پولُسئے کاگد په رومیان 4

اِبراهێمئے مِسال

1گڑا چے بگوَشێن؟ اِبراهێم که جِسمی هسابا مئے بُنپیرُک اِنت، آییا چے دَر گێتک؟ 2اگن اِبراهێم چه وتی کار و کِردا راستاوَر و بێمئیار هساب بوتێن، آییا چیزّے هست‌اَت که آییئے سرا پَهر ببندیت، بله هُدائے چمّان چُش نه‌اِنت. 3پاکێن کتاب چے گوَشیت؟ اِبراهێما هُدائے سرا یَکین اَت و همے یکین په آییا راستاوری هساب بوت.#4‏:3 پێدائِش 15‏:6. 4نون کَسے که کارَ کنت، آییئے مُزّ داد و بَکشِشے هسابَ نبیت، آییئے هَکّ اِنت. 5بله آ که نێکێن کارانی سرا اۆست و اُمێتَ نکنت، هما هُدائے سرا اۆست و اُمێتَ کنت که رَدکار و ناپَرمانان راستاورَ کنت، آییئے ایمان په آییا راستاوری هسابَ بیت.

6همے پئیما داوود هم هما مردمئے بَهتاوریئے کسّها کاریت که هُدا آییئے کار و کِردا نچاریت و آییا برهکّ هسابَ کنت. داوودَ گوَشیت:

7 ”بَهتاور اَنت هما که آیانی ناشَری # 4‏:7 ناشَری، بزان شَریَتئے هُکمانی سرا اَمَل نکنگ. بکشگ و

گناه شۆدگ بوتگ‌اَنت.

8 بَهتاور اِنت هما که هُداوند آییئے گناها هچبر هسابا نئیاریت.“ # 4‏:8 زَبور 32‏:1‏-2.

9زانا، اے بَهتاوری تهنا په همایان اِنت که سُنّت کنگ بوتگ‌اَنت؟ یا په آیان اِنت هم که سُنّت کنگ نبوتگ‌اَنت؟ ما گوَشێن که اِبراهێمئے ایمان په آییا راستاوری هساب بوت. 10چۆنێن هال و جاورێا#4‏:10 جاوَر، بزان هالَت. چُش بوت؟ سُنّت بئیگا پێسر یا سُنّت بئیگا رند؟ پکّا اِنت که سُنّت بئیگا پێسر راستاور هساب بوت، رَندا نه. 11بله سُنّت بئیگئے نشانی آییا رَست تانکه آییئے راستاوَریئے سرا مُهرے ببیت، هما راستاوَری که سُنّت بئیگا پێسر چه ایمانئے راها هست‌اَتی. گڑا اِبراهێم هما سجّهێن مردمانی پتَ بیت که بے سُنّت بئیگا ایمانَ کارنت و اے ڈئولا راستاوَر و بێمئیار هسابَ بنت. 12همے پئیما، اِبراهێم آیانی هم پتَ بیت که نه تهنا سُنّت کنگ بوتگ‌اَنت، ایمانئے راها هم گام جنَگا اَنت، هما راها که مئے پت اِبراهێما چه سُنّت بئیگا پێسر گامَ جت.

اِبراهێم و واده

13اِبراهێم و آییئے نَسل و پَدرێچا#4‏:13 پَدرێچ، بزان نَسل، چُکّ و اۆبادَگ. جهانئے میراسدار#4‏:13 میراسدار، بزان میراس بَرۆک، میراسا شریکدار، وارِس. بئیگئے واده چه شَریَتئے راها نرَست، چه هما راستاوریئے راها رست که چه ایمانا کئیت. 14پرچا که اگن شَریَتئے رَندگیر میراسدار بوتێننت، ایمان بےاَرزش و واده بێمانا اَت، 15چێا که شَریَت کَهر و گَزبَ کاریت. بله اۆدا که شَریَت نێست‌اِنت، پرۆشَگ هم نبیت.

16پمێشکا، واده چه ایمانئے راها پورهَ بیت، تانکه وادهئے بُنیاد رهمت ببیت و آییئے پورَه بئیگئے زمانت اِبراهێمئے سجّهێن نَسل و پَدرێچا دئیگ ببیت. اے واده تهنا په شَریَتئے رَندگیرانَ نبیت، په آیان هم بیت که اِبراهێمئے ایمانا شریکدار اَنت، پرچا که اِبراهێم مئے سجّهێنانی پت اِنت. 17اَنچُش که نِبیسگ بوتگ: ”من ترا بازێن کئومێئے پت کرتگ.“#4‏:17 پێدائِش 17‏:5. گڑا، هُدائے چمّان اِبراهێم مئے پت اِنت، هما اِبراهێم که هُدائے سرا باوَری هست‌اَت که هُدا مُردگان زِندگَ کنت و هما چیزّ که نێست‌اَنت، آیان گْوانکَ جنت و هستَ کنت.

18وهدے هچّ اُمێتے نێست‌اَت، اِبراهێما گۆن اُمێتواری باور کرت که بازێن کئومێئے پِتَ بان. اَنچُش که هُدایا گۆن اِبراهێما گوَشتگ‌اَت: ”تئیی نَسل و پدرێچ اِستارانی کِساسا بازَ بنت.“#4‏:18 پێدائِش 15‏:5. 19اِبراهێما وتی بێساهێن بدن چارت، که آییا کِساس سَد سال اَت، و سارَهئے سَنٹی و بێچُکّی‌ای هم دیست، بله اَنگت آییئے ایمان نِزۆر نبوت. 20هُدائے وادهئے سرا اِبراهێم ناباور نبوت و شَکّی نکرت، آ وتی ایمانئے سرا مُهر اۆشتات و هُدائے ستا و سناای کرت. 21دلجم اَت که هُدایا اے واک#4‏:21 واک، بزان زۆر، تاکت. و توان هست که وتی وادَها پوره بکنت. 22پمێشکا چه هُدائے نێمگا ”راستاور هساب بوت“. 23پاکێن کتابئے اے لبز که ”هِساب بوت“ تهنا په اِبراهێما نِبیسگ نبوتگ، 24په ما هم نِبیسگ بوتگ. ما هم چه هُدائے نێمگا راستاور هسابَ بێن، ما که هُدائے سرا باورَ کنێن که آییا مئے هُداوندێن ایسّا چه مُردگان زندگ کرت. 25ایسّا په مئے ناپرمانیان مَرکئے دستا دئیگ بوت و په مئے راستاور بئیگا، چه مُردگان زندگ کنگ بوت.

Currently Selected:

پولُسئے کاگد په رومیان 4: HPKB

Highlight

Copy

Compare