دَرگوَز 24

گۆن اِسراییلا هُدائے اَهد و پئیمان

1هُدایا گۆن موسّایا گوَشت: ”بُرزاد، منِ هُداوندئے بارگاها بیا. تئو و هارون و ناداب و اَبیهو و اِسراییلئے هپتاد کماش بیاێت و چه دورا پرستش کنێت. 2اێوکا تئوِ موسّا منِ هُداوندئے کرّا بیا. آ دگه مردم نزّیکّا مئیاینت. مهلوک هم تئیی همراهیا بُرزاد مئیئیت گۆن.“

3موسّا آتک و هُداوندئے سجّهێن هبر و پرمانی مردمانا سر کرتنت. سجّهێن مهلوکا په همتئواری گوَشت: ”هُداوندا هرچے که گوَشتگ، ما اَنچُشَ کنێن.“ 4موسّایا هُداوندئے سجّهێن هبر نبشته کرتنت.

موسّا سُهبا ماهلّه پاد آتک، کۆهئے بُنا کُربانجاهے اَڈّی کرت و په اِسراییلئے دوازدهێن کَبیلهان دوازده سِنگی مِکّ کرت. 5بنی اِسراییلئے ورنایی راه داتنت، آیان کاییگر#24‏:5 کاییگر، بزان مزنێن نَرێن گۆک. زرت و په هُداوندا سۆچَگی کُربانیگ و همدلیئے کُربانیگِش کرت. 6موسّایا هۆنانی نێم تَگاران کرت و آ دگه نێمی کُربانجاهئے سرا دْرَنزِتنت. 7اَهد و پئیمانئے کتابی زرت و مردمانی دێما وانتی. آیان گوَشت: ”هرچے که هُدایا گوَشتگ، ما هما پئیما کنێن و پرمانبردارَ بێن.“ 8موسّایا هۆن زرت، مهلوکئے سرا دْرَنزِت و گوَشتی: ”اے سجّهێن وانتگێن هبر هما اَهد و پئیمانئیگ اَنت که هُداوندا گۆن شما بستگ و اے همے اَهد و پئیمانئے هۆن اَنت.“

9موسّا و هارون و ناداب و اَبیهو و اِسراییلئے هپتادێن کماش بُرزا سر کپتنت 10و اِسراییلئے هُدااِش دیست. هُدائے پادانی چێرا سَبزێن نیلُمئے پئیمێن پَرشے اَت که چۆ آسمانئے جندا ساپ اَت. 11هُدایا اِسراییلیانی سرۆک تاوان نداتنت. آیان هُدا دیست و همۆدا ورگ و چرگِش وارت.

موسّا هُدائے شان و شئوکتا گِندیت

12هُداوندا گۆن موسّایا گوَشت: ”کۆها سر کپ، منی کرّا بیا و کَمّے همِدا بجَلّ که من ترا وانِکانَ دئیان که اِشانی سرا من په کئومئے سر و سۆجا شَریَت و پرمان نبشته کرتگ‌اَنت.“ 13موسّا و آییئے کُمَک‌کار یوشا راه گپتنت. موسّا هُدائے کۆها سر کپت. 14بله پێسرا گۆن اِسراییلئے کماشان گوَشتی: ”تانکه ما شمئے کِرّا واترَّ نکنێن، همِدا بجَلّێت. بچار، هارون و اَهور شمئے کِرّا اَنت. هرکَسا جێڑهے بوت، همِشانی کرّا برئوت.“ 15موسّا کۆها سر کپت و جمبرا کۆه سرپۆش کرت. 16هُداوندئے شان و شئوکتا سینائے کۆهئے سرا هَنکێن کرت و جمبرا کۆه تان شش رۆچا سرپۆش کرت. هپتمی رۆچا هُداوندا چه جمبرئے نیاما موسّا گْوانک جت. 17اِسراییلیانی چمّان هُداوندئے شان و شئوکتئے درۆشم پِلِکّۆکێن#24‏:17 پِلِکّۆک، بزان اێر برۆک. آسئے پئیما اَت که کۆهئے ٹُلّا جَمبور اَت. 18موسّا کۆها سر کپت و جمبرئے تها شت و تان چِلّ شپ و چِلّ رۆچا همۆدا جَلِّت.

Currently Selected:

دَرگوَز 24: HPKB

Highlight

Copy

Compare