دَرگوَز 5

مهلوکئے بزّگی

1رندا موسّا و هارون شتنت و گۆن پِرئونا گوَشتِش: ”یَهوِه#5‏:1 یَهوِه، اِبرانی زُبانا هُداوندئے نام اِنت. اے لَبز چه ”بئیگئے“ لَبزا جۆڑ بوتگ. پاکێن کتابئے گێشتر تَرجُمَهان اے لبز ”هُداوند“ کرتگ. ، اِسراییلئے هُدا چُشَ گوَشیت: ’منی مهلوکا بِلّ که گیابانا رئوت و په من جَشنے کنت.‘“ 2بله پِرئونا گوَشت: ”یَهوِه کئے اِنت که من آییئے گپّا گۆش بداران و بنی اِسراییلا رئوگا بِلّان؟ من یَهوِها نزانان و بنی اِسراییلا رئوگا نئیلان.“

3آیان گوَشت: ”اِبرانیانی هُدا مئے دێما زاهر بوتگ. نون مارا بِلّ که گیابانا سئے رۆچئے راها رئوێن و په وتی هُداوندێن هُدایا کُربانیگَ کنێن. چۆ مبیت که گۆن وَبا یا زهما مئے سرا بکپیت.“ 4بله مِسرئے بادشاها گوَشت: ”موسّا! هارون! شما چێا مردمان کارا نئیلێت؟ برئوێت و وتی بیگاریا بکنێت.“ 5پدا گوَشتی: ”بچار، انّون اے مُلکا اسراییلی سکّ باز اَنت بله شما کارا نئیلێتِش.“

6هما رۆچا پِرئونا مردمانی بیگارگیر و کارمستر هُکم دات و گوَشتنت: 7”پێسرا په هِشتئے جنَگا شما مردمانا پَلار#5‏:7 پَلار، بزان کِشارئے هُشک بوتگێن ڈیلّ، کاهسپێت. داتگ، نون مدئیێتِش. بِلّی وتَ رئونت و پَلارَ چِننت. 8بله چه آیان هِشت هما کِساسا بلۆٹێت که پێسرا جتَگِش، هچّ کمّ مکنێت. اے مردم جاندُزّ و تَمبَل اَنت، پمێشکا پریاتَ کننت: ’مارا بِلّ که رئوێن و په وتی هُدایا کُربانیگَ کنێن.‘ 9آیان اَنگت گرانترێن کار بپرماێت که وتی کارا دَزگَٹّ ببنت و درۆگێن هبرانی نێمگا دلگۆش مکننت.“

10مردمانی بیگارگیر و کارمستر ڈنّا شتنت و گۆن مردمان گوَشتِش: ”پِرئون چُشَ گوَشیت: ’من شمارا پَلارَ ندئیان.‘ 11شما وت برئوێت و پَلار بچِنێت، هر جاگه که دَر گێتکَ کنێت. بله چه شمئے کارا تُشے کمَّ نبیت.“

12مردم سجّهێن مِسرئے مُلکا شِنگ بوتنت که په هِشتئے جنَگا پَلار بچِننت. 13بیگارگیران کَڈّن#5‏:13 کَڈَّن، بزان مُهرێن تاکید، هُکم. کرت و گوَشتنت: ”وتی همُک رۆچی گیشّێنتگێن کارا هما وهدئے پئیما سَرجم بکنێت که شمارا پَلار بوتگ.“ 14پِرئونئے بیگارگیران وتی داشتگێن اِسراییلی کارمستر جت و جُست کرتنت: ”شمئے زیکّێن و مرۆچیگێن هِشت چێا پێسریگێن کِساسا نه‌اَنت؟“

15اِسراییلی کارمستر شتنت و پِرئونئے کرّا پریاتِش کرت: ”تئو چێا گۆن وتی کَستران چۆ کنگا ائے؟ 16تئیی کَستران پَلارَ ندئینت و اَنگت مارا گوَشنت: ’هِشت بجنێت.‘ بچار، رَدی تئیی مردمانیگ اِنت، لَٹّان ما ورگا اێن.“ 17پِرئونا گوَشت: ”شما جاندُزّ و تَمبَل اێت، جاندُزّ اێت، پمێشکا گوَشێت: ’مارا بِلّ که رئوێن و په هُداوندا کُربانیگَ کنێن.‘ 18نون برئوێت و کار کنێت. شمارا پَلار دئیگَ نبیت، بله هِشت هما کِساسا بجنێت.“

19اِسراییلی کارمستران زانت که ما جنجالێا کپتگێن که مارا گوَشنت شمئے جتگێن هِشت چه هر رۆچیگێن گیشّێنتگێن کِساسا کَمتر مبنت. 20وهدے کارمستر چه پِرئونئے کِرّا در آتکنت، گۆن موسّا و هارونا ڈیکِّش وارت. موسّا و هارون آیانی ودارا اَتنت. 21گۆن آیان گوَشتِش: ”هُداوند شمارا مئے هَکّانی جُستا بکنات و وت اِنساپ بکنات. شما پِرئون و آییئے هِزمتکارانی چمّان مارا سْیَه‌رو کناێنتگ و په مئے کُشگا زهمے آیانی دستا داتگ.“

22موسّا پدا هُداوندئے کِرّا شت و گوَشتی: ”او هُداوند! تئو چێا اے مهلوک جنجالێا دئور دات؟ تئو پمێشکا منا راه دات؟ 23من پِرئونئے کرّا شُتان که تئیی نامئے سرا گۆن آییا هبر بکنان، بله چه آ رۆچا و رند پِرئونا تئیی مهلوک گَنتر جنجال کرتگ و تئو په مهلوکئے رَکّێنگا هچّ نکرتگ.“

Currently Selected:

دَرگوَز 5: HPKB

Highlight

Copy

Compare