Hebreos 7
7
So Jesús ntaxaÿaxanaxanec da qaitaxaÿapegue' ñi Dios, 'eeta'am so Melquisedec
1Se'eso Melquisedec, somayi nachiso so lta'a nam netaña yi Salem qataq ltaxaÿaxanaxanec na shiÿaxauapi da qaitaxaÿapegue' ñi Dios mayi 'amaqtaqaic. Qaq so Abraham co'ollaq mashi ñi'iguelaq, chigoqta'a so alaataxac mayi huaigui co'ollaq ÿalaua't soua nta'al, nachi ÿanem da nqouagaxa somayi. 2Nachi so Abraham ÿanem somayi ñi 'oonolec nam diez nam lhuotaxanaxatpi mayi ÿachigoxotaigui so alaataxac. Qaq de'eda n'enaxat Melquisedec da hua'auchiguiñi naigui 'eeta': “Nta'a mayi no'on da lataxac.” Qaq cha'ayi somayi nachiso so lta'a na netaña yi Salem yim nataq'en da naigui 'eeta': “Nlagaxayic,” qaq ÿoqo'oyi de'eda n'enaxat nataq'en da naigui 'eeta': “Lta'a da nlagaxayic.” 3Qaq somayi qaica ca lta'a qataq aca late'e qataq cam hua'au lta'alpi. Qataq somayi sa ishit da qai'axat da 'eetec ca lañoxoc qataq ca l-leuaxa. Qaq 'eda da 'eetec da somayi nachi 'eeta'am da lataxac so llalec ñi Dios, da somayi nachi 'eetai' da ntaxaÿaxanaxanec da qaitaxaÿapegue' ñi Dios.
4Qaq nagui qami' qauloichigui da 'eetec da l'amaqchic se'eso Melquisedec. Qaq ÿoqo'oyi som hua'au qadta'a Abraham ÿanem co'ollaxa somayi añi 'oonole nam diez na lhuotaxanaxatpi mayi ÿachigoxotaigui so nta'alpi mayi nalattague' co'ollaxa. 5Qaq naua lqataxaco so Moisés i'axa't da na ntaxaÿaxanaxanecpi mayi llalaqpi so Leví, huo'o da n'aqtac da yaqto' daloqnaxaalec añi 'oonole nam diez lalamaxatpi 'enauac na shiÿaxauapi, qamaq namayipi maichi lalamaxat lauo' l'ecpi, nataq'en llalaqpi so Abraham. 6Qaq so Melquisedec, somayi nai'ctaxa da sa ishit da llalec so Leví, qalaxayi nachi 'en'am somayi daloqnaxaalec añi 'oonole 'enauac nam lalamaxatpi so Abraham som huo'o co'ollaxa dam ÿachaxanapecot ñi Dios. Huaña, nachi so Melquisedec ÿanem da nqouagaxa so Abraham. 7Qaq sa ishit da huo'o ca ÿoqolguet de'eda, da cam doqouagaxanaqta nachica cam 'amaqtaq, qaq saq 'en'am cam qanqouaguec. 8Qaq de'eda shinaqta nagui nam ÿacootapeeguet añi 'oonole nam diez lalamaxatpi na shiÿaxauapi, namayipi taÿa'a da ileu. Qalaxayi de'eda 'eetec so Melquisedec naua l'aqtaqa ñi Dios i'axa't da somayi nachi 'eetai' da nca'altauec. 9Qaq nachi 'eetec nataq'en som Leví qataq na ltaxaÿaxanaxanecpi na shiÿaxauapi da qaitaxaÿapegue' ñi Dios mayi llalaqpi somayi, nam nagui daloqnaxaatapeguelec añi 'oonole nam nalamaxatpi, da namayipi nataq'en ÿaneuo co'ollaxa añi 'oonole nam lalamaxatpi da ÿanot so Melquisedec co'ollaq so Abraham deshiitenaxan. 10Cha'ayi 'eesa da namayipi 'eeta'am co'ollaxa da nachattau'a so Abraham co'ollaq so Melquisedec huaqata'aguet somayi, nai'ctaxa da saxanaxa da ñiguiñi namayipi.
11Na llalaqpi so Israel co'ollaq ÿaconguet na nqataxacpi, qalaq chigoqchigui qanqoÿin na ltaxaÿaxanaxanecpi mayi llalaqpi so Leví, nam nataq'en llalaqpi so Aarón. Qaq na ntaxaÿaxanaxanecpíctaxa da ishit da nalochiguiñi naq'en da lataxac nam quetague' na nqataxacpi, nachi sa ishíttaxa da iuen da anac ca lÿa ntaxaÿaxanaxanec da qaitaxaÿapegue' ñi Dios, da 'eeta'am da lataxac so Melquisedec, qaq sa ishit da 'eeta'am so Aarón. 12Cha'ayi da qanqochinaxat na ntaxaÿaxanaxanecpi, nachi nataq'en iuen da qanqochinaxat na nqataxacpi. 13Qaq som qadataxala' mayi i'axat co'ollaxa naua l'aqtaqa ñi Dios, somayi chigaqaigui na laÿipi llalaqpi so Israel, nam sa ishit da chigaqaigui ca ntaxaÿaxanaxanec. 14Cha'ayi 'enauac da qaÿaÿateeta da so qadataxala' chigaqaigui na llalaqpi so Judá, nam sa ishit co'ollaxa da detaxaÿa so Moisés co'ollaq i'axattac da llic na ntaxaÿaxanaxanecpi.
