دَرگوَز 25

په تَمبوئے اَڈّ کنگا شُگرانه

1هُداوندا گۆن موسّایا گوَشت: 2”گۆن اِسراییلیان بگوَش که په من شُگرانه بیارێت. چه هما سجّهێن مردمان شُگرانه بزورێت که دلِشَ پَرماییت. 3چه مردمان اے شُگرانهان بگرێت: تلاه، نُگره، بْرنج، 4آسمانی و جَمو و سُهرێن پَژم، شَرّێن لیلُم#25‏:4 لیلُم، گُدئے تَهرے که اِنگرێزیا ”linen“ گوَشگَ بیت.، بُزئے مود، 5گوَرانڈئے رَتکگێن#25‏:5 رَتکگێن، بزان رَجِتگێن، رنگ داتگێن. سُهرێن پۆست، دگه پئیمێن مُهرێن پۆست، چِگردئے دار، 6په چراگان ٹێل، په پِر مُشَگی رۆگن و وشبۆێن سۆچُکیا مَساله و 7په اێپۆد#25‏:7 اێپۆد اسراییلی مسترێن دینی پێشوائے پۆشاکے اَت. و سێنَگ‌پۆشا سِنگِ سُلئیمان و دگه گران‌کیمّتێن سِنگ. 8په من پاکێن جاگهے اَڈّ بکننت که من آیانی نیاما جَهمنند ببان. 9تَمبو#25‏:9 تَمبو، بزان هئیمَه، گِدان. و تَمبوئے تَهئے سجّهێن سامانان هما پئیما اَڈّ بکننت که من ترا پێشَ داران.

شاهدیئے پێتی

10چه چِگردئے دارا پێتیے#25‏:10 پێتی، بزان سندوک. اَڈّ بکننت که دْراجیا دو و نێم دست#25‏:10 یکّ دست دو بِچیلّ اِنت، بزان نێم میتر. ببیت، پْراهیا یکّ و نێم دست و بُرزیا هم یکّ و نێم دست. 11پێتیا چه ڈنّا و تها گۆن زَگرێن#25‏:11 زَگر، بزان اَسیل، هالِس. تلاها سرپۆش کن. گِرداگِرد تلاهێن پَٹّیے پِری کن. 12په پێتیا تلاهئے چار کَڑی اَڈّ کن و پێتیئے چارێن پادَگان لِچّێنِش، دو کَڑی یکّ نێمگێا و دو آ دگه نێمگا. 13چه چِگردئے دارا دو گوَرباسک#25‏:13 گوَرباسک، بزان تَهتئے کَشئے دراجێن دار. اَڈّ کن و گۆن تلاها سرپۆشِش کن. 14په پێتیئے چست کنگا گوَرباسکان چه پێتیئے کَشئے کَڑیان بگوازێن. 15گوَرباسک پێتیئے کڑیان ببنت و چه کڑیان در کنگ مبنت. 16شاهِدیئے وانِکان#25‏:16 وانِک، بزان مزنێن پتنێن سِنگ، وانگ. شاهِدیئے وانِکانی سرا هُدائے دهێن پرمان نبشته اتنت. که من ترا دئیان، همے پێتیا مانِش کن.

17چه زَگرێن تلاها کَپارَتے#25‏:17 اِبرانی زُبانا کَپارَتئے مانا سرپۆش اِنت. اِدا په گناهانی شۆدگ و سرپۆش کنگا کارمرز بوتگ، بزان په چیزّێئے مۆکگا. گناهانی شۆدگ دگه کارے و سرپۆشی دگه کارے، بله کَپارَتئے تها دوێن مانا هئوار اَنت. اَڈّ کن و پێتیا سرپۆش کن. دْراجیا دو و نێم دَست ببیت و پْراهیا یکّ و نێم دَست. 18تِلاهئے دو کَرّوبی#25‏:18 کَرّوبی، آسمانی مهلوکے که بانزُلِش پِر و هُدائے تَهتئے چَپّ و چاگِردا اَنت. اَڈّ کن، تلاها بزور و ٹَپّ و اَڈِّش کن. اے کَرّوبیان سرپۆشئے دوێن سَران اَڈّ کن، 19یکّ کَرّوبیے سرپۆشئے یکّ سرێا اَڈّ کن و آ دگه کَرّوبیا دومی سرا. سرپۆش و دوێن سرانی کَرّوبیان جتا جتا اَڈّ مکن، اے یَک‌ٹُکُّر ببنت. 20کَرّوبیانی دێم گۆن یکدومیا ببیت و چمِّش گۆن سرپۆشا. بانزُلِش بُرزادیا پَچ ببنت و سرپۆشا ساهێل بکننت. 21سرپۆشا پێتیئے سرا اێر کن و هما شاهِدیئے وانِکان که من ترا دئیان، آیان پێتیئے تها کن. 22من همۆدا تئیی دێما زاهِرَ بان و گۆن تئو هبرَ کنان، چه سرپۆشئے بُرزا، چه شاهدیئے پێتیئے سرئے دوێن کَرّوبیانی نیاما اِسراییلیانی بارئوا هر پرمانے که هست، ترا گوَشانِش گۆن.

