Kulolesibua 5
5
Mukanda wa Tumenyikilo Mutuba Kamo.
1Nu namonine ku kuboko kua seidume kua wozo weikalaga ga kisumbi kia bukota, mukanda wasanzilue munda nu gantata gago, wakandua bubibu na tumenyikilo mutuba kamo. 2Nu namonine ku mugenzi mubibu ekulaluka neiyuki inene bune, Nazi watananina kukandula mukanda wono nu kutikia tumenyikilo tutuno? 3Nu takuabezaga umozi, aba muigulu, aba ku kisi, aba munsi, wavuamine kugukandula, aba kugulola. 4Nalilile bubibu, kubuno takuamonekile umozi watananina kukandula mukanda, aba kugulola: 5nu umozi wa babo bakulu ambuide bune, Ntunalila; lola Kimbue, kili kia kikanga kia Yuda, Kibuti kia Davidi, akindile buno akandule mukanda nu tumenyikilo mutuba kamo. 6Nu namonine munkatini mua kisumbi kia bukota nu bibumbua bili na kalamo, nu munkatini mua babo bakulu, Muana wa Mukoko emana, abezaga anga wasesua, uli na mega mutuba kamo, nu meiso mutuba kamo, umamo Miuza za Kalaga mutuba kamo, masingilue ku kisi kinsania. 7Nu avule, nu atolile mukanda wabezaga ku kuboko kua seidume kua wozo wabezaga wikala ga kisumbi kia bukota. 8Nu gakatile mukanda, bibumbua binazi bili na kalamo nu bakulu makumi mabili na banazi baguide bukukumania ku Muana wa Mukoko, na muntu na muntu abezaga na zenze, nu bituma bia olo bizazibue na bulago umasego ma basuagibua. 9Nu bekuimbaga lungo luimbo luto bune,
Watananina kukata mukanda nu kutikia tumenyikilo tutuno:
kubuno wasesilue, nu wakunzide Kalaga bantu ba babilongo
bansania, nu ba mitendezi insania, nu ba bikanga bansania ku mikila zobe,
10nu wababikide bukota bua basankoga ku Kalaga weitu, nu bakangata kisi.
11Nu namonine, nu nungule kuiyuki lia migenzi mingi zikutimba kisumbi kia bukota nu bibumbua bili na kalamo nu bakulu; nu buingi buabo buabezaga tununu ikumi mambizi tununu ikumi, nu tununu mambizi tununu; 12batendaga neiyuki inene bune,
Watananina Muana wa Mukoko wasesilue ekukasua buangato,
nu bugumi, nu menge, nu magala, nu luanzo, nu lutanuno, nu mbogimbogi.
13Nungule ku bibumbua binsania bili muigulu, nu bili ga kisi, nu bili munsi, nu bili mu bitatenge, nu binsania bili mubio, biatendaga bune,
Mbogimbogi, nu luanzo, nu lutanuno, nu buangato, bibe kuguli ukuikalaga ga kisumbi kia bukota, nu ku Muana wa Mukoko, aba ku nkiko na nkiko zitanakuzinda.
14Nu bibumbua binazi bili na kalamo biatendile bune, Amena. Nu bakulu baguide gansi nu bamukumbamine.
Currently Selected:
Kulolesibua 5: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
