Zabur 102
102
Sahyuná Hodáwanday námá jár bejanant
Setam distagén mardoméay dwá, hamá wahdá ke wat ájez ent o wati peryátá Hodáwanday bárgáhá sara kant.
1Oo Hodáwand! Mani dwáyá gósh dár,
mani peryát tará sar bát.
2Mani sakki o sóriay róchá
wati démá cha man chér maday.
Wati delgóshá gón man kan,
wahdé tará tawára kanán, zutt passaw beday.
3Chéá ke mani róch chó duttá gára bant o
haddh chó rókén eshkará sochant.
4Mani del chó mortagén káhá gimmortag o hoshk tarretag o
cha ward o waráká kaptagán.
5Cha bázén nálag o peryátá
hoshkén haddh o pósté án.
6Gyábáni bumméay#102:6 Bumm morgé ke gugu ham gwashaga bit, Orduá ollu, Pársiá buf, joghd. paymá án,
anchó ke bummé mán wayránagán.
7Béwáb gandaláni tahá tachk án,
anchó ke tahnáén morgé lógéay sará.
8Dozhmen sajjahén róchá maná shegána janant,
kalága bandant o nálata kanant.
9Chéá ke nánay badalá pora warán o
harché ke nóshán, arsá porr ant,
10cha tai hezhm o gazabá,
chéá ke taw maná chest kort o zeminá jat.
11Mani róch, bégáhi sáhegéay paymá gára bant o
man káhay dhawlá hoshk bayagá án.
12Bale taw, oo Hodáwand, tán abad wati bádsháhi tahtá neshtagay o
tai nám nasláni nasl barjáh ent.
13Taw jáha janay o tará Sahyunay sará bazzaga bit,
chéá ke Sahyunay sará rahm kanagay wahd átkag,
á gisshetagén wahd rasetag.
14Chéá ke tai hezmatkárán é shahray seng dóst ant o
Sahyunay hákay sará ham bazzagesha bit.
15Kawm cha Hodáwanday námá torsant o
zeminay sajjahén bádsháh cha tai mazani o sháná.
16Chéá ke Hodáwand Sahyuná nóksará addha kant o
mán wati shán o shawkatá záhera bit.
17Á bazzagáni dwáyán gósha dárit o
cha áyáni peryátán nádelgósha nabit.
18Bell ke é pa áyókén nasléá nebisag bebit o
anchén kawmé ke angat addh nabutag, Hodáwandá satá o saná bekant.
19Áiá cha wati pákén arshá jahlád cháretag,
Hodáwandá cha ásmáná dém pa zeminá cháretag,
20tánke bandigáni nálagán beshkont o
hamáyán ázát bekant ke markay sezá dayag butagant,
21ke Sahyuná Hodáwanday námá jár bejanant o
Urshalimá áiay satáyá bekanant,
22hamá wahdá ke kawm o bádsháhi
pa Hodáwanday parasteshá yakjáh moccha bant.
23Ráhay némá mani twáni prósht o
mani róchi gwandh kortant.
24Gorhá man gwasht:
“Oo Hodáwand! Omray nyámá mani zendá pach mager,
tai sál tán sajjahén naslán barjáh ant.
25Zemin, taw cha azalá jórh kortag o
ásmán tai dastáni kár ent.
26É sajjahén gár o bégwáha bant bale taw mánay,
é sajjahén chó pósháká kwahna bant,
taw eshán chó pósháká badala kanay o é bérána bant,
27bale taw mánay o
tai sál halása nabant.
28Tai hezmatkáráni chokk tai bárgáhá jahmenenda bant o
áyáni poshpad tai dargáhá barjáha mánant.”
Currently Selected:
Zabur 102: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
