Tito 1
1
Mukanda Wasingaga Paolo ku Tito. Paolo Ekusambizia Tito.
1Paolo, mukobe wa Kalaga, nu musingua wa Yesu Klisto, ku bukatizio bua basombolua ba Kalaga, nu bumenyinino bua bulili buli mu kuanza Kalaga, 2nu kilemanizio kia kalamo katanakuzinda, kalagilue na Kalaga utekuekaga buza, mu nkiko za wakalazi gabezaga ntebegania kisi nu meigulu; 3tondo ku nkungu zage abisuide idagi liage mu musagu, gunakasilue kuikakizio lia Kalaga Monia weitu; 4ku Tito, muana wane wa bulili mu bukatizio bumozi: Mponga nu bubobelelo bikutukaga ku Kalaga Isi nu ku Mukota Yesu Klisto Monia weitu bibe kuguli.
Paolo Asigile Tito ku Kulete Kulongeka Bitondo bia baKlisto.
5Ku kabamba kakano nakusigile ku Kulete, buno ulongeke bitondo biasigede, nu kubika bakulu mu muino na muino, anga bunakukakizizie; 6muntu uteli na lukumu lubi, nu wamulume uli na mukikulu umozi, nu uli na bana bakatizia, batakubingua ku bitondo bibi, nu beteli na kabenga. 7Umpanga buatunganana mukulu wa ekelezia ntabe na lukumu lubi, kubuno eli mukiti wa Kalaga; ntabe muntu wa kuikotia, nu ntabe na kasungu, nu ntanue maku, nu ntabe mulibuzi, nu ntelame bikulo bia nsese; 8tondo abe musambizia, nu mutundi wa busoga, nu wola, nu wisa, nu wasililila, nu muisunguzi; 9nu ukukokomezia idagi lia bukatizio anga buigisizibuelio, buno ane bantu mu meigisia ma kalamo, nu kuluta babo beli na miango.
10Kubuno kuli beingi batakuanza, nu bekutenda butakulungana, nu bengelezi, nu lebelebe mu babo bamonesibua, 11buatunganana bazugilue; kubuno bekugalukia bikanga bingi, nu bekuigisia butakulungana, kubuno bekutunda bikulo bingi. 12Umozi wa kubeli, mulengania wabo bobenyene, atendile bune,
BaKulete bekuekaga buza kankanka,
Beli nyama mbi,
Beli biliagundu batakukita mulimo.
13Bulongeki bubuno buligo. Bazugile nunse, buno balinde mu bukatizio, 14buno tabonguilile misumo za baYuda, nu kukakizia kua bantu bekuibembukia na bulili. 15Binsania bili bisoga kubabo beli basoga; tondo ku babo beli na nsese nu batakatizia, takuli kimozi kili kisoga; tondo bumenyinino buabo nu kalenganio kabo bili na nsese. 16Bekutenda buno beizi Kalaga; tondo ku misako zabo bakumutuna, basombi, nu banani, nu ku kitondo na kitondo kisoga tabakuitabizibua.
Currently Selected:
Tito 1: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
