Zabur 104
104
Oo Hodáwand! Taw mazan ay
1Oo mani arwáh! Hodáwandá benázén.
Oo Hodáwand, mani Hodá! Taw békesás mazan ay,
taw gón ezzat o sháná póshetagay.
2Nurá chó kabáhéá gwará kanay,
ásmáná tambuéay paymá pacha kanay o
3wati borzi lógáni menokán#104:3 Menok, bezán menag, sotun. ápáni sará oshtárénay.
Jambarán wati arrábah jórha kanay o
gwátay bánzolán swár ay.
4Gwátán wati káseda kanay o
ásay bránzá wati hezmatkár.
5Taw zemin áiay bonredáni sará ér kortag
ke hechbar soreta nakant.
6Taw zemin gón ápáni johlánkián póshéntag, kabáhéay dhawlá,
áp kóháni sarborá óshtát.
7Áp cha tai neherrán jestant,
cha tai grandáni tawárá bálesh kort,
8kóháni sará tatkant o dém pa daragán shotant,
dém pa hamá jágahá ke taw pa áyán gisshéntagat.
9Taw anchén hadd o simsaré gisshént ke áp cha ódá gwasta nakant o
nun dega baré zeminá nagipt o napóshit.
10Taw chammag parmátant ke daragán áp berombénant o
kóháni nyámá tachán bebant.
11Gyábánay hamok jánwará ápa dayant,
wahshién har wati tonná próshant.
12Báli morg chammagáni kashá kodóha bandant o
drachkáni sháharháni nyámá sawta janant.
13Taw cha wati borzi bán o bárgáhá kóhán ápa dayay o
zemin cha tai káráni bar o samará séra bit.
14Taw pa dalwatán káha ródénay o
sabzag ke ensán kesht o keshár bekant o
cha zeminá warák dar bekant,
15sharáb ke mardomay delá shát bekant o
rógen ke áyáni démá rozhná bekant o
nán ke ensánay delá zórmand bekant.
16Hodáwanday drachk séráp ant,
Lobnánay gazz ke áiá keshtagant.
17Morg hamódá kodóha bandant o
kunj#104:17 Kunj, mazanén morgé ke Orduá bagalá o Pársiá laklak gwashaga bit. Engréziá “stork” ent. sanóbarén drachkáni sará jágaha kanant.
18Borzén kóh wahshién bozánig ant o
talár, rijgushkáni#104:18 Rijgushk, moshkay paymén jánwaré, bale cha moskhá master ent. panáhgáh ant.
19Taw máh pa wahdáni neshán kanagá addh kort o
róch wati ér nendagay wahdá zánt.
20Taháriá ke káray, shapa bit o
jangalay sajjahén jánwar soragá laggant.
21Shér pa wati shekárá gorrant o
wati waráká cha Hodáyá lóthant.
22Róch ke dara kayt, pera tarrant o
wati hóndháni tahá áráma kanant.
23Á wahdá mardom wati kárána rawant o
tán bégáhá zahmata kasshant.
24Oo Hodáwand! Tai kár chinkadar báz ant,
taw, é sajjahén pa hekmat addh kortagant,
zemin cha tai jórh kortagénán porr ent.
25Daryá ent ke práh o sháegán ent o
cha sahdárá sarréch,
kasán o mazanéná.
26Bójiga rawant o káyant o mazanén ápi jánwar ham,
ke taw jórh kortagant ke ápay tahá gwázi bekanant.
27Sajjahénáni chamm tará sakk ant,
ke áyáni waráká pa wahd bedayay.
28Taw ke dayayesh,
áesh yakjáha kanant,
taw ke wati dastá pacha kanay,
é cha sharrén chizzán séra bant.
29Taw ke wati démá chéra dayay,
é paréshána bant o sarsara janant,
esháni sáhá ke pacha geray
merant o háká pera tarrant.
30Wati ruhá ke déma dayay
é addha bant.
Zeminay sarborá nók o tázaga kanay.
31Hodáwanday shán tán abad bemánát,
Hodáwand cha wati kárán shádmán bát.
32Hamá ke zeminá chárit, zemina larzit,
kóhán ke dasta jant, dutta bant.
33Man wati sajjahén zendá pa Hodáwandá sawta janán,
tánke zendag án, wati Hodáyá názénán.
34Mani pegr o hayál áiá pasond bátant
ke man áiay bárgáhá shádmánia kanán.
35Bale gonahkár cha zeminá gár o gomsár bátant o
badkár pasht makapátant.
Hodáwandá benázén, oo mani arwáh!
Hodáwandá benázénét, Halléluyá.
Currently Selected:
Zabur 104: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
