Zabur 103
103
Oo mani arwáh! Hodáwandá benázén
Dáuday Zabur.
1Oo mani arwáh! Hodáwandá benázén.
Oo mani bátenay har chizz! Áiay pákén námá benázén.
2Hodáwandá benázén, oo mani arwáh!
Áiay hecch nékiá mashamósh,
3hamá ke tai sajjahén gonáhána bakshit o
tai drostigén nádráhián dráha kant.
4Tará cha mordagáni jaháná rakkénit o
mehr o rahmatay tájé tai sará dant.
5Tará cha sharrén chizzán sérápa kant
ke tai warnái wakábéay#103:5 Wakáb mazanén báli sháhiné, Ordu o Pársiá oqáb. paymá nók o tázag bebit.
6Hodáwand adl o ensápa kant o
pa sajjahén setam distagénán dádrasi.
7Áiá wati ráh pa Mussáyá záher kortant o
wati kár pa Esráilay kawmá.
8Hodáwand rahm kanók o mehrbán ent,
hezhm geragá déra kant o mehrá sarréch ent.
9Márá tán abad mayáriga nakant o
na modám pa má gazaba gwárénit.
10Márá may gonáháni hesábá nachárit,
na ke márá may badiáni padmozzá dant.
11Chéá ke haminkas ke ásmán cha zeminá borz ent,
áiay mehr pa hamá mardomán ke Hodáay torsesh delá ent haminkas báz ent.
12Haminkas ke mashrek cha magrebá dur ent,
may gonáhi cha má haminkas dur kortagant.
13Hamá dábá ke peté pa wati chokkán mehrabán ent,
hamé paymá Hodáwand pa hamá mardomán mehrabán ent ke áiay torsesh delá ent.
14Chéá ke may sareshtá#103:14 Saresht, bezán báten, fetrat, jawhar. sarpad ent,
á zánt ke má hák én.
15Haw, ensán chó káhá ent,
chó dhagáray goléá srapit#103:15 Srapag, bezán pach bayag. .
16Wahdé gwáté áiay sará kasshit, gára bit o
áiay jágah padá áiá pajjáha nayárit.
17Bale Hodáwanday mehr, azal tán abad
hamá mardománi hamráh ent ke áiay torsesh delá ent o
áiay adl, esháni chokk o nomásagáni hamráh,
18hamáyáni hamráh ke áiay rahbandáni randgiriá kanant o
áiay hokmáni mannagá nashamóshant.
19Hodáwandá wati bádsháhiay taht ásmánán barjáh dáshtag o
áiay bádsháhi sajjahén hastiay sará hákemia kant.
20Oo Hodáwanday préshtagán!
Shomá, oo zóráwarán ke áiay habarán barjáha dárét o áiay parmánbardáriá kanét!
Hodáwandá benázénét.
21Oo Hodáwanday sajjahén lashkarán!
Shomá, oo áiay hezmatkárán ke áiay wáhagay parmánbardáriá kanét!
Hodáwandá benázénét.
22Oo Hodáwanday sajjahén jórh kortagénán,
har jágah ke áiay bádsháhi barjáh ent!
Hodáwandá benázénét.
Oo mani arwáh!
Hodáwandá benázén.
Currently Selected:
Zabur 103: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
