دَرگوَز 7

1گڑا هُداوندا گۆن موسّایا گوَشت: ”بچار، من ترا په پِرئونا چۆ هُدایا کرتگ و تئیی برات هارون تئیی نبیَ بیت. 2هرچے که ترا هُکمَ کنان، هما پئیم گوَشان کن. تئیی برات هارون باید اِنت گۆن پِرئونا بگوَشیت که اِسراییلیان چه وتی مُلکا رئوگا بِلّ. 3بله من پِرئونئے دلا سِنگَ کنان. من مِسرئے مُلکا بازێن اجبّتێن نشانی و مۆجزهے پێشَ داران، 4بله پِرئون شمئے هبران گۆشَ نداریت. من وتی دستا مِسرئے هِلاپا چِستَ کنان، مِسریان گرانێن سِزا دئیان و وتی اِسراییلی کئوما رُمب رُمبا چه مِسرا کشّان. 5وهدے وتی دستا مِسرئے هِلاپا چِستَ کنان و بنی اِسراییلا چه مِسریانی نیاما کشّان، نون مِسریَ زاننت که من هُداوند آن.“

6موسّا و هارونا اَنچُش کرت. هما پئیما که هُداوندا هُکم داتگ‌اَتنت، آیان هما پئیما کرت. 7اے وهدا که آیان گۆن پِرئونا هبر کرت، موسّائے اُمر هشتاد سال اَت و هارونئے هشتاد و سئے.

هارونئے اَسا

8هُداوندا گۆن موسّا و هارونا گوَشت: 9”پِرئون که شمارا گوَشیت: ’مۆجزهے پێش بدارێت‘ گڑا تئو هارونا بگوَش: ’وتی اَسایا بزور و پِرئونئے دێما زمینا دئوری دئے.‘ اَسا مارے بیت.“

10موسّا و هارون پِرئونئے کرّا شتنت و هما پئیما که هُداوندا هُکم داتگ‌اَتنت، هما پئیما کرتِش. هارونا وتی اَسا پِرئون و آییئے هِزمتکارانی دێما زمینا دئور دات و اَسا مارے بوت. 11گڑا پِرئونا دانا و ساهِر لۆٹاێنتنت و اے مِسری جادوگران گۆن وتی جادوا همے کار کرت. 12چه آیان هر یکّێا وتی اَسا زمینا دئور دات و آیانی اَسا مار بوتنت. هارونئے اَسایا آیانی اَسا وارت و اێر برتنت. 13بله اَنچۆ که هُداوندا گوَشتگ‌اَت، پِرئونئے دل اَنگت سِنگ اَت و آیانی هبری گۆش نداشتنت.

ائولی کَهر: هۆن

14هُداوندا گۆن موسّایا گوَشت: ”پِرئونئے دل سِنگ اِنت و مردمان رئوگا نئیلیت. 15سُهبا که پِرئون آپئے کرّا رئوت، تئو برئو و نیلّئے کئورئے لمبا آییئے راهئے سرا بۆشت و مار بوتگێن اَسایا دستا کن. 16گۆن پِرئونا بگوَش: ’هُداوندا، بزان اِبرانیانی هُدایا منا تئیی کرّا راه داتگ که ترا بگوَشان: ”منی مهلوکا بِلّ که گیابانا رئوت و منا پرستشَ کنت،“ بله تئو اَنگت گۆش دارگا نه‌ائے. 17هُداوند چُشَ گوَشیت که تئوِ پِرئون چه اے نِشانیا زانئے که من هُداوند آن: بِچار، اے اَسا که منِ موسّائے دستا اِنت، من اِشیا کئورئے آپا جنان و آپ هۆن جۆڑَ بنت. 18کئورئے ماهیگَ مرنت، کئور بۆَ کنت و مِسری کئورئے آپا وارتَ نکننت.‘“

19هُداوندا گۆن موسّایا گوَشت: ”هارونا بگوَش: ’وتی اَسایا دستا کن و دستا مِسرئے آپانی سرا شهار دئے، آیانی کئورانی سرا، آیانی جۆانی سرا، آیانی تَلاوَگانی#7‏:19 تَلاوَگ بَندے که په آپئے جَم کنگ و دارگا اَڈّ کنگَ بیت. سرا و آیانی سجّهێن آپجلّانی سرا. اِشانی تهئے سجّهێن آپ هۆن جۆڑَ بنت. سجّهێن مِسرئے مُلک هۆنا پُرَّ بیت، آپدان هم چه هۆنا پُرَّ بنت.‘“

20موسّا و هارونا هما پئیما کرت که هُداوندا هُکم داتگ‌اَتنت. هارونا#7‏:20 اَسلیگێن اِبرانی نِبشتانکَ گوَشیت: آییا پِرئون و هِزمتکارانی چمّانی دێما وتی اَسا چست کرت... پَکّا زانگَ نبیت که آ کئے اَت، هارون اَت یا موسّا. پِرئون و هِزمتکارانی چمّانی دێما وتی اَسا چست کرت و کئورئے آپانی سرا جت. کئورئے سجّهێن آپ هۆن جۆڑ بوتنت. 21کئورئے ماهیگ مُرتنت، کئورا بۆ کرت و مِسریان کئورئے آپ وارت نکرت. سجّهێن مِسرئے مُلکا هۆن تچگا اَت.

22بله مِسری جادوگران هم گۆن وتی جادوا همے کار کرت و هما پئیما که هُداوندا گوَشتگ‌اَت، پِرئونئے دل سِنگ اَت و موسّا و هارونئے هبری گۆش نداشتنت. 23پِرئونا پُشت مان دات و وتی کلاتا شت و اے گپّی هچّ مان نئیاورت. 24سجّهێن مِسریان په ورگی آپا کئورئے کَش و کرّان کانیگ#7‏:24 کانیگ کَسانێن کَنڈے که په آپئے درَ کنَگا جننتی. جنَگ بندات کرت، چێا که کئورئے آپِش وارتَ نکرت.

دومی کَهر: پُگُل

25چه آ وهدا که هُداوندا نیلّئے کئورئے سرا اے کَهر دئور دات، هپت رۆچ گوَست.

Currently Selected:

دَرگوَز 7: HPKB

Highlight

Copy

Compare