Zabur 119
119
Tai Sharyat maná dóst ent
1Bahtáwar ant hamá ke ráhesh rást ant o
Hodáwanday Sharyatay hesábá gardant.
2Bahtáwar ant hamá ke Hodáwanday parmánána mannant o
pa setk o del áiay shóházá ant,
3hamá ke hecch náensápia nakanant o
áiay ráhá rawant.
4Taw wati rahband dátagant
ke pa sarjamiá áyáni randgiri kanag bebit.
5Pa tai hokmáni barjáh dáragá
mani ráh mohr o mohkam bátant.
6Gorhá á wahdá ke tai sajjahén hokmáni némagá chárán,
sharmsára nabán.
7Gón tachkén deléa tai shográ gerán,
wahdé tai ádelén parmánán dar barána bán.
8Tai hokmáni randgiriá kanán
maná pahk yalah makan.
9Warnáén mardomé chón wati ráhá pák dáshta kant?
Gón tai habaray randgiriá.
10Tará pa setk o del shóháza kanán,
maná mayl ke tai hokmáni ráhá yalah bekanán.
11Man tai habar wati delá ambár kortagant
ke tai helápá gonáh makanán.
12Tará satá bát, oo Hodáwand!
Wati hokmán maná sój day.
13Man cha tai dapá dar átkagén sajjahén hokmán
dape wata gwashán.
14Cha tai parmánáni mannagá anchó shádána bán
ke cha mazanén ganjéá.
15Tai rahbandáni sará pegra kanán o
tai ráhána charán.
16Cha tai hokmán shádmána bán o
tai habará nashamóshán.
17Wati hezmatkáray sará mehrabán bay
tánke zendag bemánán o
tai habaray parmánbardáriá bekanán.
18Mani chammán pach kan
ke tai Sharyatay bákamálén chizzán begendán.
19Man zeminá darámadé án,
wati hokmán cha man chér maday.
20Pa tai hokmán
mani arwáh modám zahirán droshtag.
21Taw gorunákén mardomán hakkala dayay, hamá nálat butagénán
ke tai hokmáni ráhá yalaha kanant.
22Sobakki o kamsharapiá cha man dur kan,
chéá ke man tai parmánána mannán.
23Harchont ke hákem hóra nendant o mani helápá pandala sázant,
bale tai hezmatkár, tai hokmáni sará pegra kant.
24Tai parmán mani shádmáni ant,
pa man sój o saláh ant.
25Man hákán waptagán,
maná wati labzay hesábá zendag bedár.
26Man tará wati ráháni hál dát o taw maná passaw dát.
Nun maná wati hokmán sój day.
27Maná, wati rahbandáni ráhá sarpad kan o
man tai bákamálén káráni sará pegra kanán.
28Mani arwáh cha andóhána nálit,
maná wati habaray hesábá mohkam kan.
29Maná cha prébay ráhán dur bedár,
mani sará rahm kan o Sharyatá maná beday.
30Man wapádáriay ráh dar chetag,
wati del tai hokmáni mannók kortag.
31Man gón tai parmánán bandóka bán,
oo Hodáwand!
Mayl ke sharmsár kanag bebán.
32Tai hokmáni ráhá maydána kanán,
ke taw mani delá dáná kanay.
33Oo Hodáwand! Wati hokmáni ráhá maná sój day,
ke tán áherá bedáránesh.
34Maná agl o hósh beday
ke man tai Sharyatay páband bebán o
pa del o setk eshiay randgiriá bekanán.
35Wati hokmáni ráhá mani rahshón bay,
ke mani wasshi hamesháni tahá ent.
36Mani delá dém pa wati parmánán betarrén,
mani nap o suttáni katthagay badalá.
37Mani chammán cha béarzeshén chizzán dur bedár,
maná wati ráhán zendag bedár.
38Gón wati hezmatkárá kortagén kawlá bedár
hamá kawlá ke gón Hodátorsána kanay.
39Hamá bénangiá dur kan ke maná cha áiá torsit,
ke tai hokm nék ant.
40Pa tai rahbandán hodónák án,
cha wati adlá maná zendag bedár.
41Tai mehr maná sar bát, oo Hodáwand, o
hamá neját ham ke taw kawl kortag.
42Gorhá man hamá mardomán passawa dayán ke maná kalága bandant,
chéá ke man tai habaray sará tawkala kanán.
43Rástén habará cha mani dapá pach mager,
ke mani omét tai hokmáni sará ent.
44Modám tai Sharyatay randgira bán,
abad tán abad.
45Pa ásudagia gardán,
ke tai rahbandáni shóházá butagán.
46Bádsháháni démá tai parmánáni habará kanán o
pashal o sharmendaga nabán.
