Kulolesibua 1
1
Kulolesibua kua Yesu Klisto ku Yoana.
1Kulolesibua kua Yesu Klisto, kuakasilue na Kalaga buno alolesie bakobe bage, bitondo biasasie kuba: nu abisingile na mugenzi kulolesia ku mukobe wage Yoana; 2we alongekede idagi lia Kalaga, nu bulongeki bua Yesu Klisto, nu bitondo binsania biamonineko. 3Mbogimbogi ku wozo ukusomaga, nu ku babo bekungua malagi ma bulengania bubuno, nu kuanza bitondo bibino biasanziluemo: kubuno nkungu zise buigi.
4Yoana ku maekelezia mutuba kamo meli ku Asia: Mponga kumuli nu bubobelelo bikutukaga ku wozo uliko nu wabezagako nu ukavua; nu bikutukaga ku Miuza mutuba kamo zili lisa na kisumbi kia bukota buage; 5nu bikutukaga ku Yesu Klisto, mulongeki uli mukatizia, alingile kutuka ku bakuzi, nu muangati wa bakota ba kisi. We ukututundaga, nu atuengezie ku misako zeitu za buagi na mikila zage; 6nu atubikide bukota bua basankoga ba Kalaga Isi; kueli kuli lutanuno nu magala aba nu nkiko na nkiko zitanakuzinda. Amena. 7Unguililazi, we akavua na bimpa; nu liso na liso likamumonako, nu babo bamusumitile; nu baBilongo bansania bia kisi bakamulilila. Bubo. Amena.
8Mukota Kalaga atendile bune, Nne nili Alfa nu Omega, uliko nu wabezagako nu ukavua, uli na Magala Mansania.
Anga Buamonine ku Y oana ku Kalolesio Kakano.
9Nne Yoana, mubuto weinyu nu muneinyu mu nsungio nu mu bukota nu mu nkiki zili mu Yesu, nabezaga ga kisanga kiamanagua Patemo, ku kabamba keidagi lia Kalaga nu ku bulongeki bua Yesu. 10Nabezaga mu Muuza Wasililila ku busi bua Mukota, nungule kuiyuki inene kumbusa kuane anga monze, 11liatendile bune, Ku kitondo kiukumonako, kisanze mu mukanda nu kisinge ku maekelezia mutuba kamo: ku Efeso, nu ku Semuna, nu ku Pegamo, nu ku Tuatila, nu ku Sadi, nu ku Filadelefia, nu ku Laodikia. 12Nu nakebetukile kulola iyuki linunguaga kulio. Nu ganakebetukile namonine ku bianikilo bia tusuku mutuba kamo bia olo; 13nu munkatini mua bianikilo bia tusuku namonine ku muntu asusania anga muana wa bantu, avuala nsulu ndazi zika ku tusindilo, nu zatendekua na mukoma wa olo ku bukuba buage. 14Nu itoe nu nzuili zage zabezaga zenga anga mioza zenga za mikoko, anga lubula; nu meiso mage mabezaga anga ngulumina za keiya; 15nu masindi mage mabezaga anga nsubi zakisimana, anga zikutuka mu keiya; nu iyuki liage liabezaga anga kela ka mazi meingi. 16Nu abezaga na nkeninkeni mutuba kamo ku kuboko kuage kua seidume, nu mu kanua kage muatukile bupanga bukusesaga ku ntungo ibili: nu malanga mage masanaga anga bukusanaga kisongo kia busi mu magala makio. 17Nu ganamumonineko, nawede bukukumania ku magulu mage anga muntu wakua. Nu antalikile kuboko kuage kua seidume, nu atendile bune, Ntunakua boba; nne umutangi nu muzinda, 18nu wozo Mulami; nabezaga nakua, nu nili na kalamo ku nkiko na nkiko zitanakuzinda, nu nili na mitandulua za lukuo nu za biziki bia bakuzi (Hadese). 19Bubo sanza bitondo biwamonineko, nu bitondo biliko, nu bitondo bikaba kusila kua bibio; 20nu buisulilua bua zezo nkeninkeni mutuba kamo ziwamonineko ku kuboko kuane kua seidume, nu bianikilo bia olo bia tusuku mutuba kamo. Nkeninkeni mutuba kamo zili migenzi za maekelezia mutuba kamo; nu bianikilo bia tusuku mutuba kamo bili maekelezia mutuba kamo.
Currently Selected:
Kulolesibua 1: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
