Zabur 71
71
Oo Hodáwand! Maná yalah makan
1Oo Hodáwand! Man tai mayár o báhóth án,
maná sharmsár makan.
2Pa wati adlá maná berakkén o bechotthén,
delgóshá gón man kan o maná berakkén.
3Mani panáh dayagay talár bay,
ke modám dém pa áiá byáyán.
Taw pa mani rakkénagá hokm kortag,
chiá ke mani talár o kalát taw ay.
4Oo mani Hodá maná cha badkáráni dastá berakkén,
cha setamger o bérahmáni panjagá.
5Chiá ke taw, oo Hodáwand, mani omét ay o
cha kasániá, oo Hodáwand, óst o ométon tai sará butag.
6Cha pédáeshá mani komak kanók butagay,
é taw butagay ke maná cha mátá pédá kortag,
mani satá o sárháyagáni dém modám gón taw ent.
7Pa bázénéá neshánié butagán,
chiá ke taw mani mohrén panáhgáh ay.
8Dapon cha tai tawsipá porr ent,
cha tai shán o shawkatá sajjahén róchá.
9Piriá maná cha watá dur makan,
á wahdá ke twánona kotthit, yalahon makan.
10Chiá ke dozhmen mani helápá habará ant,
á ke mani koshagay randá ant hórigá pandala sázant.
11Gwashant: “Hodáyá yalah kortag,
berawén begeréni,
kassia narakkénit.”
12Oo Hodá! Cha man dur mabay.
Oo mani Hodá! Mani madatá eshtáp kan.
13Mani bohtám janók sharmsár o tabáh bátant o
á ke mani ázáray padá ant
pashal o sharmendag bátant.
14Bale man modám tai komakay ométwár án o
tará gésh o géshter satá kanán.
15Tai ádelén káráni habará kanán,
sajjahén róchá tai dátagén nejátay járá janán,
harchont ke áyáni hesáb cha mani zánagá dhann ent.
16Mana káyán o Hodáwanday porwákén káráni járá janán, tahná Hodáwanday,
tai adlay járá janán, tahná tai.
17Oo Hodá! Taw maná cha kasániá sój dátag,
modám tai ajabén káráni járá janán.
18Oo Hodá! Nun ke pir án o mud espét ant,
maná yalah makan,
tán nókén padréchay nyámá tai zóray járá bejanán o
sajjahén áyókén naslán cha tai wák o twáná sahig bekanán.
19Oo Hodá! Tai adl tán borzén arshá ent,
taw ay ke mazanén káret kortag.
Oo Hodá! Tai matth kay ent?
20Harchont taw maná bázén sakki o sóri pésh dáshtag,
bale padá mani zendá bódénay#71:20 Bódénag, bezán zendá nókén shádábi o napas mán kanag. ,
Haw, nóksará maná cha zeminay johlánkiá borzáda káray.
21Mani ezzatá borztera baray
maná padá ásudaga kanay.
22Man tará gón chang o soróda názénán,
chiá ke taw wapádár ay, oo mani Hodá!
Gón rabábay sázá tará názénán,
oo Esráilay Pákén!
23Mani lonth shádmániay kukkárá kanant,
man tará názénán,
ke taw maná móketag.
24Sajjahén róchá tai ádelén káráni zegrá kanán
chiá ke á ke mani ázár rasénagay lóthók atant,
sarjahl o sharmsár butagant.
Currently Selected:
Zabur 71: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
