Kulolesibua 11
11
Bekuita Muino Wasuagibua nu Lusu Luago.
1Nu nakasilue musumbo anga mukulu: nu umozi atendile bune, Emanuka, nu lindika numba za kukumbamina Kalaga, nu kayulo, nu babo bekukumbamina muzo. 2Nu kibanza kili kumbuga kua numba za kukumbamina, kisige kumbuga, aba ntukilindike; kubuno baBilongo biakasiluekio: nubo bakanyanta muino wa kizila na magulu mabo miezi makumi manazi nu ibili. 3Nunne nkakasa balongeki bane babili buangato bua kulengania ku bindi kanunu kamozi nkama ibili nu makumi mutuba bavualikizibue na nsulu za nsago. 4Nubo beli miti ibili za oleve nu bibikilo bia tusuku bibili biemana ku Mukota wa kisi. 5Nu ndi muntu ekutunda kubababazia, keiya nti katuka mu tunua tuabo nu nti kagisia beiti babo; nu ndi muntu ekutunda kubababazia, atunganana kuitua anga bubo. 6Nu babano beli na magala kukanda igulu, buno mbula taziloke mu bindi bia bulengania buabo: nu beli na buangato bua mazi kumagalukia mikila, nu kusungia kisi na lusungio na lusungio lubekutunda. 7Nu gakasila bulongeki buabo, zezo nyama nkali zikutukaga mu muzinga, nu zikeitana nabo, nu zikabakinda, nu zikabeita. 8Nu bitumba biabo bikaba mu nzila za wozo muino munene, ukumanua mu kisusania kia Sodomo nu Ezipeto, ugago gatakidue Mukota wabo. 9Nu bantu ba bikanga nu babilongo nu ba mitendezi bakalolaga bitumba biabo bindi bisatu nu kindi, nu tabakaziga bitumba biabo kuyikua mu nsinda. 10Nu beikile ga kisi bakabogaboga ku kabamba kabo, nu bakamina matindili; nu bakasingilana nkaso; kubuno balengania babano babili bababazizie babo beli ga kisi. 11Nu kusila kua bindi bisatu nu kindi, muza wa kalamo ukutukaga ku Kalaga weingide mubeli, nu bemanukile, nu bantu babalolaga bakule boba. 12Nu bongule kuiyuki lialalukile muigulu liabatendile bune, Vuazi kuno. Nu babakamine muigulu mu kimpa; nu beiti babo babalolile, 13Nu mu nkungu zezo kuabeide kaningini kanene ku kisi, nu kindi kimozi kikumi kia muino kigukile; nu bantu tununu mutuba kamo bakule na kako kaningini: nu bango bansania basigede bakule boba, nu baganuine Kalaga wa muigulu.
14Kabebe ka tubili katingile, nu kabebe ka tusatu kasasie kuba. 15Nu mugenzi wa mutuba kamo eidile monze; nu kuabeide moki manene muigulu, matendile bune, Bukota bua kisi buse bukota bua Mukota weitu, nu bua Klisto wage: nuwe akangataga nkiko na nkiko zitanakuzinda. 16Nu babo bakulu makumi mabili nu banazi, bekuikalaga lisa na Kalaga ga bisumbi biabo bia bukota, nu baguide, nu bakumbamine Kalaga, 17batendile bune,
Tukukusima Mukota Kalaga, Uli na Magala Mansania, uliko nu wabezagako; Kubuno uwe wakatile magala mobe; nu wangata. 18Nu babilongo bongilue, nu bongua bobe buseli, nu nkungu za kusungia bakuzi zakuka, nu kukasa bakobe bobe ubalengania Iukalilo lusoga, nu ku basuagibua, nu bekukua izina liobe boba, bakeke nu banene; nu kubigia babo bekubigagia kisi.
19Nu numba za kukumbamina Kalaga zili muigulu zeigudue; nu sanduku zeidagano liage zamonekileko mu numba za kukumbamina; kuabeide mikenzi, nu moki, nu mukulumino, nu kaningini ka kisi, nu mbula nnene za lubula.
Currently Selected:
Kulolesibua 11: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
