Zabur 72
72
Wati adlá bádsháhá baksh
Solaymánay Zabur.
1Oo Hodá! Wati adlá bádsháhá bebaksh,
wati ensápá bádsháhay chokká,
2tánke á pa ensáp tai kawmay sará dádrasi bekant,
setam distagénáni sará pa adl.
3Kóh pa kawmá ábádi byárátant,
jomp o tomp, pahrézkáriay samará.
4Bádsháh kawmay setam distagénáni hakká bedayát,
mohtájáni chokkán berakkénát o
setamgerán tabáh kanát.
5Nasláni nasl tai sharap o ezzatá bedárátant,
tánke rócha drapshit,
tánke máh nura dant.
6Bádsháhay hákemi hamá hawráni paymá bát ke rotagén sabzagáni sará gwárant,
hamá hawráni paymá ke zeminá sérápa kanant.
7Áiay ahdá pahrézkár shádáb bátant,
tán hamá wahdá ke máh nura dant ábádi bát.
8Daryá tán daryá áiay bádsháhi barjáh bát o
cha kawrá#72:8 Bezán cha Parátay kawrá. tán zeminay goddhi simsarán.
9Áiay dargáhá gyábánay nendók sará jahl bekanátant,
áiay dozhmen hák bechatthátant.
10Tarshish o tayábgwaráni#72:10 Tayáb, bezán daryáay kerr, sáhel. sardhagáray bádsháh hamáiá song o máliát bedayátant,
Shébá o Sabáay bádsháh pa áiá théki byárátant.
11Sajjahén bádsháh, áiay démá sará jahl bekanátant,
sajjahén kawm áiay hezmatá bekanátant.
12Chiá ke á hájatmandán hamá wahdá rakkénit ke peryáta kanant,
setam distagénán o hamáyán ke madatkáré néstesh.
13Nezór o hájatmandáni sará rahma kant o
hájatmandáni zendá rakkénit.
14Áyáni zendá cha zolm o sheddatá nejáta dant,
áyáni hóná gránkimmata zánt.
15Omri báz bát,
Sabáay teláh áiay peshkash bátant.
Mardom modám áiay dwágó bátant o
sajjahén róchá pa áiá barkat belóthátant.
16Gandom sajjahén molká anchosh báz bát ke
jompáni sará chawl bejant o
bar o samari anchosh báz bát ke Lobnáná ent.
Shahrán mardom anchosh ábád bátant ke sabzag mán dhagárán.
17Bádsháhay nám namirán bát,
tán rócha drapshit nám o tawári bemánát.
Sajjahén kawm cha áiá barkat begerátant o
áiá mobárak begwashátant.
18 Hodáwandén Hodáyá satá bát, Esráilay Hodáyá,
ajabén káráni kanók tahná hamá ent.
19Áiay porshawkatén námá tán abad satá bát,
áiay shán o shawkat sajjahén zeminá begerát.
Anchosh bát. Ámin.
20 Dáude Yassiay dwá hamedá kotthant.
Currently Selected:
Zabur 72: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
