Zabur 105
105
Hodáay mójezahán yát kanét
1 Hodáwanday shográ begerét o
hamáiay námá begerét,
kawmán cha áiay kárán sahig kanét.
2Áiá benázénét, áiá pa sawt benázénét,
áiay sajjahén bákamálén káráni habará bekanét.
3Áiay pákén námay sará pahr bekanét,
Hodáwanday shóház kanókáni del shádmán bát.
4Hodáwand o áiay zór o wákay lóthók bebét,
modám áiay chehragay didáray shóházá bebét.
5Áiay kortagén bákamálén kárán yát kanét,
áiay mójezah o dátagén hokmán,
6oo áiay hezmatkárén Ebráhémay nasl,
oo Ákubay chokkán ke áiay gechén kortagén ét!
7Á, Hodáwand may Hodá ent.
Áiay dádrasi sajjahén jaháná rasant.
8Á wati ahd o paymáná tán abad yáta kant,
hamá labz ke áiá gón hazár naslá kort,
9hamá ahd ke gón Ebráhémá korti o
hamá sawgend ke gón Esáká wárti,
10gón Ákubá karáré bast o pakkái kort,
gón Esráilá, abadmánén ahdé.
11“Kanhánay sardhagárá tará bakshán,
ke shomay bahr o mirása bit.”
12Á wahdá ke é kammok mardom atant,
kammok atant o darámad,
13é kawm o á kawmay nyámá darpadar atant,
é molk o á molká gashtant.
14Kassá áyáni sará zolm kanagi naesht,
pa áyánigi, áiá bádsháh neherr dátant:
15“Mani ‘rógen per moshtagénán’#105:15 Rógen per moshag, bezán pa bádsháhiá gechén kanag. dast per makanét o
mani nabián noksán madayét.”
16Zeminá dhokkáli ér áwort o
áyáni nánay ambári próshtant.
17Áyáni démá mardomé rawáni dát,
Issop, ke goláméay hesábá bahá kanag but.
18Áiay pádesh pa band o zamzil thappig kortant o
ásenén tawké gotthá dátesh,
19tán hamá wahdá ke áiay habar rást butant,
Hodáay habará áiay rásti pakká kort.
20Bádsháhá Issop lóthet o ázát kort,
mardománi hákemá ázát kort.
21Bádsháhá wati lógay master kort,
wati sajjahén mál o melkatay hákem,
22ke bádsháhay kárendahán wati tabá adab bekant o
kamáshán dánáiay tálimá bedant.
23Nun Esráil Mesrá átk,
Ákub, Hámay sardhagárá#105:23 Hámay sardhagár, bezán Mesr. pa darámadi jahmenend but.
24Wati mahluki ábád o
cha áyáni dozhmenán zóráwarter kortant.
25Dozhmenáni deli gardént tán cha áiay kawmá naprat bekanant o
áiay hezmatkáráni helápá pandal besázant.
26Áiá wati hezmatkárén Mussá rawán dát o
Hárun, ke wat gechéni kortagat.
27Eshán mardománi nyámá Hodáay ajabbatén nesháni o
áiay mójezah pésh dáshtant, Hámay sardhagárá.
28Áiá tahári rawán dát o zemin tahár kort,
áiay habaray náparmániesh nakortagat.
29Áyáni ápi hón kort o
máhigi koshtant.
30Sardhagáresh cha pogolá porr but
ke tán áyáni bádsháhi wábjáhán sar butant.
31Áiá habar kort o makeskáni lashkar átkant o
passhag áyáni sajjahén molká mán retk.
32Hawray badalá tróngali gwárént,
ás o bir, áyáni sajjahén sarzaminá.
33Áyáni angur o enjiray drachki tabáh kortant o
molkay drachki próshtant.
34Hokmi kort o madag átkant,
kathag#105:34 Kathag madagáni kesmé., béhesábá.
35Áyáni molkay sajjahén sabzagesh wártant o
hákay sajjahén bar o samaresh ér bort.
36Nun áyáni sajjahén awali chokki jatant
áyáni mardánagiay awali bar o samar.
37Wati mardomi zarr o sohrá bár kort o dhanná áwortant o
cha áyáni kabilahán kassá thagal nawárt.
38Mesr cha Bani Esráilay rawagá gal but,
chéá ke áyáni torsá gár at.
39Áiá jambaré sáhél kort o póshéntant,
ásé róki kort ke shapá rozhnáiesh bedant.
40Áyán lóthet o Hodáwandá baynkuén#105:40 Baynku kapinjeray dhawlén morge, bale cha kapinjerá kaster. morg rawán dát o
ái gón ásmáni naganá sér kortant.
41Taláré tali dát o áp rawán but,
gyábáná kawré tatk.
42Chéá ke wati pákén kawli yát at
ke gón wati hezmatkárén Ebráhémá kortagati.
43Áiá wati kawm pa shádmáni dhanná áwort,
wati gechén kortagén, gón shádehiay kukkárán.
44Áyáná rájáni sardhagári dát o
á, kawmáni kortagén mehnatáni málek butant,
45ke áiay rahbandáni randgiriá bekanant o
áiay Sharyatay hokmáni sará kár bekanant.
Hodáwandá benázénét, Halléluyá.
Currently Selected:
Zabur 105: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
