دَرگوَز 23

اِنساپئے کانون

1”درۆگێن هال شِنگ مکن. گۆن بَدکاران همکاری مکن و درۆگێن شاهدی مدئے. 2گۆن گێشترێن مردمان گۆن مکپ و بدێن کار مکن. جێڑهێئے سرا که شاهدیَ دئیئے، اِنساپا لگتمال مکن، بِلّ تُرے گێشترێن مردم هما نێمگا اَنت. 3جێڑهێئے تها نێزگارێن مردمێئے واستا هم رو و ریا#23‏:3 رو و ریا، بزان پرک و درک، اَربی و پارسیا ”تبعیض“. مکن.

4اگن تئو وتی دُژمنئے هم گارێن گۆک یا هر دیست، اَلّم واهُندئے کرّا سَری کن.

5اگن تئو دیست که تئیی بَدواهێئے هر بارئے چێرا چێر تَرّتگ، پُشتا مان مدئے و مرئو. بارئے بۆجگا کُمَکّی کن.

6اگن تئیی کئومئے گریب و نێزگارێا وتی اَرز و پریات آورت، آییا بےاِنساپ مکن.

7چه درۆگێن بُهتام‌جَنیا پَهرێز کن. بێگُناه و راست و بَرهَکّێن مردما مَرکئے سِزا مدئے. چێا که من ناهَکّێن مردما بێگُناه هسابَ نکنان.

8رشوَت مزور، چێا که رشوَت رُژناێن چمّان کۆرَ کنت و راستگۆئے هبرا تابَ دنت.

9دَرامَدێئے سرا زُلم مکن. چێا که تئو زانئے دَرامَد بئیگ چۆن گران اِنت. شما وت هم مِسرا دَرامَد اتێت.“

شَبَّتئے کانون

10”تان شش سالا وتی ڈگارا بِکِش و برُن، 11بله هپتمی سالا بِلّ که ڈگار آرامَ کنت. کاری مدار، بِلّ که تئیی مهلوکئے گریب و نێزگارَ چِننت و ورنت و سر آتکگێنان گیابانئے جانوَرَ ورنت. وتی انگورئے باگ و زئیتونئے باگا هم اَنچُش کن. 12شش رۆچا کار کن و هپتمی رۆچا آرام کن که تئیی گۆک و هر دَم بکننت و تئیی مۆلِدئے چُکّ و تئیی لۆگا نِشتگێن دَرامَدئے اَرواه تازَه‌دَم ببیت.

13منی اے سجّهێن هبر که من گۆن شما کرتنت، اِشان دلگۆش کنێت. آ دگه هُدایانی ناما مگِرێت. چه شمئے دپا آیانی نام هم در مئیئیت.“

ائییدانی کانون

14”سالے سئے رندا په من ائیید بکن. 15بێهُمیرێن نگنئے ائییدا برجاه بدار. هما پئیما که من ترا هُکم داتگ، هپت رۆچا بێهُمیرێن نگن بوَر. اے کارا اَبیبئے ماها، هما وهدا بکن که من گیشّێنتگ، چێا که همے ماها شما چه مِسرا در آتکێت. کَسّ گۆن هالیگێن دستان منی بارگاها مئیئیت.

16رۆن و مۆشئے ائییدا گۆن وتی هما کِشارانی ائولی بَر و سَمران جشن بگر که تئو وتی ڈگارا کِشتگ‌اَنت.

اێرَهتئے ائییدا سالئے گُڈّی رۆچان جشن بگر، هما وهدا که وتی ڈگارئے بَر و سَمرا مُچَّ کنئے.

17سجّهێن مردێن سالے سئے رندا هُداوندێن هُدائے بارگاها بیاینت.

18کُربانیگئے هۆنا که منی دێما پێشَ کنئے، ترا هچّ هُمیردارێن چیزّ گۆن مبیت. منی ائییدئے کُربانیگئے پیگ تان سباها پَشت مکپیت.

19وتی زمینئے ائولی بَر و سَمرا وتی هُداوندێن هُدائے لۆگا بیار.

شِنِکّئے گۆشتا ماتئے شیرئے تها لَهڑ مدئے.

هُدائے پرێشتگ

20بچار، نون من پرێشتگے راه دئیگا آن. اے چه تئو پێسرَ بیت که راها تئیی پاسپانیا بکنت و ترا منی تئیار کرتگێن جاگها ببارت و سر بکنت. 21آییئے اِهتِراما بکن و هبرانی گۆش دار. آییئے هلاپا پاد مئیا که تئیی ناپرمانیا نبکشیت. چێا که منی نام آییئے باتِنا اِنت. 22بله اگن آییئے تئوارا شرّیئے سرا گۆش بدارئے و هرچے که منَ گوَشان، هما پئیما بکنئے گڑا من تئیی دژمنانی دژمنَ بان و تئیی بَدواهانی بَدواه. 23منی پرێشتگ چه تئو پێسر رئوانَ بیت و ترا اَموری و هیتّی و پِریزّی و کَنهانی و هێوی و یَبوسیانی مُلکا بارت. من اِشان گار و گُمسارَ کنان. 24اِشانی هُدایانی پرستش و هِزمتا مکن و اِشانی کارانی رَندگیریا مکن. اِشانی بُتێن هُدایان سَرجمیا کَرۆج و هما سِنگان ٹُکّر ٹُکّر کن که اِشان په وتی پرستشگاهئے نشان کنگا مِکّ کرتگ‌اَنت. 25من تئیی هُداوندێن هدا آن. منی هِزمتا بکن، من تئیی رِزک و رۆزیگا برکتَ دئیان و نادْراهیا چه تئیی جانا دورَ داران. 26تئیی مُلکا کَسّ چُکّ اِشکندَ نکنت و کَسّ سَنٹ و بےائولادَ نبیت. من شمئے اُمرا برکتَ دئیان.

27من وتی بیمّا چه تئو پێسر راهَ دئیان و تئو هر کئومێا که دپَ کپئے، آ کئوما سَربتَگ و سَرگردانَ کنان و سجّهێن دژمنان چه تئیی دێما تاچێنان. 28من وتی کَهرا چه تئو پێسر راهَ دئیان و هێوی و کَنهانی و هیتّیان چه تئیی دێما دورَ کنان. 29بله یکّ سالێئے تها چه تئیی دێما دورِشَ نکنان. چۆ مبیت که زمین وئیرندان ببیت و گیابانئے جانوَر چه تئو گێشتر ببنت. 30اے کئومان کمّ کمّا چه تئیی دێما دورَ کنان تانکه تئو باز بئیان ببئے و اے سرڈگارا وتی بکنئے.

31چه سُهرزِرا تان پیلِستیانی زِرا و چه گیابانا تان پَراتئے کئورا، تئیی سیمسرانَ گیشّێنان و اے سرڈگارئے نندۆکان تئیی دَستا دئیان و تئو آیان چه وتی کِرّا گَلّێنئے. 32گۆن اِشان و اِشانی هُدایان اَهد و پئیمان مکن. 33اے مردم تئیی مُلکا منِندنت. چۆ مبیت که ترا دێم په گناها ببَرنت و تئو منی ناپرمان ببئے. اگن تئو اِشانی هُدایانی پَرستِش بندات کرت، اَلّما دامێا کپئے.“

Currently Selected:

دَرگوَز 23: HPKB

Highlight

Copy

Compare