15Qaq de'eda ÿoqta ÿataqtegue da lataxac co'ollaq yi'oq se'eso lÿa ntaxaÿaxanaxanec, mayi 'eeta'am da lataxac so Melquisedec, 16da somayi qoÿanagui da ntaxaÿaxanaxanec. Qalaxayi sa ishit da chigaqaigui ca ñalaqpi mayi i'axat na nqataxacpi da chigaqaigui ca ntaxaÿaxanaxanec. Cha'ayi somayi chigoqchigui da l'añaxac da nachaalataxac mayi sa ishit da qanlaxajñi. 17Cha'ayi de'eda nachida da 'enapec ñi Dios co'ollaq i'axata'a somayi, 'eeta':
'Am nachi 'eetai' qome da 'am ltaxaÿaxanaxanec na shiÿaxauapi da qaitaxaÿapegue' ñi Dios,
qaq nachi qoneta'am da lataxac so Melquisedec.
18Qaq ÿoqo'oyi se'eso hua'auchiguiñi namaxasoxonaxac, somayi qansoguiñi, cha'ayi somayi qaica ca l'añaxac, qataq qaica ca naigui. 19Cha'ayi nam lqataxacpi so Moisés sa ishit da ÿañoxot da naloqchiichiguiñi da lataxac na shiÿaxauapi. Qalaxayi nmenguet qanqoÿin dam qanaquitaxac mayi qaica ca 'en'am, qaq nachida da chigoqchigui da huo'o mshi ñoqochinaxau'a ñi Dios.
20Qaq ñi Dios co'ollaq i'ot de'eda, qalaq ÿataqta ÿan so l'aqtac da yaqto' ipacchigui. 21Qaq nam laÿipi ntaxaÿaxanaxanecpi co'ollaq qoÿideuo, qalaq sa ishit da huo'otaq qoÿan ca n'aqtac da yaqto' qaipacchigui. Qalaxayi de'eda 'eetec se'eso lÿa ntaxaÿaxanaxanec, qalaq ÿataqta huo'o co'ollaxa so n'aqtac qoÿan. Cha'ayi naua l'aqtaqa ñi Dios mayi nanettrañi 'eeta':
Ñi qadataxala' ÿan da l'aqtac,
mayi sa ishit da nadalaxat, 'eeta':
“Nachi 'eetai' qome da 'am ntaxaÿaxanaxanec da qaitaxaÿapegue' ñi Dios,
qaq nachi qoneta'am da lataxac so Melquisedec.”
22Qaq ÿoqo'oyi so Jesús nachiso so ÿataqta 'itchiguiñi da 'en naq'en cam aÿamaxataxac mayi ÿataqta ÿaÿamaqchiguiñi, saq 'en'am som hua'auchiguiñi. 23Qaq na laÿipi ntaxaÿaxanaxanecpi, namayipi ivida'a da ÿataqta qalota, cha'ayi namayipi ileuta'aguet, qaq sa ishit da nachi 'eetai'. 24Qaq so Jesús, qalaxayi sa ishit da ileu. Qaq ÿoqo'oyi sa ishit da huo'o ca lÿa ÿanagui da l'onataxanaxac da qaitaxaÿapegue' ñi Dios. 25Qaq ÿoqo'oyi somayi ishit da chochaq tateec da nca'alaxateec cam chigoqchigui somayi da nañanot ñi Dios. Cha'ayi somayi nachi 'eetai' da nca'altauec, da yaqto' nqouagaxaueetacot ñi Dios souaxat namayipi.
26Qaq ÿoqo'oyi so Jesús nachiso so 'oonolec qadtaxaÿaxanaxanec da detaxaÿapegue' ñi Dios mayi seuenaqtac. Cha'ayi somayi ÿataqta qui'itta, sa qauem da lataxac, qataq qaica ca lasouaxashit, qataq sa ishit da nhuoiguet qanqoÿin na 'itaxaloxoicpi, qataq somayi neta'ague qanqoÿin da laÿi na piguem. 27Qaq sa ishit da 'eeta'am na laÿipi lataxala' na ntaxaÿaxanaxanecpi da namayipi iuen da i'auaxaañi da ÿavigaxat aca lachitaqtaxanaqte 'enauaque naua na'axa'te, da yaqto' qaÿapalaxat na maichi lasouaxashitpi, ime, qataq jec na lasouaxashitpi na shiÿaxauapi. Qaq so Jesús, qalaxayi 'oonolec da ÿi'iguelaxalec da ÿauo'o aso lachitaqtaxanaqte da ÿaneuo co'ollaq maichi ÿan da nachaalataxac. 28Qataq na lqataxacpi so Moisés chigoqchigui da qoÿideuo da lataxala' na ntaxaÿaxanaxanecpi cam shiÿaxaua mayi sa ishit da ÿoqta nalochiguiñi. Qaq de'eda l'aqtac ñi Dios mayi ÿan da yaqto' ipacchigui, mayi ÿan co'ollaq qaÿata'ague na nqataxacpi, damayi chigoqchigui da qoÿideuo da lataxala' qanqoÿin na ntaxaÿaxanaxanecpi so llalec Jesús, som nachi 'eetai' da nalochiguiñi da lataxac.
Currently Selected:
Hebreos 7: TBSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
