دَرگوَز 8

1نون هُداوندا گۆن موسّایا گوَشت: ”پِرئونئے کرّا برئو و گۆن آییا بگوَش: ’هُداوند چُشَ گوَشیت: ”منی مهلوکا بِلّ که رئوت و منا پرستشَ کنت. 2اگن منی مهلوکا رئوگا مئیلئے، بِچار، من تئیی سجّهێن مُلکئے سرا پُگُلئے کَهرے دئورَ دئیان. 3نیلّئے کئور چه پُگُلا پُرَّ بیت. پُگُل چستَ بنت و تئیی لۆگا کاینت، تئیی وابجاها پُتِرنت و تَهتا سرَ کپنت، تئیی هِزمتکار و مردمانی لۆگان هم کاینت، تئیی تَرون و آرت تَرّ کنگئے دَرپانی تها دئورَ کننت. 4پُگُل تئیی جند و تئیی مردم و تئیی سجّهێن هِزمتکاران پِرَ رِچنت.“‘“

5هُداوندا پدا گۆن موسّایا گوَشت: ”هارونا بگوَش: ’وتی اَسایا دستا کن و دستا کئور و جۆ و تَلاوَگانی سرا شهار دئے و مِسرئے مُلکا چه پُگُلا پُرّ کن.‘“ 6هارونا وتی دست مِسرئے آپانی سرا شهار دات، پُگُل در آتک و مِسرئے مُلکا مان رِتکنت. 7بله جادوگران هم گۆن وتی جادوا اَنچُش کرت و پُگُل چه آپان در آتک و مِسرئے مُلکا شِنگ بوتنت.

8پِرئونا موسّا و هارون لۆٹاێنتنت و گوَشتی: ”هُداوندئے کرّا دْوا کنێت که پُگُلان چه من و منی مردمان دور ببارت. من شمئے مهلوکا رئوگا کِلّان که په هُداوندا کُربانیگ بکنت.“ 9موسّایا گۆن پِرئونا گوَشت: ”جی، هُکم کن. کدی په تئو و په تئیی هِزمتکار و مردمان دْوا بکنان که پُگُل چه تئو و چه تئیی لۆگان گار و بێگواه ببنت و تهنا کئورا بجَلّنت؟“ 10‏-11پِرئونا گوَشت: ”باندا.“ موسّایا گوَشت: ”اَنچُشَ بیت که تئو گوَشئے. پُگُل چه تئو و تئیی لۆگان، چه تئیی هِزمتکار و مردمان دورَ بنت و تهنا کئورا جَلّنت، تانکه تئو بزانئے که مئے هُداوندێن هُدائے مَٹّ نێست.“

12موسّا و هارون چه پِرئونئے کرّا شُتنت. موسّایا هُداوندئے کِرّا پریات کرت، هما پُگُلانی بارئوا که هُداوندا پِرئونئے چَکّا دئور داتگ‌اَتنت. 13هُداوندا موسّائے دْوا گۆش داشت و پُگُل، لۆگ و پێشگاه#8‏:13 پێشگاه، بزان پێشجاه، پێژگاه، لۆگئے چاردیوال، سَهن. و ڈگاران مُرتنت. 14پُگُلِش کۆت کۆتا#8‏:14 کۆت، بزان سر په سر کرتگێن چیزّ. مُچّ کنان کرتنت. زمین بۆ گِپت. 15وهدے پِرئونا دیست که چه اے کَهرا جان چُٹِّت، هما پئیما که هُداوندا گۆن موسّایا گوَشتگ‌اَت، پِرئونا وتی دل سِنگ کرت و موسّا و هارونئے هبری گۆش نداشتنت.

سئیمی کَهر: پَشّگ

16هُداوندا گۆن موسّایا گوَشت: ”هارونا بگوَش: ’وتی اَسایا شهار دئے و زمینئے هاکان بجن که سجّهێن مِسرا پَشّگ مان برچیت.‘“ 17آیان اَنچُش کرت. هارونا وتی دست گۆن اَسایا شهار دات و زمینئے هاکی جتنت. سجّهێن مِسرا، زمینئے هاک بدل بوت و پَشّگ بوتنت و مردم و جانوَران پِر رِتکنت. 18جادوگران گۆن وتی جادوا وَس کرت که پَشّگ بیارنت، بله آورتِش نکرت. پَشّگ مردم و جانوَران پِر لِچِّتگ‌اَتنت. 19جادوگران گۆن پِرئونا گوَشت: ”اے هُدایی کارے#8‏:19 اَسلیگێن اِبرانی نبشتانکَ گوَشیت: ”اے هُدائے لنکُک اِنت.“.“ بله هما پئیما که هُداوندا گوَشتگ‌اَت، پِرئونئے دل سِنگ اَت و موسّا و هارونئے هبری گۆش نداشتنت.

