Yuda 1
1
Mukanda wa Yuda. Yuda Ekusambizia Bakatizia.
1Yuda, mukobe wa Yesu Klisto, mubuto wa Yakobo, ku babo bamanagua, batundua mu Kalaga Isi, nu balangilue ku kabamba ka Yesu Klisto: 2Mutalikilue mponga nu bubobelelo nu lutundo.
Yuda Ekubalindia Muidagi lia Kalaga.
3Batundua bane, nabezaga nunse na komanizia nunse kumusanzila musagu wa lonio lueitu isue bansania, buansuagide buno nimusanzile nu kumuana buno muakananie mu bukatizio buakasilue basuagibua limbizi limozi tugu. 4Kubuno kuli bantu beiyingizizie mu misako za lumbisombiso, bantu basanzidue lusungio luluno wakalazi, babo batakuanza Kalaga, nu bekugalukia mponga za Kalaga weitu kukuibingia ku ntundo za butazi, nubo bekutuna Mukota weitu Yesu Klisto.
5Kano kaluma nkutunda kumukengelezia, aba ndi musezi bunsania, buno Mukota Yesu onezie bantu ku kisi kia Ezipeto, nu kusila eitile babo batakatizia. 6Nu migenzi batalangile bukota buabo, basigile biziki biabo, ababikile mu bikando bitanakuzinda mu kapilo aba nu ku busi bubo bunene bua lusungio. 7Anga bubo buabezaga Sodomo nu Gomola, nu ingo mino zabezaga buigi, bakitile butazi anga babo, bayangile lukita lubatabezaga nalo, nu babede kisusania bekubabazibua na lusungio lua keiya katanakuzinda. 8Bubo nu babo, bekulota ndozi bekubigia mubili na nsese, bekusomba kuangatua, nu kulinga bangati. 9Tondo Mikaili mugenzi munene, galuanine na Liabo, u Satana nu kuenda nage miango ku kabamba ka mubili wa Mose, ntagelekile kumusongela na bilingano, tondo amubuide bune, Mukota akuzugile. 10Tondo babo bantu bekulinga bitondo bibatakumenyinina; nu bibekumenya ku bumba, bekubiga mubio, anga nyama ziteli na menge. 11Kabebe kanene kubabo! kubuno bayangile lukita lua Kaina, nu basasizie kuyanga kuaga kua Balama buno babe na mutali, nu bazimine mu kubenga kua Kola. 12Nu babano beli anga nanda zili na bukonzi mu misanganano zeinyu za lutundo gabakulia neinyu, bekuidisia nu tabeli na boba; beli anga lutundutundu luteli na mutontelo, lukusindikua na lumpumpu; beli anga miti zoma mambizi mabili, ziteli na biguma, nu zikuyulua nunse; 13beli anga bimpumi bia kitatenge bitakubota, nu bekukita misako zabo anga meidu meli na nsese; beli anga nkeninkeni zikutingatinga, balangilue mu kapilo aba ku nkiko zitanakuzinda. 14Nu ku babo Enoke, muntu wa mutuba kamo kutukila ku Adama, alenganizie bune, Unguililazi, Mukota avule na migenzi zage zasuagibua tununu na tununu, 15buno asungie nu kubabazia babo bansania batakuanza Kalaga, ku kabamba ka misako zabo insania, zibakitaga nu kukusomba Kalaga, nu ku kabamba ka bitondo binsania bibibu biamutendaga babo bagi batakuanza Kalaga. 16Babo bekuizuzuma, nu kusomba bubo bubakuizuzuma nabo, bekuenda mu ntundo zabo (bekutenda bitondo bia kuikaka), nu bekuanza bantu buno babe na mutali.
17Tondo inyue, batundua bane, kengelazi bitondo biatendilue wakalazi na basingua ba Mukota weitu Yesu Klisto; 18kubuno ababuide bune, Ku bindi bizinda kukaba beliliki, bakendaga mu ntundo zabo zitezakuanza Kalaga. 19Ubabo bekuanzukania bango, beli anga nyama, tabeli na Muuza. 20Tondo inyue, batundua bane, idindikazi mu bukatizio bueinyu buasililila, nu segazi mu Muuza Wasililila, 21idangazi mu lutundo lua Kalaga, nu kulindila kiombo kia Mukota weitu Yesu Klisto, aba ku kalamo katanakuzinda. 22Kuilazi bamozi kiombo, babo beli na kangonongono; 23nu oniazi bango buno mubatikie mu keiya; nu kuilazi bango kiombo mu boba; nu kusomba nsulu zili na matondoki ma bumba bua buagi.
24Nu ku wozo ukuvuama kumulanga buno tamuikuke, nu kumuimania ku lutanuno luage geteli itondoki mu mbogimbogi nunse, 25ku Kalaga umozi tugu Monia weitu, mu Yesu Klisto Mukota weitu; lutanuno lueli nalo, nu bunene, nu buangato, nu magala, kutukila wakalazi, aba nu kano kaluma, aba ku nkiko zitanakuzinda. Amena.
Currently Selected:
Yuda 1: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
