Kulolesibua 12
12
Kitondo kia Mukikulu nu Afuana Wage nu Nzoka Nnene za Kisimana.
1Nu kakengelezio kanene kamonekileko muigulu; mukikulu avualikizibue kisongo kia busi, nu muezi kunsi kua magulu mage, nu nkumbu za bukota za nkeninkeni ikumi nu ibili gantata geitoe liage; 2nuwe abezaga neiyimi; abezaga ekulila, abeide na lubaba lua kubuta, nu kabebe kebuta, 3Nu kango kakengelezio kamonekileko muigulu: nzoka nnene za kisimana, zabezaga na matoe mutuba kamo nu mega ikumi, nu nkumbu za bukota mutuba kamo gantata ga matoe mazo. 4Nu mukila wazo wabulutile kindi kimozi kia bisatu kia nkeninkeni za muigulu, nu zazikolokezie ku kisi: nu nzoka nnene za kisimana zemene lisa na mukikulu wabezaga ukubuta, buno alie muana gamubute. 5Nuwe abutile muana wamulume, ukangata babilongo na musumbo wage wa kiuma: nu muana wage azanzuidue kuigulu ku Kalaga, nu ku kisumbi kiage kia bukota. 6Nu wozo mukikulu atinine mu kalula, muli kiziki kiamulongekide Kalaga, buno bamulisie kuko bindi kanunu kamozi nkama ibili nu makumi mutuba.
7Nu bita binene biabezaga muigulu; Mikaele nu migenzi zage beiteine na nzoka nnene za kisimana; nu nzoka nnene za kisimana nu migenzi zage beiteine nabo; 8nu tababakindile, aba nu kiziki kiabo takiamonekile lingo kukio muigulu. 9Nu nzoka nnene za kisimana zalekedue gansi, zezo nzoka za wakalazi, zikumanagua buno, Liabo u Satana, muengelezi wa kisi kinsania; zalekedue ku kisi, nu migenzi zage. 10Nu nungule kuiyuki inene muigulu, liatendile bune,
Kano kaluma lonio, nu magala, nu bukota bua Kalaga weitu, nu buangato bua Klisto wage biseli: kubuno musongezi wa mibuto zeitu ekubasongelaga ku Kalaga weitu busi nu kindi alekedue gansi. 11Nubo bamukindile ku kabamba ka mikila za Muana wa Mukoko, nu ku kabamba keidagi lia bulongeki buabo; nubo tabeidemanine. 12Bubo bogazi-bogazi, meigulu nuinyue bekuikalagamo. Kabebe ku kisi, nu ku kitatenge: kubuno Liabo u Satana agela kumuli, nu eli na bongua bunene, kubuno eizi nkungu zage zise buigi.
13Nu gamonine nzoka nnene za kisimana buno zalekelua ga kisi, zasungizie mukikulu wabutaga muana wamulume. 14Nu wozo mukikulu akasilue biupi bibili anga biupi bia ndiu nnene, buno alenge mu kalula ku kiziki kiage, kialisibagua nkiko isatu nu kindi kia nkiko buno abe bulazi na zezo nzoka. 15Nu nzoka zabasizie mazi mu kanua kazo anga luuzi, kumbusa kua wozo mukikulu, buno amukokie mu lulo luuzi. 16Nu kisi kiakasizie mukikulu, nu kisi kiasuide kanua kakio nu kianune luuzi luatukaga mu kanua ka nzoka. 17Nu nzoka nnene za kisimana zongedue wozo mukikulu, nu zendile kuitana bita na kikanga kiage kiasigede, kikuanza makakizio ma Kalaga, nu kili na bulongeki bua Yesu.
Currently Selected:
Kulolesibua 12: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