چارُمی کَهر: مَکِسک

20هُداوندا گۆن موسّایا گوَشت: ”سهبا ماهلّه پاد آ و وهدے پِرئون دێم په آپا رئوت، آییئے دێما در آ و بگوَشی: ’هُداوند چُشَ گوَشیت: ”منی مهلوکا بِلّ که رئوت و منا پرستشَ کنت. 21چێا که اگن منی مهلوکا رئوگا مئیلئے، بِچار، من ترا و تئیی هِزمتکار و تئیی مردمان و تئیی لۆگان مَکِسک‌گرَندَ#8‏:21 مَکِسک‌گرَند، بزان سکّ باز مَکِسک. کنان. مِسریانی لۆگ چه مکسکا پُرَّ بنت و هما زمین هم که اۆدا آیانی لۆگ بَستگ‌اَنت. 22بله آ رۆچا من گۆشِنئے دَمگا#8‏:22 دَمگ، بزان هَند، اِلاکه، اُستان، سوبَه. که اۆدا منی مهلوک نِشتگ، اے کَهرا نئیاران. اۆدا مَکِسک‌گرَندَ نبیت. اے پئیما تئو زانئے که اے مُلکا هُداوند من آن. 23من وتی مهلوک و تئیی مهلوکئے نیاما پرک و پێرَ#8‏:23 پرک و پێر، بزان رو و ریا، یکّێا شَرتر و یکّێا هَرابتر زانَگ. کنان و اے نشانی باندا زاهرَ بیت.“‘“

24هُداوندا اَنچُش کرت. مَکِسکانی سِهر#8‏:24 سِهر، بزان بالی سَهدارانی مزنێن رُمب. پِرئون و آییئے هِزمتکارانی لۆگان پِر رِتکنت. مَکِسکان سجّهێن مِسر تباه کرت.

25پِرئونا موسّا و هارون لۆٹاێنت و گوَشتنت: ”برئوێت و په وتی هُدایا کُربانیگ بکنێت، بله همے مُلکئے تها.“ 26بله موسّایا گوَشت: ”ما چۆ کرتَ نکنێن. چێا که ما په وتی هُداوندێن هُدایا اَنچێن کُربانیگَ کنێن که په مِسریان بَژّناک اَنت. اگن ما مِسریانی چمّانی دێما اَنچێن کُربانیگ بکنێن که په آیان بَژّناک اَنت، مارا سِنگسارَ نکننت؟ 27ما باید اِنت گیابانا سئے رۆچئے راها برئوێن و په وتی هُداوندێن هُدایا کُربانیگ بکنێن، هما پئیما که هُدایا مارا گوَشتگ.“ 28پِرئونا گوَشت: ”من شمارا رئوگا کِلّان که گیابانا په وتی هُداوندێن هُدایا کُربانیگ بکنێت. بله سکّ دور مرئوێت و په من هم دْوا کنێت.“ 29موسّایا گوَشت: ”بِچار، من چه تئیی کِرّا درَ کایان و هُداوندئے بارگاها دْوا کنان. باندا مَکِسک چه تئوِ پِرئون و تئیی هِزمتکار و مردمان دورَ کاینت. بله چۆ مبیت که تئوِ پِرئون پدا مَکر و پرێب بکنئے و مردمان مئیلئے که برئونت و په هُداوندا کُربانیگ بکننت.“

30موسّا چه پِرئونئے کرّا در آتک و هُداوندئے بارگاها دْوایی کرت و 31هُداوندا موسّائے دْوا گۆش داشت. مَکِسکان چه پِرئون و آییئے هِزمتکار و مردمانی کرّا بال کرت. یکّ دانَگے مَکِسک هم پَشت نکپت. 32بله اے رندی پدا پِرئونا وتی دل سِنگ کرت و مردمی رئوگا نه‌اِشتنت.

Currently Selected:

دَرگوَز 8: HPKB

Highlight

Copy

Compare