Kulolesibua 22
22
1Nu andolesizie luuzi lua mazi ma kalamo, menga anga kiyolo, luatukaga mu kisumbi kia bukota kia Kalaga nu kia Muana wa Mukoko, 2nu luagelaga mu nzila nnene zago. Nu ku mutili na mutili wa lulo luzi kuabezaga muti wa kalamo, ukukolamaga biguma bia nkita ikumi neibili, nu gukukolamaga biguma biago muezi na muezi: nu nsamba zago zabezaga muti wa konia babilongo. 3Nu takukaba kisugo lingo: nu kisumbi kia bukota kia Kalaga nu kia Muana wa Mukoko bikaba mugo; nu bakobe bage bakamukitila; 4nu bakamumonako; nu izina liage likaba ga malanga mabo. 5Nu takukeida busi lingo; nu tabakeiyanina kiengi kia kasuku, aba kiengi kia kisongo kia busi; kubuno Mukota Kalaga akabasanizia kiengi; nubo bakangata aba ku nkiko na nkiko zitanakuzinda.
Moki Mazinda.
6Nuwe atendile bune, Malagi mamano meli makukatizibua nu ma bulili; nu Mukota, Kalaga wa mitima za balengania, asingile mugenzi wage buno alolesie bakobe bage bitondo biasasie kuba. 7Unguililazi, nasasie kuvua, Mbogimbogi ku muntu wozo ukuanza malagi ma bulengania bua mukanda wono.
8Nunne Yoana nnenyene nungule nu namonine ku bitondo bibio, nu ganungule nu ganamonine, naguide buno nikumbamine mugenzi wandolesagia bitondo bibino. 9Nuwe antendile bune, Unguilila, ntunakita bubo: nne nili munyobe na mulimo nu wa mibuto zobe balengania, nu wa babo bekuanza malagi ma mukanda wono: kumbamina Kalaga.
10Nuwe antendile bune, Ntubike kamenyikilo ku malagi ma bulengania bua mukanda wono; kubuno nkungu zise buigi. 11Nu wozo uteisanana, nteisanane lingo: nu wozo uli na nsese, abe na nsese lingo: nu wozo wisanana, eisanane lingo: nu wozo wasililila, asililile lingo. 12Unguililazi, nasasie kuvua; nu nili na lukalilo luane lusoga, kuliga muntu na muntu anga buakitile. 13Nne nili Alfa nu Omega, mutangi nu muzinda, wakulinga nu wakuzinda. 14Mbogimbogi ku babo bekusuga nsulu zabo, kubuno nubo babe na buangato kuvua ku muti wa kalamo, nu beingile mu nibi za wozo muino. 15Nu kumbuga kuago kuli mboa, nu baganga, nu bitazi, nu beitani, nu bakumbamizi ba nkisi; nu muntu unsania ukuelamaga kueka buza.
16Nne Yesu nasingile mugenzi wane kumulongekela bitondo bibino ku maekelezia. Nili isina nu wa kikanga kia Davidi, lulo lukenikeni, lukukelimaga lua nindunindu.
17Nu Muuza Wasililila nu mukikulu wasongoa bekutenda bune, Vua. Nu wozo ukungua atende bune, Vua. Nu uli na mpusia avue: nuwe ukutunda anue mazi ma kalamo buliabulia.
18Nkulongekela muntu na muntu ukungua ku malagi ma bulengania bua mukanda wono bune, Ndi muntu atalikila mango malagi gantata, Kalaga akamutalikila tubebe tuli mu mukanda wono: 19nu ndi muntu atikia mango malagi mu bulengania bua mukanda wono, Kalaga akamutikizia kindi kiage ku muti wa kalamo, nu ku muino wa kizila, nu ku bitondo biasanzua mu mukanda wono.
20Nuwe ukulongeka bitondo bibino ekutenda bune, E: Nasasie kuvua. Amena: vua, Mukota Yesu.
21Nu mponga za Mukota Yesu zibe na basuagibua. Amena.
Currently Selected:
Kulolesibua 22: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
