Kulolesibua 3
3
Iyuki Liasanzilagua Ekelezia lia Sadi.
1Nu ku mugenzi wa ekelezi lia ku Sadi sanza bubuno:
Ubukutenda wozo uli na zezo Miuza mutuba kamo za Kalaga nu nkeninkeni mutuba kamo: Nizi makitilo mobe, nu bekutenda buno uli mulami, tondo wakule. 2Kesia ntende, nu kokomezia bibio biasigala bise buigi na kukua: kubuno nsiamonine makitilo mobe masililila ku Kalaga wane. 3Bubo, kengela buwakasilue nu bugungule; kokomezia bubo, nu iyanie. Bubo ndi ntuakesia ntende, nkavua anga muibi, nu ntukamenya nkungu zinkakuvuila. 4Tondo kuli bantu bamozi ku Sadi batabigizie nsulu zabo: nu nkatabanga nabo mu nsulu zenga; kubuno zabatananina. 5Wozo ukakindaga akavualikibua zezo nsulu zenga; nunne nsikazimia izina liage mu mukanda wa kalamo nunse, nu nkeitabizia izina liage ku Tatane, nu ku migenzi zage. 6Wozo uli na matuzi makunguilila, onguilile bukutenda Muuza Wasililila ku maekelezia.
Iyuki Liasanzilagua Ekelezia lia Filadelefia.
7Nu ku mugenzi wa ekelezia lia ku Filadelefia sanza bubuno:
Ubukutenda wozo wasililila, wozo uli bulili, nu uli na mutandilua wa Davidi, we ndi eigula takuli uneigala, nu ndi eigala, takuli uneigula: 8nizi makitilo mobe (unguilila, nakuigulila luibi, nu takuli ungo unaluigala), ntuli na magala meingi, nu walangile idagi liane, nu ntuananine izina liane. 9Unguilila, nkukukasa ba mu numba za musanganano za Satana, bekuitenda buno, beli baYuda, nu tabelibo, tondo bekueka buza; unguilila, nabalusie buno bavue kukukumbamina, nu bakamenyinina buno nakutunda. 10Kubuno walangile idagi liane lia komanizia, nkakonia ku nkungu za kulindikua kuavue ku kisi kinsania, kulindika babo beli ga kisi. 11Nasasie kuvua: kokomezia nunse kuguli nakio, ungo muntu anavua kukunyaga nkumbu zobe za bukota. 12Wozo ukakindaga, nkamubika iyango mu numba za kukumbamina za Kalaga wane, nu ntakatuka mumo lingo; nu nkamusanza izina lia Kalaga wane ku mubili wage, nu izina lia muino wa Kalaga wane, wa Yelusalema muto, ukagela gansi kutuka muigulu ku Kalaga wane, nu lingo izina liane. 13Wozo uli na matuzi makunguilila, onguilile bukutenda Muuza Wasililila ku maekelezia.
Iyuki Liasanzilagua Ekelezia lia Laodikia.
14Nu ku mugenzi wa ekelezia lia ku Laodikia sanza bubuno:
Ubukutenda wozo uli Amena, mulongeki mukatizia nu wa bulili, mutangi wa bibumbua bia Kalaga: 15nizi makitilo mobe, buno ntuli mpego aba ntuli keiya: natundaga buno ube mpego aba ube keiya. 16Tondo kubuno watamba, nu ntuli mpego aba ntuli keiya, nkakusala mu kanua kane. 17Kubuno ukutenda bune, nne nili mugumi, nu neigumizie, nu nsikuiyanina kampa; nu ntuizi buno uwe uli musosu nu uli na tungonongono nu uli muzambi nu uli kiuku nu uli mundulu: 18Nkukuana buno unkunze olo zasuguidue na keiya, buno ugume; nu nsulu zenga zakuvuala, buno ntukangue; nu muti wakubonga ku meiso mobe, buno umone. 19Bansania bankutundaga, nkubazugilaga, nu nkubasungulaga: ba na komanizia, nu wiyanie. 20Unguilila, nemana ku luibi, nu nkukokomona: ndi muntu ekungua kuiyuki liane nu kuigula luibi, nti neingile kueli, nu nalie nage, nuwe alie nanne. 21Wozo ukakindaga, akeikalaga nanne ga kisumbi kiane kia bukota, anga bunakindile, nu neikeide na Tatane ga kisumbi kiage kia bukota. 22Wozo uli na matuzi makunguilila, onguilila bukutenda Muuza Wasililila ku maekelezia.
Currently Selected:
Kulolesibua 3: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