47Cha tai hokmán shádmán án,
ke maná dóst ant.
48Man pa tai hokmáni zuragá wati dast shahár dátagant
ke maná dóst ant o
tai parmánáni sará pegra kanán.
49Gón wati hezmatkárá kortagén kawlá yát kan,
ke tai kawl mani omét ent.
50Sakki o sórián mani tasallá hamesh ent,
tai kawl maná zendaga dárit.
51Gorunákén mardom maná dáemá kalága bandant,
bale man tai Sharyatá yalaha nakanán.
52Oo Hodáwand! Maná tai ahdi hokm yát ant o
maná cha hameshán tasallá rasit.
53Badkáráni sawabá hezhmnáka bán,
hamáyáni sawabá ke tai Sharyatesh yalah dátag.
54Tai hokm mani sawt butagant
har jágah ke nendók butagán.
55Oo Hodáwand! Shapán tai námá yáta kanán o
tai Sharyatay ráhá bán.
56Mani ráh hamé butag,
tai rahbandáni randgiriá kanán.
57Taw manig ay, oo Hodáwand!
Man kawl kortag ke tai habaráni randgiriá kanán.
58Pa del o setk tai chehragay shóházá butagán,
mani sará hamá paymá mehrabán bay ke kawlet kortag.
59Man wati ráh cháretagant o
nun dém pa tai parmánán átkagán.
60Tai hokmáni mannagá eshtápa kanán,
déra nakanán.
61Harchont ke badkáráni sádán maná patátag,
bale tai Sharyatá nashamóshán.
62Shapnémá páda káyán o tai shográ gerán
pa tai ádelén hokmán.
63Man hamá sajjahénáni sangat án ke tai tors áyáni delá ent,
hamá mardománi ke tai rahbandáni randgiriá kanant.
64Zemin cha tai mehrá porr ent, oo Hodáwand!
Wati hokmán maná sój day.
65Pa wati hezmatkárá mehrabán butagay,
hamá paymá ke taw kawl kortagat, oo Hodáwand!
66Maná zánt o sarpadi sój day
ke man tai hokmáni sará tawkala kanán.
67Bazzag bayagá pésar, cha rástén ráhá thagal warán atán,
bale nun tai habaray randgir án.
68Taw nék ay o nékia kanay,
wati hokmán maná sój day.
69Harchont ke gorunákén mardomán mani sará drógén bohtám jatag,
bale man pa del o setk tai rahbandán barjáha dárán.
70Esháni del seng o béehsás ant
bale man cha tai Sharyatá shádmán án.
71Sharr but ke sakki o sóriáni tahá kaptán
ke tai hokmán dar bort bekanán.
72Cha tai dapá dar átkagén Sharyat pa man
cha hazárán teláh o nograhá sharter ent.
73Maná tai dastán addh kort o shekl o dróshom dát,
maná agl o hósh beday ke tai hokmán sarpad bebán.
74Hodátors gón mani gendagá shádmán bátant,
ke man wati omét gón tai habará bastag.
75Oo Hodáwand! Mana zánán ke tai hokm pa adl ant o
taw cha wati wapádáriá maná mosibatáni tahá dawr dátag.
76Tai mehr mani tasallá bát,
hamá paymá ke taw gón wati hezmatkárá kawl kortag.
77Tai rahmat maná sar bátant tán zendag bemánán,
ke tai Sharyat mani shádmáni ent.
78Gorunákén mardom sarjahl o pashal bátant ke watsará mani báposhtá drógesh bastag,
bale man tai rahbandáni sará pegra kanán.
79Harkas ke cha taw torsit dém pa man byáyát,
hamá mardom ke tai parmánán sarpada bant.
80Tai hokmáni bárawá mani del bémayár bát
tánke sharmendag mabán.
81Mani arwáh pa hamá nejátá talwasit ke cha tai némagá ent,
man wati óst o omét gón tai habará bastag.
82Mani chamm tai kawlay shóházá kór butagant,
gwashán: “Kadi maná tasallá dayay?”
83Chó mashkéá án ke duttáni tahá hoshk butag,
bale tai hokmon nashamoshtagant.
84Tán kadén tai hezmatkár wadárá bebit?
Kadi mani ázár dayókán sezá dayay?
85Gorunákén mardom pa man kalla kóchant,
tai Sharyatay helápá.
86Tai sajjahén parmán porehtebár ant,
maná komakk kan ke mardom maná mopt o náhakká ázára dayant.
87Maná cha zeminay sará gár o gomsár kanagi atant,
bale man tai rahband yalah nadátant.
