Zabur 118
118
Hodáwanday rástén dastá mazanén káré kortag
1 Hodáwanday shográ begerét
ke nék ent o mehri abadmán.
2Esráil begwashát:
“Áiay mehr abadmán ent.”
3Hárunay lóg begwashát:
“Áiay mehr abadmán ent.”
4Hodátors begwashátant:
“Áiay mehr abadmán ent.”
5Wati tangián gón Hodáwandá peryáton kort,
áiá maná passaw dát o ázát kort.
6Hodáwand gón man ent, mana natorsán.
Ensán maná ché korta kant?
7Hodáwand gón man ent, mani madat kanók,
pa sarperázi dozhmenáni némagá charán.
8Hodáay kerrá panáh zurag
cha ensánay sará tawkal kanagá sharter ent.
9Hodáay kerrá panáh zurag
cha shahzádagáni sará tawkal kanagá sharter ent.
10Sajjahén kawmán maná angerr kort,
bale man Hodáwanday námá prósh dátant.
11Maná cha har némagá chapp o chágerdesh kort,
bale man Hodáwanday námá prósh dátant.
12Chó bénagmakeská#118:12 Bénagmakesk, bezán hamá gwamz yá góderr ke bénag addha kant. mani sará per retkant,
bale chó konthagá, damáná sotkant o
man Hodáwanday námá prósh dátant.
13Maná sakká télánkesh dát ke bekapán,
bale Hodáwandá maná komakk kort.
14Hodáwand mani zór o mani sawt ent,
hamá mani rakkénók ent.
15Pahrézkáráni tambuáni tahá sóbén bayag o shádmániay kukkár ent:
“Hodáwanday rástén dastá mazanén káré kortag.
16Hodáwanday rástén dast chest butag,
Hodáwanday rástén dastá mazanén káré kortag.”
17Mana namerán, zendaga mánán o
Hodáwanday kortagén káráni járá janán.
18Hodáwandá maná sharr adab dát,
bale markay dastá nadáti.
19Adl o rástiay darwázagán pa man pach kan,
ke bepoterán o Hodáwanday shográ begerán.
20Esh ent Hodáwanday darwázag
ke pák o pahrézkár cha edá tahá shota kanant.
21Tai shográ gerán ke taw maná passaw dát,
taw mani rakkénók ay.
22Á seng ke bánbandén ostáyán pasond nakort o nazort,
hamá seng bonhesht but.
23É Hodáwanday kár ent o
may chammán bákamál ent.
24Esh ent hamá róch ke Hodáwandá áwortag,
byá pa é róchá gal o shádehia kanén.
25Oo Hodáwand! Márá berakkén.
Oo Hodáwand! Márá sóbén kan.
26Mobárak bát hamá ke Hodáwanday námá kayt.
Cha Hodáwanday lógá shomárá barkata dayén.
27Hodáwand, Hodá ent,
wati nuri may sará drapshéntag.
Aiday korbánigá gón korbánjáhay kánthán pa sád bebandét.
28Taw mani Hodá ay,
tai shográ gerán.
Taw mani Hodá ay,
tará názénán.
29Hodáwanday shográ begerét
ke nék ent o mehri abadmán.
Currently Selected:
Zabur 118: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
