پولُسئے کاگد په رومیان 5

هُدا و اِنسانئے نیاما وشّانی

1نون که ایمانئے سئوَبا راستاور و بێمئیار هساب بوتگێن، چه مئے هُداوندێن ایسّا مَسیهئے راها مئیگ و هُدائے نیاما#5‏:1 نیاما، بزان میانا، درنیاما، تها، تۆکا. سُهل و وشّانی#5‏:1 وشّانی، بزان سُهل، آشتی. آرَگ بوتگ. 2چه ایسّا مَسیهئے راها، اے رهمتئے دروازگ په ما پَچ کنگ بوتگ و نون ایمانئے سئوَبا رهمتانی ساهگا اۆشتاتگێن. وتی اے اُمێتئے سرا پَهر هم بندێن که هُدائے شان و شئوکتا بَهرَمند اێن. 3تهنا اِشیئے سرا نه، وتی سکّیانی سرا هم پهرَ بندێن، چێا که زانێن سکّی و سۆری سبر و اۆپارَ کارنت، 4و سبر و اۆپار کردارا مُهر و مُهکمَ کنت و مُهرێن کردار اُمێت ودیَ کنت، 5و اُمێت مارا دلپرۆش بئیگا نئیلیت، چێا که هُدایا وتی مِهر مئے دلا مان کرتگ، چه هما پاکێن روهئے برکتا که مارا بَکشگ بوتگ. 6آ وهدا که ما اَنگت بێوَس اَتێن، په وهد مَسیها وتی ساه په ما دات، په رَدکار و هُداناپرمانان. 7چۆ سکّ کمَّ بیت که کَسے په پهرێزکارێن مردمێا چه وتی ساها سر بگوَزیت، بلکێن یکّے دِل و جُرئت بکنت که وتی ساها په نێکێن مردمێا بدنت. 8بله هُدا مئے سرا وتی مِهرا چُش زاهرَ کنت که هما وهدا مَسیه په مئیگی مُرت که ما اَنگت گُنهکار اَتێن.

9پمێشکا، نون که چه مَسیهئے هۆنئے برکتا راستاوَر هساب بوتگێن، ما سکّ باز دلجمتر اێن که آییئے وسیلها چه هُدائے کَهر و گَزبا رَکّێن. 10اگن آ وهدا که اَنگت هُدائے دُژمن اتێن، چه آییئے چُکّئے مَرکئے برکتا گۆن آییا وشّان کنگ بوتێن، گڑا نون که وشّان کنگ بوتگێن، سکّ دلجمتر اێن که آییئے زِندئے برکتا ما رَکّێن. 11بله تهنا اینچُک نه، ما چه وتی هُداوندێن ایسّا مَسیهئے برکتا هُدائے سرا پَهر هم بندێن، که نون مَسیها مارا گۆن هُدایا وشّان کناێنتگ.

آدم و مَسیه

12گڑا هما پئیما که گناه یکّ کَسێئے سئوَبا دنیایا آتک و مَرک چه گناها پێدا بوت، همے پئیما مَرک سجّهێن مردمانی نیاما شِنگ و تالان بوت، چێا که سجّهێنان گناه کرتگ. 13شَریَتا پێسر گناه دنیایا هست‌اَت، بله اگن شَریَتے مبیت، گناه هم هسابَ نبیت. 14اَنگت هم، چه آدما بگر تان موسّایا مَرکا بادشاهی کرت، همایانی سرا هم که آیانی گناه آدمئے ناپرمانیئے ڈئولێنے نه‌اَت. آدم هما کَسئے مِسال اَت که دێمترا آیگی اَت.

15بله رهمت ناپرمانیئے پئیما نه‌اِنت. اگن یکّ کَسێئے ناپرمانیئے سئوَبا سجّهێن اِنسان مُرتنت، هُدائے رَهمت و بَکشش که سجّهێن اِنسانان سر بوت، باز مستر اِنت، همے بَکشش که چه یکّێن اِنسانئے، بزان ایسّا مَسیهئے رَهمتا رَست. 16اے بَکشش هما یکّێن اِنسانئے، بزان آدمئے گناهئے آسرئے پئیما نه‌اِنت، چێا که کَزاوت چه یکّ ناپرمانیێا آتک و کَزاوتا مئیارباری آورت، بله بکشش بازێن ناپرمانیان و رند آتک و بکششا راستاوَری و بێمئیاری آورت. 17اگن یکّێئے ناپرمانیئے سئوَبا، چه هما یکّێنئے وسیلها مَرکا بادشاهی کرت، گڑا آ مردم که گنجێن رَهمت و راستاوَریئے بکششئے واهُندَ بنت، چه اے یکّێنئے، بزان ایسّا مَسیهئے برکتا، وتی زِندا الّما بادشاهیَ کننت.

18گڑا هما پئیما که چه یکّ اِنسانێئے ناپرمانیا سجّهێن مردم مئیاربار کنگ بوتنت، چه یکّ اِنسانێئے نێکێن کارا سجّهێن مردم راستاور و بێمئیار کنگَ بنت و زِندئے واهندَ بنت. 19هما پئیما که چه یکّێئے ناپرمانیا سجّهێن مردم گُنهکار بوتنت، چه یکّێئے پَرمانبرداریا بازێنے راستاوَر کنگَ بیت. 20شَریَت آتک که ناپرمانی گێشتر زاهر ببیت، بله جاهے که گناه گێش بوت، رهمت انگت گێشتر بوت، 21و اَنچۆ که گناها بادشاهی کرت و مَرکئے سئوَبساز بوت، رهمت بادشاهی بکنت و راستاوری بیاریت و چه مئے هُداوندێن ایسّا مَسیهئے برکتا اَبدمانێن زِندئے سئوَبساز ببیت.

Currently Selected:

پولُسئے کاگد په رومیان 5: HPKB

Highlight

Copy

Compare