88Wati mehray hesábá maná zendag bedár o
cha tai dapá dar átkagén hokmáni randgiriá kanán.
89Oo Hodáwand! Tai habar abadmán ent,
ásmáná mohr óshtátag.
90Tai wapádári nasláni nasl barjam ent,
taw zemin addh kort o é barjáha mánit.
91Tai hokm tán róche maróchigá barjáh ant
chéá ke sajjahén chizz tai hezmatá kanant.
92Agan tai Sharyat mani shádmáni mabutén,
man mosibatáni tahá gár o gomsár butagatán.
93Hechbar tai rahbandána nashamóshán,
ke taw cha hamesháni wasilahá maná zendag dáshtag.
94Maná berakkén ke taig án
tai rahbandáni shóházá butagán.
95Badkár mani tabáhiay wadárá ant,
bale man tai parmánáni némagá charán.
96Har kamálá haddé hast,
bale tai hokmán haddé nést.
97Tai Sharyat maná chón dóst ent,
sajjahén róchá hameshiay pegrá án.
98Tai hokm maná cha mani dozhmenán dánátera kanant,
ke modám gón man gón ant.
99Maná cha wati tálim dayókán géshter zánt hast
chéá ke tai parmánáni pegrá án.
100Cha kamáshán zántkárter butagán
ke tai rahbandáni randgiriá kanán.
101Man wati pád cha har radén ráhá dur dáshtagant
ke tai habará dásht bekanán.
102Cha tai hokmán wati démon natarréntag
ke taw wat maná tálim dátag.
103Tai habar chónén shirkenén támé kanant,
mani dapá cha bénagá shirkenter ant.
104Cha tai rahbandán maná zánt o sarpadia rasit,
paméshká maná cha har radén ráhá naprat ent.
105Tai habar pa mani pádán cherágé o
pa mani ráhá rozhné.
106Man sawgendé wártag o é sawgenday sará óshtátagán
ke tai ádelén hokmáni randgiriá kanán.
107Oo Hodáwand! Man sakk azáb saggetag,
anchosh ke kawlet kortag, maná zendag bedár.
108Oo Hodáwand! Man pa wáhagé tará satá kanán,
mani é korbánigá kabul kan o
maná wati hokmán sój day.
109Harchont ke modám markay panjagá án,
bale tai Sharyatá béhayála nakanán.
110Badkárán pa man dámé chér gétkag,
bale man cha tai rahbandán nathagaletagán.
111Tai parmán modám mani mirás ant,
mani delay shádmáni ant.
112Man wati del pa tai hokmáni mannagá tarréntag,
modám, tán godhsará.
113Cha doruén mardomán naprata kanán o
tai Sharyatá dósta dárán.
114Taw mani panáh o espar ay,
man wati óst o omét gón tai habará bastag.
115Cha man dur bebét, oo badkárán,
ke man wati Hodáay hokmáni randgiriá bekanán.
116Wati labzay hesábá maná mohkam bedár o man zendaga mánán,
mayl ke mani omét beproshit.
117Maná mohr bedár ke berakkán,
modám tai hokmáni zegrá kanán.
118Hamá mardomán yalaha kanay ke cha tai hokmáni ráhá dura bant,
ke áyáni prébkáriá ásaré nést.
119Taw zeminay saray sajjahén radkár chó gand o gasarhá dawr dátagant,
paméshká maná tai parmán dósta bant.
120Mani jánay gósht cha tai torsá larzit o
maná cha tai rahbandána torsit.
121Man adl o ensáp kortag,
maná setamgeráni dastá yalah makan.
122Wati hezmatkáray salámati o washháliay zemánatá beday,
mayl ke gorunák mani sará zolm bekanant.
123Mani chamm pa hamá rakkénagá wadárig ant ke cha tai némagá ent,
tai ádelén kawlay purah bayagay entezárá án.
124Wati hezmatkárá wati mehray hesábá bechár o
wati hokmán maná sój day.
125Man tai hezmatkár án, maná sarpadi beday
ke tai parmánán bezánán.
126Oo Hodáwand! Wahd átkag ke taw káré bekanay,
chéá ke tai Sharyatá próshant.
127Maná tai hokm cha teláhá dóstter ant,
cha asligén teláhá géshter.
128Tai sajjahén rahbandáni rástiá mannán,
paméshká maná cha har radén ráhá naprat ent.
129Tai parmán bákamál ant,
paméshká áyána mannán.
130Tai habaray bayán kanag rozhna bakshit o
násarpadán sarpadia dant.
131Man wati dapá pacha kanán,
tonnig án o pa tai hokmán zahirig.
132Démá gón man tarrén o mani sará rahm kan,
anchosh ke taw modám gón wati námay dóst dárókána kanay.
