Zabur 144
144
Hodá may sangar ent
Dáuday Zabur.
1 Hodáwandá satá bát, mani talárá,
ke mani dastán pa jangá dara kárit o
mani lankokán pa merhagá.
2Hamá mani mehr kanókén Hodá o kalát ent,
mani sangar ent o mani rakkénók,
mani espar, ke áiay mayára bán,
ke mani kawmá mani chérdasta kant.
3Hodáwand! Ensán chié ke taw áiá mán byáray,
bani ádám chié ke taw áiay hayálá bedáray?
4Ensánay zend chó damkasshéá ent o
róchi chó gwazókén sáhegéá.
5Hodáwand! Ásmáná derr o jahlád byá,
kóhán dast jan ke cha eshán dutt dar byayt.
6Wati gerókán sheng kan ke dozhmen sheng o sháng bebant,
wati tirán shán o sargardánesh kan.
7Dastá cha borzád shahár,
maná ázát kan o berakkén
cha bázén ápán,
cha darámadáni dastán,
8ke dapesh cha drógá porr ant o
rástén dastesh cha prébá.
9Man pa taw nókén sawté janán, oo Hodá!
Dahtárén soróz o changay sará pa taw sáza janán,
10pa hamáiá ke bádsháhán sóbéna kant o
wati hezmatkárén Dáudá rakkénit,
cha koshókén zahmá.
11Maná berakkén o cha darámadáni dastá ázát kan,
ke dapesh cha drógá porr ant o
rástén dastesh cha prébá.
12Gorhá may bachakk, warnáiá chó rostagén drachká bant o
may jenekk chó washtráshtagén menoká ke pa kalátán tráshag butagant.
13May ambár, cha har paymén bar o samará porra bant o
may ramag hazáráni hesábá gésha bant,
dahán hazáráni hesábá, may dhagárán.
14May áposén gók báz báz chokka kárant o
dozhmen may diwálán próshta nakanant,
kass bandiga nabit o
may bázárán nálag o peryáta namacchit.
15Bahtáwar hamá mardom ant ke hamé dhawlá bant,
bahtáwar hamá ant ke Hodáwand áyáni Hodá ent.
Currently Selected:
Zabur 144: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
