Hebreos 5
5
1Cha'ayi ñi 'oonolec nam lataxala'pi na ntaxaÿaxanaxanecpi qaÿachigoxottoigui nam shiÿaxauapi, nachi qoÿideuo, da yaqto' ltaxaÿaxanaxanec qanqoÿin na shiÿaxauapi da detaxaÿapegue' ñi Dios, qataq da ÿaneuo ana nachitaqtaxanaqte, qataq da qaÿavigaxat na nachitaqtaxanaxat, da yaqto' qaÿapalaxat na nasouaxashit. 2Qaq cha'ayi ne'ena nataxala'pi nataq'en nque'etaxaatapiguilo naua lqalhuaxaco na shiÿaxauapi, qaq ÿoqo'oyi namayipi ishit da nhualaxaune' nam qaica ca ÿaÿajnapec qataq isomtac. 3Qaq souaxat de'eda maichi lqalhuaxa, nachi namayipi iuen da maichi ÿaneuo aca lachitaqtaxanaqte da ÿavigaxat souaxat naua maichi lasouaxashi'te, qataq nachi 'en'am nam lasouaxashitpi na shiÿaxauapi.
4Qaq sa ishit da huo'o ca maichi nalligoxojla't da 'enapec lataxala' na ntaxaÿaxanaxanecpi. Cha'ayi ñim Dios mayi nachiñita iÿaxana ca shiÿaxaua, nachi ÿanagui de'eda n'amaqchic, 'eeta'am da 'eetec co'ollaq iÿaxana so Aarón. 5Qaq 'eda da 'eetec nataq'en so Cristo, somayi sa ishit da huo'otaq maichi nalligoxojla't da nachiso lataxala' na ntaxaÿaxanaxanecpi. Cha'ayi nachiñi ñim Dios mayi ÿanem de'eda l'amaqchic somayi. Cha'ayi nachi 'ena'pe naua l'aqtaqa, 'eeta':
'Am mayi nachi'am ÿalec;
'am seco'oic ne'ena na'a'q.
6Nataq'en nachi 'ena'pe naua lÿa't nanettrañi l'aqtaqa ñi Dios, 'eeta':
'Am nachi 'eetai' qome da 'am ltaxaÿaxanaxanec na shiÿaxauapi da qaitaxaÿapegue' ñi Dios,
qaq nachi qoneta'am da lataxac so Melquisedec.
7So Cristo co'ollaq hueta'a ana 'alhua, qalaq somayi ÿataqta nlamaxaden da nqouagaxaueetac qataq da deÿaxaatac, noÿiito'ot ñim Dios mayi huo'o da l'añaxac da yaqto' nca'alaxateeguesop somayi da nleuaxa. Qalaq ñi Dios hua'axaÿa somayi, souaxat somayi da ÿataqta nañanot ñimayi. 8Qaq so Cristo, somayi nai'ctaxa da ñalec, qalaxayi somayi napaxaguena da ÿalaq, souaxat da nque'ejnaxac. 9Qaq cha'ayi somayi ÿataqta qanaloqchiichiguiñi da lataxac, qaq ÿoqo'oyi ishit da nachiso so chigoqchigui dam chochaq tateec nca'alaxa mayi taÿot 'enauac nam ÿalaxaguet somayi. 10Nachi ñi Dios ÿanagui somayi da nachiso so lataxala' nam ntaxaÿaxanaxanecpi da qaitaxaÿapegue' ñimayi. Qaq nachi 'eeta'am da lataxac so Melquisedec.
Da lchic ca ÿaxaneec da lpi'iÿaxac
11Qaq qomi' ÿataqta qalota na qad'aqtaxanaxac da sa'axataq de'eda, qalaxayi huo'o da lqalaic da qai'axategue ca llic damayi, cha'ayi qami' sa ishit da qauaÿajñi. 12Cha'ayi nagui da mashi qaÿoqteguelo naua vi'iyi, nachi qami' ishíttaxa da mashi qauapaxaguenataxañiitac. Qalaxayi nagui qami' ñaq 'eetalec da qaviñiitac da qami' qaÿapaxaguenque ca llic naua huesoteguelo lapaxaguenataxanaxaco ñi Dios. Cha'ayi qami' qavi'iguelaqÿa da qaica ca qad'añaxaqui, ÿoqo'oyi iuen da qami' qaiqui'axanque ca nchi', qaq sa ishit da nachica ca nallic mayi sa nsatta. 13Qaq nam chictac na nchi', namayipi 'eeta'am na ñaqpiolec mayi ñaq lliptac, cha'ayi namayipi sa ishit da ivi' da ÿaÿaten ca llic ca no'on nataxac. 14Qalaxayi nam nallic mayi sa nsatta, namayi taiguet cam shiÿaxaua mashi ÿi, mayi mashi dauattonaxan, qataq nai'ac da ÿauatton cam no'on qataq ca qauem.
Currently Selected:
Hebreos 5: TBSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