133Wati habaray hesábá mani gámáni rahshón bay,
gonáhá mayl ke mani sará hákemi bekant.
134Maná cha ensánay zolmá bemók
ke tai rahbandáni randgiriá kort bekanán.
135Wati démá wati hezmatkáray sará drapshén o
wati hokmán maná sój day.
136Cha mani chammán arsay kawra tachant
ke tai Sharyatay randgiri kanaga nabit.
137Oo Hodáwand! Taw ádel ay o
tai hokm barhakk ant.
138Á parmán ke taw dátagant pa adl ant,
sarjamiá porehtebár.
139Mani gayratá maná jánsóch kortag
chéá ke mani dozhmenán tai habar shamoshtag.
140Tai habar pák o palgár ant o
tai hezmatkárá dóst ant.
141Harchont ke man kamarzesh o hakiré án,
bale angat tai rahbandána nashamóshán.
142Tai adl dáemi o
tai Sharyat rást ent.
143Sakki o sóri mani sará átkagant
bale tai hokm mani shádmáni ant.
144Tai parmán tán abad pa adl ant,
maná sarpadi beday ke zendag bemánán.
145Oo Hodáwand! Pa del o setk tawára kanán, passaw beday o
man tai hokmáni randgiriá kanán.
146Gón taw peryáta kanán: “Maná berakkén”
o man tai parmánána mannán.
147Cha bámgwáhá pésar páda káyán o peryáta kanán,
man wati óst o omét gón tai habará bastag.
148Mani chamm shapay sajjahén pásán pach ant
ke tai habaray sará pegr kort bekanán.
149Oo Hodáwand! Mani tawárá wati mehray hesábá gósh dár,
wati hokmáni hesábá maná zendag bedár.
150Hamá ke badkáriáni randgir ant, nazzikká rasetagant,
á cha tai Sharyatá dur ant.
151Oo Hodáwand! Taw nazzikk ay o
tai sajjahén hokm rást ant.
152Man sakk dér ent zántag,
taw wati parmán barjam dáshtagant ke abadi bebant.
153Mani sakki o sórián bechár o mani sará rahm kan
ke tai Sharyaton nashamoshtag.
154Mani hakkay démpániá bekan o mani posht bay,
wati kawlay hesábá maná zendag bedár.
155Rakkag cha badkárán dur ent
ke á tai hokmáni shóházá naant.
156Tai rahmat sakk báz ant, oo Hodáwand!
Wati Sharyatay hesábá maná zendag bedár.
157Mani ázár dayók o dozhmen báz ant,
bale man cha tai parmánán wati dém natarréntag.
158Béwapáyáni némagá charán o maná cha eshán naprata bit,
ke tai rahbandáni randgiriá nakanant.
159Bechár tai rahband maná chón dóst ant,
wati mehray hesábá maná zendag bedár, oo Hodáwand!
160Tai sajjahén habar rást ant o
tai sajjahén ádelén hokm abadmán.
161Hákem maná mopt o náhakk ázára dayant,
bale mani del tai habaráni sará larzit.
162Man tai habaray sará shádehia kanán
hamá mardomay paymá ke poletagén málé berasiti.
163Cha repk o prébá naprata kanán,
tai Sharyatá dósta dárán.
164Róché hapt bar tará názénán,
pa tai ádelén hokmán.
165Hamá ke tai Sharyatá dósta dárant, sakk émen ant o
áyán hecch chizz thagalénta nakant.
166Oo Hodáwand! Pa hamá nejátá wadárig án ke cha tai némagá ent o
tai hokmáni randgiriá kanán.
167Tai parmánáni randgiriá kanán
ke maná sakk dóst ant.
168Tai rahband o parmánána dárán
ke taw mani sajjahén ráhána zánay.
169Oo Hodáwand! Mani peryát tará sar bát,
wati labzay hesábá maná agl o hósh beday.
170Mani nálag tará sar bát,
wati kawlay hesábá maná berakkén.
171Mani lonth tai satáyá sarréch bátant
ke taw maná wati hokmán sója dayay.
172Mani dap tai habará benázénát,
ke tai sajjahén rahband pa adl ant.
173Tai dast pa mani komakk kanagá tayár bát
ke man tai rahband gechén kortagant.
174Oo Hodáwand! Pa hamá nejátá talwasagá án ke cha tai némagá ent o
tai Sharyat mani shádmáni ent.
175Maná zendag bedár ke tará benázénán o
tai hokm maná madat kanátant.
176Chó gárén paséá darpadar butagán.
Wati hezmatkárá shóház kan
ke man tai hokm nashamoshtagant.
Currently Selected:
Zabur 119: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
