Kulolesibua 19
19
Beli Muigulu Bekuganuna Kalaga.
1Nu kusila kua bubo nungule kuiyuki anga iyuki inene lia musanganano munene wa bantu beli muigulu, batendaga bune,
Aleluya; Lonio, nu lutanuno, nu magala bili ku Kalaga weitu: 2kubuno nsungio zage zili bulili nu zisanana; kubuno wasungia mukikulu kitazi nunse, wozo wabigizie kisi na butazi buage, nu kusuba mikila za bakobe bage mu kuboko kuage.
3Nu batendile lingo bune, Aleluya. Nu muki wage weitumukaga ku nkiko na nkiko zitanakuzinda. 4Nu babo bakulu makumi mabili nu banazi nu bibio bibumbua binazi bakomine mazu mabo nu bakumbamine Kalaga ukuikala ga kisumbi kia bukota, batendaga bune, Amena; Aleluya. 5Nu iyuki liatukile ku kisumbi kia bukota, liatendile bune,
Ganunazi Kalaga weitu, inyue bakobe bage bansania, inyue bakumukua boba, banene nu bakeke.
6Nu nungule kuiyuki anga iyuki lia musanganano munene wa bantu, nu anga kubila kua kiliza kia mazi meingi, nu anga kukulumina kua mikulumino minene liatendile bune,
Aleluya: kubuno Mukota Kalaga weitu uli na Magala, angata. 7Tubogazibogazi nu tube na mbogimbogi nunse, tumuganune: kubuno isonga lia Muana wa Mukoko liseli, nu mukikulu wage eikulumizia. 8Nu akasilue buangato buno eikulumizie na nsulu nsoga za line zikukelima nu zenga: kubuno nsulu nsoga za line zili misako zeisanana za basuagibua.
9Nuwe ambuide bune, Sanza, Mbogimbogi ku bakumanua ku kisagulo kia isonga lia Muana wa Mukoko. We ambuide lingo bune, Mamano meli malagi ma bulili ma Kalaga. 10Nu naguide ku magulu mage buno nimukumbamine. Nu ambuide bune, Unguilila, ntunakita bubo: nne nili munyobe na mulimo nu wa mibuto zobe zili na bulongeki bua Yesu: kumbamina Kalaga: kubuno bulongeki bua Yesu buli mutima wa bulengania.
Kuvua kua Yesu kua Mabili.
11Nu namonine igulu liakandulua; nu namonine ku mpunda zenga, nu wozo wabezaga wikala gantata gazo amaninue buno, Mukatizia nu Bulili; nuwe mu kuisanana kuage akasungia nu kuluana bita. 12Nu meiso mage mabezaga anga ngulumina za keiya, nu kuitoe liage kuabezaga nkumbu ningi za bukota; abezaga neizina liasanzua liteizi ungo muntu, umpanga we wenyene. 13Nuwe avualikizibue nsulu zeininue mu mikila; nu izina liage liamanagua Idagi lia Kalaga. 14Nu mazombo ma muigulu mamuyangile mabezaga gantata ga mpunda zenga, mavualikizibue nsulu nsoga za line zenga. 15Nu bupanga bukali buatukile mu kanua kage, buno eite babilongo nabo: nuwe akabangata na kasusu ka kiuma: akakambutula mu kilunga kia bongua bua Kalaga, uli na Magala. 16Nuwe abezaga neizina liasanzua ku nsulu nu ga kilumbu kiage bune, MUKOTA WA BAKOTA, NU MUANGATI WA BANGATI.
17Nu namonine ku mugenzi umozi wemana mu kisongo kia busi; nu alalukile neiyuki inene, nu atendile ku tuzoni tunsania tualengaga muigulu bune, Vuazi nu mukundamane ku kisagulo kinene kia Kalaga; 18buno mulie misuna za bakota, nu misuna za bakoloboyo, nu misuna za beli na magala, nu misuna za mpunda nu za babo bendaga nazo, nu misuna za bantu bansania, bakandua nu bakandulua, banene nu bakeke.
19Nu namonine ku nyama, nu bakota ba kisi, nu mazombo mabo, bakundamene buno baluane na wozo wabezaga wikile gantata ga mpunda nu na mazombo mage. 20Nu nyama zakatilue, nu gamozi na wozo mulengania wa buza, wozo wakitaga migeleko kuzo, kububo engeleide bantu babo babikilue tukengelezio tuto tua nyama nu babo bakumbaminaga kisusania kiazo, nu babo babili beisilue tabakua mu kikio kiziba kia keiya kikuguluminaga na kibiliti: 21nu babo basigeide beitilue na bupanga bua wozo wabezaga wikile gantata ga mpunda, bupanga buatukile mu kanua kage: nu tuzoni tunsania tuikutile na misuna zabo.
Currently Selected:
Kulolesibua 19: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