ٹێبَل

23چه چِگردئے دارا ٹێبَلے اَڈّ کن. دْراجیا دو دَست ببیت، پْراهیا یکّ دَست و بُرزیا یکّ و نێم دَست. 24گۆن زَگرێن تلاها سرپۆشی کن و تلاهئے پَٹّیے اَڈّ کن و چارێن نێمگان پِری کن. 25ٹێبَلئے سَربری تَهتَگا، چارێن نێمگان تلاهئے پَٹّیے پِر کن و تَهتَگئے چێرا چارێن نێمگان یکّ پَنجَگێئے پْراهیئے کَدّێن کابے#25‏:25 کاب، بزان چارچۆبه، چارچۆبَگ، چارکُنڈێن چۆکاٹ که چیزّێئے چارێن نێمگان پِر کنگَ بیت. پِر کن. 26په ٹێبَلا تلاهئے چار کَڑی اَڈّ کن و کڑیان چارێن کُنڈان، پادَگان پِر کن. 27اے کَڑی باید اِنت کابئے نزّیکّا ببنت چێا که ٹێبَلئے چِست کنگئے وهدا گوَرباسکانَ دارنت. 28ٹێبَلئے چِست کنگئے گوَرباسکان چه چِگردئے دارا اَڈّ کن و گۆن تلاها سرپۆشِش کن. 29اے ٹێبَلئے تال#25‏:29 تال، بزان تار، همے رَزان که اِشیئے تها ورگَ ورنت. و تاسان چه زَگرێن تلاها اَڈّ کن. ٹێبَلئے جَگ و هما کاسَگان هم که په رێچَگی کُربانیگئے اێر رێچگا کار بندگَ بنت، چه زَگرێن تلاها اَڈّ کن. 30’پاکوَنڈێن نگنا‘#25‏:30 پاکوَنڈێن نگن، اَسلیگێن اِبرانیَ گوَشیت ”چِهرَگانی نگن، دێمانی نگن“. اے نان مُدام هُداوندئے بارگاها اێر کنگی اَتنت و اے گپّئے نِشانی اَتنت که هُدا وتی مردمانی رۆزی‌رَسان اِنت. مُدام همے ٹێبَلئے سرا، منی دێما اێر کن.

چِراگدان

31چه زَگرێن تلاها چِراگدانے اَڈّ کن. چِراگدانا، بزان بُن و بُنشاه و پیاله و گُلبُن#25‏:31 گُلبُن، بزان گُلئے بُن، پُلّئے هما جاگه که تاکانی بُنا اِنت. و پُلّان ٹَپّ و اَڈّ کن، جتا جتا اَڈِّش مکن، اے یَک‌ٹُکُّر ببنت. 32چه بُنشاهئے کَشان شش شاهڑ در بیئیت، سئے شاهڑ چه یکّ کَشێا و سئے شاهڑ چه آ دگه کَشا. 33هر شاهَڑا سئے پیاله پِر ببیت، پیالهانی سربُرا بادامئے پُلّئے وڑێن گُلبُن و پُلّے پِر ببیت. چِراگدانئے هر شَشێن شاهڑ همے پئیما ببنت. 34چِراگدانئے بُنشاها چار پیاله پِر ببیت، گۆن بادامئے پُلّئے وڑێن گُلبُن و پُلّان. 35چه بُنشاها در آیۆکێن ششێن شاهڑانی بُنا گُلبُن ببیت، یکّ گُلبُنے ائولی دوێن شاهَڑانی بُنا ببیت، چه هما جاگها کَمّے جَهلتِر که شاهَڑ چه بُنشاها درَ کاینت، دومی گُلبُن دومی دوێن شاهڑانی بُنا و سئیمی گُلبُن سئیمی دوێن شاهڑانی بُنا ببیت. 36گُلبُن و شاهڑ و چِراگدان یَک‌ٹُکُّر ببنت. اے سجّهێنان چه یکّێن ٹَپِّتگێن زَگرێن تلاها اَڈّ کن.

37هپت چراگ اَڈّ کن و چِراگدانا پِرِش کن که چِراگدانئے دێمئے جاگها رُژنا بکننت. 38چِراگدانئے سَمبالگئے ائوزار و سامانان چه زَگرێن تلاها اَڈّ کن. 39په چِراگدان و اِشیئے سجّهێن سامانانی اَڈّ کنگا یکّ تالانتے#25‏:39 یکّ تالانتے کِساس سی و پنچ کیلو اِنت. زَگرێن تلاه کارمرز کن.

40بچار، اے سجّهێن چیزّان هما پئیما اَڈّ کن که من ترا کۆهئے سرا پێش داشت.

Currently Selected:

دَرگوَز 25: HPKB

Highlight

Copy

Compare