Hebreos 6
6
1Qaq ÿoqo'oyi qomi' no'on da ñiquigaqtashiguem, da yaqto' sevidaxa da qomi' ÿi't. Ñi'onaxataqchigui qome nam hua'auchiguiñi qanapaxaguenataguecpi so Cristo. Qataq sa ishit da shi'iguelaxasoxolec da sa'axataxaco mayi taÿa'alo naq'en da nleuaxa camayi, qataq da qaipi'iÿa'a ñi Dios, 2qataq da llic da qanachilaxan ca shiÿaxaua, qataq da qaÿachiltalec na 'amqajnataxanaxaicpi, qataq da llic qom qaltaq qanca'alaxateec na leuaxaicpi, qataq qom qanmit 'enauacna. 3Qaq 'eda qome da shinaqtec, da huo'otaq qomi' ÿashiitema ñi Dios.
4Cha'ayi nam mashi sogote co'ollaxa da qaicoÿadelec da lauattonaxanaxac, qataq mashi sogote da ÿaÿateeta cam ÿan ñi Dios, qataq sogote da tanguit so Espíritu Santo, 5qataq da mashi ÿaÿateeta da l'aqtac ñi Dios, qataq dam n'añaxac mayi hueta'a cam 'alhua mayi ñaq naÿa'cna, 6qaq ne'ena shiÿaxauapi, da huo'otaq ÿi'iguelaxalec da dashiuec, nachi sa ishit da qaltaq ca'aisalo qanqoÿin naua n'onataxaco, cha'ayi namayipi 'eeta'am da qaltaq iuaxaneuo so llalec ñi Dios qataq qaÿauaachigui naq'en da ÿi'inai' somayi. 7Qaq namayipi 'eeta'am ca 'alhua mayi sa i'atai' da cañi naq'en na auot da talec. Qaq que'eca 'alhua, da huo'otaq ÿataqta no'on na ala na languishic cam do'onataxaatapeguelec, nachi camayi huo'o da nqouagaxa mayi chigoqo'ot ñi Dios. 8Qalaxayi que'eca 'alhua da huo'otaq ñaxajlec ana ÿaxat qataq ana huoue, nachi camayi ÿataqta qaica ca naigui, taÿa'a da ÿauo'o ca nhuaxanaguec naq'en ñi Dios, qataq taÿa'a da qaÿavigaxat.
Da qanaquitaxac mayi qomi' qadamchiyiñi naq'en
9Qami' ÿaqaÿadolqa, qomi' nai'ctaxa da huo'otaq 'eetec de'eda da qadtaxaÿaxac, qalaxayi qomi' saÿajnaqta da qoñiita dam lta'adaic qanchoxonnataguiiqui mayi chigaqaigui da nca'alaxa. 10Cha'ayi ñi Dios sa ishit da huo'otaq sa ipaguelec ca l'aqtac. Qataq ñimayi sa ishit da icoua'ai da qad'onataxanaxaqui qataq da qadauotaxanaqtaiqui nam qadqaÿanquiipi mayi qad'amqajnataxanaxauaipi, dam ña qoquiito'ot nagui da qau'ochiitac. 11Qalaxayi qomi' sauoqtaique da ñi 'oonolec da qoñiita quetot qome da n'añaxataxac, chochi ivitta'a ca loga't, yaqto' ÿataqta ipacchigui 'enauac cam qanaquichiitaique. 12Qataq sa saÿamaxadenaq da qami' qavi'iguelaqÿa da qaica ca qadasapachaqai, chaqdato' da qami' qau'enaxachi da lataxac nam chigoqchigui da lpi'iÿaxac qataq dam lhualaxavic, nachi ÿaconguet dam ÿachaxanapec ñi Dios.
13Cha'ayi ñi Dios co'ollaq huo'o da ÿachaxanapecot so Abraham, qalaq ñimayi maichi ntaqtapeguela't, cha'ayi sa ishit da huo'o ca lÿa 'amaqtaq da huo'otaq ÿanot ca l'aqtac. 14Nachi 'enapeco': “Ÿataqta lta'adaic qome da ÿoqouagaxanaqtaic 'am sanem, qataq ÿataqta qalota qome ca 'ai'alaqpi 'am sanem.” 15Nachi so Abraham ÿataqta qaÿoqtegue da lhualaxavic da iuattaique de'eda, nachi somayi ivida'a da ÿaconguet dam ÿachaxanapecot co'ollaxa ñi Dios. 16Na shiÿaxauapi, da huo'otaq ÿan ca l'aqtac, qalaq namayipi ÿanot da l'aqtac cam nataÿaña namayipi. Qaq da huo'otaq qoÿan ca n'aqtac da ÿataqta qaipacchigui, qalaq camayi sa ishit da huo'otaq qancotatapigui. 17Qaq ÿoqo'oyi ñi Dios ÿan da l'aqtac da ÿataqta ipacchigui cam ÿachaxanapec, cha'ayi ñimayi nshitaique da ÿaÿajnaxanaxaata nam taÿa'a qominchiyi da ÿaconguet dam ÿachaxanapec, da ñimayi ishit da ÿataqta ipacchigui da i'ot cam ÿachaxanapec, qaq sa nadalaxat ca l'aqtac. 18Qaq 'eda da 'eetec da huo'oi naua dos mayi sa ishit da qanqochinaxa't, nam huo'o mshi sa ishit da datenataxan ñi Dios, qaq nachinaua naua ÿachigoxotchiguilo ñi Dios da qomi' ÿanema da qad'añaxac, qomi' mayi shi'iguenqot ñimayi qataq sa'amaqtenaq dam aquitaxac mayi qomi' ÿanema. 19Qaq de'eda qanaquitaxac, nachida dam qomi' i'añaxatchiyiñi qataq dam qadquiyaqteÿaxac. Damayi 'eeta'am cam nllañi aca barco. Qaq de'eda qanaquitaxac, damayi n'attaña cam pa'auo so lapoxot aca n'onaxanaxaqui mayi neta'ague da piguem, 20som inoxoneu'a co'ollaxa so Jesús, da yaqto' ÿauategue ca qoyic. Qaq 'eda da 'eetec da so Jesús ivida'a da nachiso so 'oonolec qadtaxaÿaxanaxanec da detaxaÿapegue' ñi Dios, 'eeta'am da lataxac so Melquisedec.
Currently Selected:
Hebreos 6: TBSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
