دَرگوَز 6

اِسراییلئے نِجات

1هُداوندا گۆن موسّایا گوَشت: ”نون تئو گندئے که من گۆن پِرئونا چے کنان. پِرئون منی زۆرمندێن دستا که گِندیت، مهلوکا رئوگا کِلّیت. هئو، منی زۆرمندێن دستا که گِندیت، آیان چه وتی مُلکا گَلّێنیت.“

2هُدایا گۆن موسّایا هبر کرت، گوَشتی: ”من هُداوند آن. 3من که اِبراهێم و اِساک و آکوبئے دێما زاهر بوتان، من وتی نام ’پُرواکێن هُدا‘ کرت. من آ هال نداتنت که منی نام ’یَهوِه‘#6‏:3 یَهوِه، اِبرانی زُبانا هُداوندئے نام اِنت. اے لَبز چه ”بئیگئے“ لَبزا جۆڑ بوتگ. پاکێن کتابئے گێشتر تَرجُمَهان اے لبز ”هُداوند“ کرتگ. اِنت. 4من گۆن آیان اَهد و پئیمان هم کرت که کَنهانئے مُلکا شمارا دئیان، بزان هما مُلکا که اۆدا آ، دَرامدئے پئیما نِشتگ‌اَتنت. 5من دیستگ که مسریان اِسراییلی گُلام کرتگ‌اَنت و اسراییلی چه اے گُلامیا نالَگا اَنت. من اے نالَگ اِشکتگ‌اَنت و وتی اَهد و پئیمانئے یاتا کپتگان. 6پمێشکا منی اے پئیگاما اِسراییلیان سَر کن: ’من هُداوند آن. من شمارا چه مِسریانی بیگاریا کشّان و چه گُلامیا آزاتَ کنان. دستا شهارَ دئیان، مِسریان گرانێن سِزا دئیان و شمارا مۆکان#6‏:6 مۆکَگئے مانا اِدا اِش اِنت که په کَسێئے جانئے رَکّێنگا گرانێن کیمّتے دئیگ ببیت، پارسیا ”بازخرید“.. 7من شمارا زوران و وتی کئومَ کنان و شمئے هُدا بان. گڑا شما زانێت که من شمئے هُداوندێن هُدا آن، هما که شمارا چه مِسریانی بیگاریا دری کرتگ. 8من شمارا هما مُلکا بران که وتی دستُن چِست کرت و سئوگندُن وارت که اِبراهێم و اِساک و آکوبا دئیانی. من آ مُلکا شمارا دئیان که شمئے جندئے مِلکت ببیت. من هُداوند آن.‘“

9موسّایا گۆن اِسراییلیان اے هبر کرتنت، بله وتی پرُشتگێن اَرواه و گرانێن زهمتانی سئوَبا موسّائے هبرِش گۆش نداشت. 10هُداوندا گۆن موسّایا گوَشت: 11”برئو و مِسرئے بادشاه پِرئونا بگوَش که اِسراییلیان چه وتی مُلکا رئوگا بِلّ.“ 12بله موسّایا گۆن هُداوندا گوَشت: ”منی هبر اِسراییلیان گۆش نداشتگ‌اَنت، گڑا پِرئونِش چۆن گۆشَ داریت؟ من وَه کُنٹ‌بئیانێن مردمے آن.#6‏:12 اَسلیگێن اِبرانی نبشتانکَ گوَشیت: ”منی لُنٹ سُنّت نبوتگ‌اَنت.“ “ 13هُداوندا گۆن موسّا و هارونا هبر کرت و هُکم داتنت که گۆن اِسراییلیان و گۆن مِسرئے بادشاه پِرئونا هبر بکنێت و اِسراییلیان چه مِسرئے مُلکا بکَشّێت.

موسّا و هارونئے بێه و بُنیاد

14اِسراییلیانی کَبیلهانی سر و مستر اِش اَنت:

اِسراییلئے ائولی چُکّ روبِنئے مردێن‌چُکّ هَنوک و پَلّو و هِسرون و کَرمی اَتنت. روبِنئے ٹَکّ#6‏:14 ٹَکّ، بزان تائِپه، زهی، کَبیلهئے شاهَڑے. همِش اَتنت.

15شَمونئے مردێن‌چُکّ یَموێل و یامین و اوهَد و یاکین و سۆهَر و شاوول اَتنت. شاوولئے مات کَنهانیے اَت. شَمونئے ٹَکّ همِش اَتنت.

16لاویئے مردێن‌چُکّانی نام، آیانی پێدائشئے رِد و بندئے هسابا اِش اَنت:

گِرشۆن و کُهات و مِراری. لاویا 137 سال اُمر کرت.

17گِرشۆنئے مردێن‌چُکّ لِبنی و شِمّی اَتنت، وتی ٹَکّانی هسابا.

18کُهاتئے مردێن‌چُکّ اَمرام و اِسار و هِبرون و اُزّێل اَتنت. کُهاتا 133 سال اُمر کرت.

19مِراریئے مردێن‌چُکّ مَهلی و موشی اَتنت. لاویئے ٹَکّ، آیانی پێدائشئے رِد و بندئے هسابا همِش اَتنت.

20اَمراما گۆن وتی پتئے گُهار یوکِبێدا سور کرت و هارون و موسّا چه یوکِبێدا پێدا بوتنت. اَمراما 137 سال اُمر کرت.

21اِسارئے مردێن‌چُکّ کۆرا و نِپِگ و زِکری اَتنت.

22اُزّێلئے مردێن‌چُکّ میشاێل و اِلساپان و سِتری اَتنت.

23هارونا گۆن اِلیشِبَها سور کرت. اِلیشِبَه اَمینادابئے جنکّ اَت و نَهشونئے گُهار. هارونئے مردێن‌چُکّ ناداب و اَبیهو و اِلیازَر و ایتامار چه اِلیشِبَها پێدا بوتنت.

24کۆرائے مردێن‌چُکّ اَسّیر و اِلکانا و اَبیاساپ اَتنت. کۆراییانی ٹَکّ همِش اَتنت. 25هارونئے مردێن‌چُکّ اِلیازَرا گۆن پوتیهێلئے جنێن‌چُکّێا سور کرت و چه اے جنکّا پینِهاس پێدا بوت. لاویانی سر و مستر همِش اَتنت، وتی ٹَکّانی هسابا.

26همے هارون و موسّا اَتنت که هُداوندا گۆن آیان گوَشت: ”اِسراییلیان چه مِسرا رُمب رُمبا بکشّێت.“ 27اے دوێنان، همے موسّا و هارونا گۆن مِسرئے بادشاه پِرئونا هبر کرت که اِسراییلی چه مِسرا آزات کنگ ببنت.

په پِرئونا هُدائے هُکم

28آ رۆچا که هُداوندا مِسرئے مُلکا گۆن موسّایا هبر کرت، 29چُشی گوَشت: ”من هُداوند آن، هرچے که ترا گوَشان، مِسرئے بادشاه پِرئونا بگوَشِش.“ 30بله موسّایا گۆن هُداوندا گوَشت: ”من کُنٹ‌بئیانێن مردمے آن،#6‏:30 اَسلیگێن اِبرانی سیاهگَ گوَشیت: ”منی لُنٹ سُنّت نبوتگ‌اَنت.“ پِرئون چۆن منی هبران گۆشَ داریت؟“

Currently Selected:

دَرگوَز 6: HPKB

Highlight

Copy

Compare