Kulolesibua 21
21
Lingo Igulu Ito nu Kingo Kisi.
1Nu namonine ku lingo igulu nu kingo kisi: kubuno igulu itangi nu kisi kitangi biazimine; nu takuli kitatenge lingo. 2Nu namonine ku muino wa kizila, u Yelusalema muto, wagelaga muigulu kutuka ku Kalaga, wakulumizibue busoga anga mukikulu weikulumizizia iba. 3Nu nungule kuiyuld inene liatukile ku kisumbi kia bukota liatendile bune, Unguililazi, kiziki kikuikalaga Kalaga kise ku bantu, nuwe akeikala nabo nubo bakaba bantu bage; nu Kalaga wenyene akaba nabo, nu akaba Kalaga wabo: 4nuwe akanyonyona bisozi binsania ku meiso mabo; nu takukakubua lingo; aba takukalilua lingo, aba idilo, aba mbabazio lingo: kubuno bitondo bitangi biatingile. 5Nu wozo wabezaga wikile ga kisumbi kia bukota, atendile bune, Unguililazi, nagalukia binsania. Nuwe atendile bune, Sanza: kubuno malagi mamano meli makukatizibua nu ma bulili. 6Nuwe antendile bune, Masila kuba. Nne nili Alfa nu Omega, mutangi nu muzinda. Wozo uli na mpusia nkamunusia mazi ma kanua balongo ka kalamo buliabulia. 7Nuwe ukakindaga akapiena binsania bibino; nunne nikaba Kalaga wage, nuwe akaba muana wane. 8Tondo beli na boba, nu batakatizia, nu beli na misako mibi, nu beiti, nu bitazi, nu baganga, nu bakumbamizi ba nkisi; nu boza bansania, kibombo kiabo kikeisua mu kiziba kia keiya kikuguluminaga na kibiliti; luluno u lukuo lua mabili.
Yelusalema Muto.
9Umozi wa ku zezo migenzi mutuba kamo zabezaga na bituma mutuba kamo biyala na tubebe mutuba kamo tuzinda, avule, nu atendile bune, Vua kuno, nikulolesie mukikulu weisonga, mukikulu wa Muana wa Mukoko. 10Nu anekile mu magalama Muuza Wasililila ku muiduko munene wasakama, nu andolesizie muino wa kizila, wozo wa Yelusalema, wagelile gansi kutuka muigulu ku Kalaga, 11wabezaga na lutanuno lua Kalaga: nu kiengi kiago kiasusania kiengi kia ikozi lia bukunza bubibu, anga ikozi lia yasepe, lienga anga kiyolo: 12wabezaga na kitutu kinene nu kiasakama; wabezaga na nibi ikumi neibili, nu ku nibi migenzi ikumi neibili; nu meina masanzua meli ma bilongo ikumi na bibili bia bana ba Isalele: 13nu kukutukaga kisongo kia busi kuabezaga nibi isatu; nu bungulu bua kisi, nibi isatu; nu ku bobungo, nibi isatu, nu kunsi, nibi isatu. 14Nu kitutu kia wozo muino kiabezaga na bibanza ikumi nu bibili; nu ga bibio bibanza gabezaga meina ikumi na mabili ma basingua ba Muana wa Mukoko. 15Nu wozo unatendaga nage abezaga na mukulu wa olo, buno alindike muino, nu nibi zago, nu bitutu biago. 16Nu wozo muino wabezaga na ndenge inazi, nu bulazi buago buabezaga bugezie na bungulu: nu alindikile muino na mukulu kilometele tununu tubili nkama ibili nu makumi manazi. Bulazi buago nu bungulu buago nu kusakama kuago biabezaga bialingimana. 17Alindikile kitutu kiago mabusu lukama makumi manazi nu manazi, anga kilindiko kia muntu, u kia mugenzi. 18Nu bia bibobakile na kitutu biabezaga yasepe: nu muino wabezaga wa olo nsoga, wasusania kiyolo. 19Nu bibanza bia bitutu bia muino wozo biakulumizibue na makozi ma bukunza bubibu nu kibanza kitangi kiabezaga yesepe; kia bibili kiabezaga safilo, kia bisatu kiabezaga kalekedo, kia binazi kiabezaga emalode; 20nu kia bitano kiabezaga salodone, kia mutuba kiabezaga saladio; kia mutuba kamo kiabezaga kisolaite; kia kinana kiabezaga belulo; kia mubula kiabezaga tupaze; kiekumi kiabezaga kilosopalase; kiekumi nu kimozi kiabezaga iyasinte; kiekumi nu bibili kiabezaga ametisito. 21Nu nibi ikumi nu ibili zabezaga pelele ikumi nu ibili; nu luibi na luibi na luabezaga na pelele imozi: nu nzila za muino zabezaga za olo nsoga anga kiyolo kienga nunse. 22Nu nsiamonine ku numba za kukumbamina mugo: kubuno Mukota Kalaga uli na Magala, nu Muana wa Mukoko u beli numba za kukumbamina. 23Nu mu muino wozo tamukuiyaninua kisongo kia busi aba muezi kusana mugo; kubuno lutanuno lua Kalaga ulukukelima mugo, nu Muana wa Mukoko u kasuku mugo. 24Nu babilongo bakatabanga mu kiengi kiago: nu bakota ba kisi bekuvua mugo na lutanuno luabo. 25Nu nibi zago tazikegalagua mu musi nunse (kubuno mugo tamukeidaga busi): 26nu bekavua na lutanuno nu luanzo lua babilongo mugo: 27nu tamukeingila kanse keli na nsese nunsania, aba muntu ukukitaga buagi nu ukuekaga buza: tondo umpanga beli na meina mu mukanda wa kalamo wa Muana wa Mukoko bakingila mugo.
Currently Selected:
Kulolesibua 21: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
