Zabur 145
145
Hodáwand mazan ent
Satá o saná. Dáuday Zabur.
1Tai shán o shawkatá názénán, oo mani Hodá! Oo bádsháh!
Tai námá satá kanán, abad tán abad.
2Tará har rócha názénán o
tai námá satá kanán, abad tán abad.
3 Hodáwand mazan ent o satáay báz láhek,
kass áiay mazaniá kadd o kesás korta nakant.
4Naslé pa domi naslá tai káráni satáyá kant o
tai mazanén káráni kessahána kárit.
5Man tai mazanén shán o shawkatay sará pegra kanán,
tai bákamálén káráni sará.
6Tai bákamálén káráni zóráwari hamok zobánay sará ent o
man tai mazanén káráni járá janán.
7Tai mazanén sharriáni kessahána kárant o
tai adlay sawtá janant.
8Hodáwand mehrabán o rahm kanók ent,
hezhm geragá déra kant o mehri báz ent.
9Hodáwand gón sajjahénán nék ent o
wati sajjahén addh kortagénáni sará rahma kant.
10Oo Hodáwand! Tai dastay hamok kár tai shográ gipt,
tai wapádár tará názénant.
11Tai bádsháhiay shán o shawkatay habará kanant o
tai zóray mesálána dayant,
12tánke sajjahén baniádam tai zóráwarén kárán jár bejanant,
tai bádsháhiay shán o shawkatá.
13Tai bádsháhi abadi bádsháhié o
tai hákemi nasláni nasl barjáha mánit.
14Harkas ke kapit, Hodáwand áiá dárit o
harkas ke lagatmál ent, Hodáwand áiá chesta kant.
15Sajjahénáni chamm pa taw sakk ant o
taw áyáni rózigá pa wahda bakshay.
16Taw wati dastá pacha kanay o
har zendagénay wáhagán puraha kanay.
17Hodáwand wati hamok ráhá ádel ent,
wati sajjahén kárán wapádár.
18Harkas ke Hodáwandá tawára kant, Hodáwand áiay nazzikká ent,
harkas ke pa del o setk áiá tawára kant.
19Harkasá ke Hodáay tors delá ent, Hodá áiay wáhagán puraha kant o
áiay peryátán gósha dárit o rakkéniti.
20Hodáwand wati sajjahén dóst dárókáni negahpán ent o
sajjahén badkárán tabáha kant.
21Mani dap Hodáwandá názénit,
sajjahén sahdár áiay pákén námá satá bedayátant, abad tán abad.
Currently Selected:
Zabur 145: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
