Kulolesibua 4
4
Yoana Ekumona ku Bitondo Biakuangamia bia Muigulu.
1Kusila kua bubo namonine ku luibi lueigulua muigulu, nu iyuki itangi linungule kulio liabezaga anga monze liantendile, nu liabuide bune, Bakama kuno kundi, nu nkulolesie buabe kusila kua bubo. 2Kazanga kongo nabezaga mu Muuza Wasililila: nu namonine ku kisumbi kia bukota kiabikua muigulu, nu umozi abezaga ikala ga kisumbi kikio; 3nu wozo wikalaga gakio abezaga anga ikozi lia yasepe nu lia sandoine: nu mumpilinda wabezaga watimba kisumbi kikio, walangalaga anga melaude. 4Bisumbi makumi mabili na binazi biabezaga biatimbikania kia bukota; nu ga bisumbi bibio gabezaga bakulu makumi mabili na banazi, ubeikalaga gabio, bavualikizibue nsulu zenga nunse; nu gantata ga matoe mabo gabezaga nkumbu za bukota za olo. 5Nu ku kisumbi kikio kia bukota kuatukile mikenzi za nkuba nu moki nu mikulumino. Nu tusuku mutuba kamo tua keiya tukuguluminaga lisa na kisumbi kia bukota, tuli Miuza mutuba kamo za Kalaga; 6nu lisa na kisumbi kikio, kuabezaga anga kitatenge kili anga kiyolo kiasusania ikozi lienga; nu munkatini mua kisumbi kikio, nu ku ntungo insania kuabezaga bibumbua binazi bili na kalamo biabezaga na meiso ku nkoto nu ku malanga. 7Nu kibumbua kitangi kiabezaga anga kimbue, nu kibumbua kia bibili kiabezaga anga muana wa ngombe, nu kibumbua kia bisatu kiabezaga na malanga anga ma muntu, nu kibumbua kia binazi kiabezaga anga kazoni ka ndiu. 8Nu bibio bibumbua binazi bili na kalamo, na kibumbua na kibumbua kili na biupi mutuba, nago nago nagabiabezaga na meiso nu mango mabezaga munda: tabiumunaga musi nu kindi, biatendaga bune,
Wasililila, wasililila, wasililila, eli Mukota Kalaga,
uli na Magala Mansania,
Abezagako nu eliko nu akavua.
9Nu gakakasa bibumbua bili na kalamo lutanuno nu luanzo nu lusimo ku wozo ukuikalaga ga kisumbi kia bukota, ku wozo ukulamaga nkiko na nkiko zitanakuzinda, 10bakulu makumi mabili na banazi bakakumbaminaga wozo uli ga kisumbi kia bukota, nu bakaganuna wozo ukulamaga nkiko na nkiko zitanakuzinda, nu bakabika nkumbu zabo za bukota lisa na kisumbi kikio, bakatenda bune,
11Uwe watananinua, Mukota weitu nu Kalaga weitu, kuba na lutanuno nu luanzo nu buangato; kubuno uwe wabumbile binsania, nu ku kusombola kuobe biabezaga, nu biabumbilue.
Currently Selected:
Kulolesibua 4: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
