Yaxayas 11
11
Lub Tebchaws Nyob Thajyeeb
1Daviv cajces zoo ib yam li tsob ntoo uas twb muab ntov lawm; tiamsis lub hauvpaus rov hlav dua ib tug ntsuag tshiab, yogli ntawd, yuav muaj ib tug vajntxwv tshiab sawv hauv Daviv cajces los. #Tshwm 5:5; 22:16
2Vajtswv tus Ntsujplig yuav pub kom Nws muaj tswvyim,
muaj kev txawjntse thiab kev totaub.
Nws yuav paub tus TSWV lub siab nyiam thiab hwm tus TSWV,
3thiab txaussiab hlo mloog tus TSWV lus.
Nws yuav tsis txiavtxim rawsli Nws lub qhovmuag pom lossis Nws lub pobntseg hnov;
4Nws yuav txiavtxim ncajncees rau cov neeg pluag,
thiab tivthaiv cov neeg uas tsis muaj leejtwg pab txojcai.
Ntiajteb yuav raug nplawm los ntawm Nws lolus xaaj,
thiab tej neeg siabphem yuav tuag los ntawm tej pa uas tawm hauv Nws lub ncauj los. #2Thex 2:8
5Kev ncajncees yog Nws txoj hlab sia, thiab kev ua siabncaj yog pluaj ntaub pav Nws duav. #Efex 6:14
6Hma thiab yaj yuav nyob tau uake,
tsov pomtxwv yuav pw nrog menyuam tshis.
Menyuam nyuj thiab menyuam tsov ntxhuav yuav noj zaub#11:6: Tej cov ntawv qub-qub thaum ub sau hais tias yuav noj zaub; phau lus Henplais sau hais tias thiab tej menyuam tsiaj uas rog-rog. uake,
thiab tej menyuam yaus yuav ua cov coj tej tsiaj ntawd kev. #Yaxaya 65:25
7Nyuj thiab dais yuav noj zaub uake,
lawv tej menyuam yuav pw uake.
Tsov ntxhuav yuav noj quavnyab ib yam li nyuj noj.
8Txawm yog tus menyuam yaus uas tseem noj mis, mus uasi ze ntawm tus nab muaj taug lub qhov los tsis ntshai,
thiab menyuam yaus yuav cev tes rau hauv nab lub zes, los nab tsis tom.
9Saum Xi-oos, uas yog Vajtswv lub roob dawbhuv,
yuav tsis muaj leejtwg raug mob lossis raug puastsuaj.
Dej puv hiavtxwv licas, neeg ntiajteb yuav puvnpo txoj kev paub Vajtswv li ntawd. #Henpl 2:14
Cov Neeg Uas Raug Ntes Mus Lawm Yuav Rovqab Los
10Muaj ib hnub yuav muaj ib tug vajntxwv tshiab sawv hauv Daviv cajces los ua ib lub cim rau txhua haivneeg. Lawv yuav tuaj sibsau rau hauv Nws lub nroog thiab hawm Nws. #Loos 15:12 11Thaum hnub ntawd los txog, tus TSWV yuav siv Nws lub hwjchim mus coj Nws haivneeg uas tseem tshuav nyob rau tebchaws Axilias, Iziv, Pathalaus, Itiupias,#11:11: Lus Henplais hais tias Khuses: Khuses yog ib lub npe thaum ub uas nyob rau ib cheebtsam qabteb ntawm tus Dej Nais. Cheebtsam no, nyob rau tiam thaum nomtswv Loos kav tebchaws, yog hu ua Itiupias, uas tus ciamteb yog los ti nkaus rau tebchaws Xudas thiab tiam nimno hu ua Itiupias. Elas, Npanpiloos, thiab Hamaj, thiab tej tebchaws uas nyob raws ntug dej thiab tej koog povtxwv hauv hiavtxwv, rov los nyob rau hauv lawv tej qub teb qub chaw. 12Tus TSWV yuav tsa ib tug chij ua cim qhia rau txhua haivneeg paub tias Nws tabtom sau cov Yixalayees thiab cov Yudais uas tau khiav mus nyob uasab uasua rau plaub cegkaum ntuj lawm rovqab los. 13Cov Yixalayees yuav tsis khib cov Yudais ntxiv lawm, thiab cov Yudais yuav tsis ua yeebncuab rau cov Yixalayees lawm. 14Lawv yuav sau zog uake mus tawmtsam cov Filixatees uas nyob sab hnubpoob, thiab mus huab cov neeg uas nyob sab hnubtuaj. Lawv yuav tua yeej cov Edoos thiab cov Mau-am, thiab cov Amoos yuav mloog lawv lus. 15Tus TSWV yuav ua kom Hiavtxwv Xu-es qhuav thiab tso khaubzeeg cua ntsawj tus Dej Yufatis kom nqhuab, tsuas tseg xya ceg dej me xwb, kom leejtwg los thiaj yuav hla tau. #Tshwm 16:12
16Yuav muaj ib txoj niamkev loj hauv tebchaws Axilias rau Nws haivneeg Yixalayees uas seem taug rov los ib yam li thaum ub lawv cov yawgkoob rov nram tebchaws Iziv los.
Currently Selected:
Yaxayas 11: MWW2022
Highlight
Copy
Compare
Share
Want to have your highlights saved across all your devices? Sign up or sign in
© 2022 United Bible Societies. All rights reserved.
