tej tsevntaub rau hauv, thiab tej tub yug yaj los yuav tsis cab lawv tej yaj mus noj zaub rau hauv ib zaug ntxiv lawm thiab. 21Lub nroog ntawd yuav ua qhov chaw rau tej tsiaj tom tiaj suabpuam los nyob thiab ua chaw rau plas los ua zes. Noog ntxhuav yuav los nyob rau ntawd, thiab sai yuav los dhia txoompwm rau tej chaw uas puastsuaj tag ntawd. #Yaxaya 34:14; Xefani 2:14; Tshwm 18:2 22Tej chaw fajxwm thiab tej loog yuav ua chaw rau hma liab thiab hma ntsuab nqov ntuj. Npanpiloos lub sijhawm twb los yuav txog! Nws lub caij twb yuavluag dhau mus.”
Currently Selected:
Yaxayas 13: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
