Kulolesibua 20
20
Bekukanda Satana Miaka Kanunu.
1Nu namonine ku mugenzi agelile gansi kutuka muigulu, abezaga na mutandulua wa muzinga utanakuzinda, nu neikoki inene mu kuboko kuage. 2Nu akatile nzoka nnene za kisimana, nzoka za wakalazi, Liabo u Satana, nu akandilue miaka kanunu, 3nu amubikile mu muzinga utanakuzinda, nu aguzibile, nu abikile kamenyikilo gago, buno anavua kuengelela babilongo lingo, aba nu gakasila miaka kanunu; nu kusila kuazo buamutunganana kukandulua bindi bikeke.
4Nu namonine ku bisumbi bia bukota, nu babo bekeide gabio, nu bakasilue buangato bua kusungia: nu namonine ku babo basesagua matoe ku kabamba ka bulongeki bua Yesu, nu ku kabamba keidagi lia Kalaga, nu babano tabakumbamine nyama, aba kisusania kiazo, nu tababikilue kakengelezio ga malanga mabo nu mu kuboko kuabo; nubo babeide na kalamo, nu bangatile na Klisto miaka kanunu. 5Nu bango bakuzi tabalamine lingo aba nu kusila kua zezo miaka kanunu. Lilino u iyukilo itangi. 6Mbogimbogi nu kusililila ku wozo ukayuka muiyukilo itangi: lukuo lua mabili talukabangata; tondo bakaba basankoga ba Kalaga nu ba Klisto, nu bakangata nage mu zezo miaka kanunu.
7Nu gakasila zezo miaka kanunu, Satana akakandulua mu kikio kikando, 8nu akatuka buno engelele babilongo beli ku ndenge inazi za kisi, Goga nu Magoga, kubakundamania ku bita: nu maganzo mabo meli anga misege za mu kitatenge. 9Nu babakamine gantata ga bungulu bua kisi, nu batimbile kiziki kia basuagibua nu muino watundua: nu keiya katukile muigulu nu kabazikizie. 10Nu wozo Liabo u Satana wabengelelaga eisilue mu kiziba kia keiya kikuguluminaga na kibiliti, umuli zezo nyama nu mulengania wa buza nuwe; nu bakababazibua musi nu kindi ku nkiko na nkiko zitanakuzinda.
Lusungio Lutanakuzinda.
11Nu namonine ku kisumbi kinene kia bukota kienga, nu wozo wabezaga wikile gakio, kisi nu meigulu biatinine malanga mage; nu bibio tabikamonekako lingo. 12Nu namonine ku bakuzi, banene nu bakeke; bemana lisa na kisumbi kia bukota; nu mikanda zakanduidue; nu ungo mukanda wakanduidue, uli wa kalamo: nu basungizie bakuzi ku bitondo biabezaga biasanzua mu mikanda, anga buabezaga misako zabo. 13Nu kitatenge kiatumpuide bakuzi babezaga mukio; nu lukuo nu kiziki kia bakuzi (Hadese) biabasizie bakuzi babezaga mubio: nu na muntu na muntu na wasungizibue anga buabezaga misako zage. 14Nu beisile lukuo nu kiziki kia bakuzi (Hadese) mu kiziba kia keiya. Luluno u lukuo lua mabili, lulo lua kiziba kia keiya. 15Nu ndi muntu ntamoneka asanzua mu mukanda wa kalamo, nti eisua mu kikio kiziba kia keiya.
Currently Selected:
Kulolesibua 20: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
