Yakobo 2
2
Bantu ba Klisto Tababe na Bulundulundu.
1Mibuto zane, bukatizio bumuli nabo mu Yesu Klisto, Mukota weitu wa lutanuno, tabube ku kukutia bantu. 2Kububuno ndi muntu eli na mpete za olo, nu nsulu nsoga, eingila mu numba za musanganano weinyu; nu ndi muzambi nuwe eingila nu eli na nsulu mbi; 3nu ndi muanza wozo uli na nsulu nsoga, nu kumubula buno, Uwe ikala gano ga kiziki kisoga; nu kubula wozo muzambi buno Uwe emana gago, aba ikala gansi; 4ndi nti tamukulundulana, nu ndi nti tamuli ngatu zili na makengelo mabi? 5Unguililazi, mibuto zane batundua; ndi Kalaga ntasombuede bazambi ba kisi buno babe neiguma mu bukatizio, nu bapieni ba bukota buabikide babo bekumutundaga? 6Tondo muabengile bazambi. Nu ndi bagumi nubo tabamubengile, nu kumubuluta ku bisumbi bia lusungio? 7Ndi tabakulinga izina lilio isoga limukumanua mulio? 8Tondo ndi mukuzindilizia mulembe wa bukota, anga buasanzilue buno, tunda mibuto zobe ange buwitunda uwenyene, nti muakita busoga: 9tondo ndi mukukutia bantu, nti mukuaga, nu kusungibua na mulembe anga bekugukagula. 10Kububuno ndi muntu anza mulembe unsania, nu ndi aga muikakizio limozi, nti aga mu mansania. 11Kubuno we atendile bune, Ntuite meiga, atendile lingo bune, Ntuite muntu. Umpanga ndi ntuita meiga, tondo wita muntu, nti wakagula mulembe. 12Tendazi, nu kitazi, anga bantu bakasungibua ku mulembe wa bukandulua. 13Kubuno lusungio taluli na kiombo ku wozo uteli na kiombo; nu kiombo kikukinda lusungio.
Kukatizia nu Kukita.
14Mutali mukizi, mibuto zane, ndi muntu ekutenda buno eli na bukatizio, nuwe nteli na misako misoga? Ndi bubo bukatizio bunamonia? 15Ndi mubuto weitu umozi, wamulume aba mukikulu, eli buasi nu nteli neidia busi na busi, 16nu ndi muntu umozi wa kumuli abatenda buno, Endazi busoga, mungue keiya, nu kuikuta; tondo ndi ntabakasa bibakuiyanina bia mubili; nti uli mutali mukizi? 17Nu bubo ububo ndi bukatizio tabuli na misako misoga, kasi nti buakua. 18Tondo muntu anatenda buno, Uwe uli na bukatizio, nunne nili na misako misoga; undolesie bukatizio buobe kuteli misako misoga zobe, nunne nakulolesie bukatizio buane ku misako misoga zane. 19Uwe ukukatizia buno, Kalaga eli umozi; nti ukukita busoga: nu basumbu nubo bekukatizagia bubo, nu bekugiliminaga. 20Tondo, uwe muntu utakulangua, ndi ntukutunda nuwe kumenya buno bubo ubuli bukatizio ndi tabuli na misako misoga nti buakua? 21Ndi tateisue Abalahama ntabingizibue ku misako misoga, ububo akasene muana wage Isaka ku kayulo? 22Ntukumona, bukatizio buamonekileko mu misako misoga zage, nu bukatizio bubo buasililide ku misako misoga zage; 23nu masanzo mamo mazindilide matendagua buno, Abalahama akatizizie Kalaga, nu atekuidue buno eisanana; #Yesaya 41:8; Genese 15:6. nuwe amaninue buno, muida wa Kalaga. 24Tamukumona, ku misako za muntu ekubingibua ta ku bukatizio kankanka. 25Anga wozo Laba wabezaga kitazi ndi ntabingizibue na misako misoga gasekede batitiki, nu abanine kuingo nzila? 26Ububo ndi mubili taguli na muuza nti wakua, nu bubo ubuli bukatizio buteli na misako misoga nti buakua.
Currently Selected:
Yakobo 2: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
