Kulolesibua 18
18
Kukua kua Babulona.
1Kusila kua bubo namonine ku ungo mugenzi wagelaga muigulu, abezaga na buangato bunene; nu kisi kiasanine na lutanuno luage. 2Nu alalukile neiyuki inene, atendile bune, Wagoa, wagoa Babulona munene, nu kuseli biziki bia basumbu, nu kikando kia miuza insania za nsese, nu kikando kia tuzoni tunsania tuasombua. 3Kubuno babilongo bansania banune maku ma butazi buage; nu bakota ba kisi bakitile nage butazi, nu bakunzia ba kisi baguma ku magala ma kuguma kuage.
4Nu nungule ku lingo iyuki liatukile muigulu, liatendile bune, Bantu bane, tukazi kueli, nu tamugomie na misako zage za buagi, buno munakivua kuba na tubebe tuage: 5kubuno misako zage za buagi zamoneka kuzo muigulu, nu Kalaga akengeide ku misako zage za buagi. 6Mukasazi anga buakasaga bango, nu mutalikilazi anga buakitile; mu kituma kiatopulilaga bango, mutopulilazikio mambizi mabili. 7Anga buikakile, nu kuigumia, bubo muitiazi na tubebe nu mulililazi; kubuno ekuikengela mu mutima wage bune, Nikuikala mukota nu nili mukikulu, nu nsili musigala, nu nsikaba na kabebe nunse. 8Kubuno tubebe tuage tukaba ku busi bumozi, lukuo, nu kulila, nu munganda; nu akazika na keiya; kubuno Mukota Kalaga wamusungizie eli na magala. 9Nu bakota ba ga kisi, bakitaga nage butazi nu bagumine nage, bakamulilila, gabakamona ku muki wa kuzika kuage, 10bakemana bulazi kubuno bakatina kabebe kage, bakatenda bune, Kabebe, kabebe, muino munene, Babulona, muino mubibu! kubuno lusungio luobe luavua mu nkungu emozi. 11Nu bakunzia ba ga kisi bakamulilila nu bakamukuila kabebe, kubuno takuli muntu ukakunza bikulo biabo lingo; 12bikulo bia olo, nu feza, nu makozi ma bukunza bubibu, nu pelele, nu nsulu nsoga zabota, nu za pulupele, nu zatamba, nu miti za bulago; nu kituma kinsania kia mulamba wa nzogu, nu kituma kinsania kiakitilue na muti wa bukunza bubibu, nu kiuma kia nsubi, nu kiuma kina, nu makozi masoga; 13nu sinamone, nu kalafuno, nu bulago, nu aliga, nu mulobo, nu kasuku ka kibuagabuaga, nu makiti, nu bugali bua bota, nu mumpunge, nu ngombe, nu mikoko; nu mpunda, nu ngondangonda, nu bakobe; nu tulamo tua bantu. 14Nu biguma biwatundaga, biakutukila, nu bikulo binsania biabezaga bialongekua bia bugumi biakuzimina, nu tabakabimona lingo. 15Nu bakunzia ba bikulo bibino, bagumagia, bakemana bulazi kubuno bakatina kabebe kage; bakalila nu bakaba na kabebe; 16batendile bune, Kabebe, kabebe, muino munene wabezaga wavualikizibue nsulu za line nsoga, nu za pulepele, nu za kisimana, nu zalongekua na olo, nu makozi ma bukunza bubibu nu pelele! 17kubuno mu nkungu imozi bugumi bunene buazika. Nu unsania nyene buato, nu unsania ukuenda mu buato kunsania, nu basondelezia ba mato, nu bansania beli na mutali wabo ku mulimo wa mu kitatenge, bemanine bulazi, 18nu balilile nunse gabamonine ku muki wa kuzika kuage. Nu batendile bune, Muino mukizi uli anga wozo muino munene? 19Nu babikile mukungu ga matoe mabo, nu balilile, nu babezaga na kabebe, nu batendile bune, Kabebe, kabebe, muino munene, mugo bansania babezaga na mato mu kitatenge bagumine na bugumi buago! kubuno wazika mu nkungu emozi. 20Gubogelazibogelazi, uwe igulu, nuinyue basuagibua, nuinyue basingua nuinyue balengania; kubuno Kalaga amusubile musubo weinyu.
21Nu mugenzi mubibu ekile ikozi anga ikozi inene lia kugoga nu alilekeide mu kitatenge, atendile bune, Bubo ubukeisoa Babulona, muino munene, nu tagukamonekako lingo. 22Takukongubua kuiyuki lia beimbi ba zenze nu beimbi ba nimbo nu bekuida mpengu nu mionze muguli lingo; nu tamukaba mutumbi, nu aba weingo milimo insania muguli, takukazumibua muzumio wa kugoga muguli lingo; 23nu kiengi kia tusuku takikasana muguli lingo; nu tabakungua kuiyuki lia musongi aba lia musongua muguli lingo; kubuno bakunzia bobe babezaga banene ba kisi; kubuno babilongo bansania bengeledue na buganga buobe. 24Nu bamonine ku mikila za balengania nu za basuagibua, nu bansania beitilue ga kisi muguli.
Currently Selected:
Kulolesibua 18: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
