Baebelo 7
7
Yesu eli Sankoga Munene Anga Melekezedeke.
1Kubuno wozo Melekezedeke, Mukota wa Salema, sankoga wa Kalaga uli Munene, wakulumene na Abalahama gatukaga kuakindaga bakota, amukitide mponga, 2nu Abalahama amukasile kindi kikumi kia binsania; (abezaga Mukota wa kuisanana ubuisulilua buizina liage, nu Mukota wa Salema, buisulilua bualio, u Mukota wa bubobelelo; 3nteli neisi, nteli na nina, nteli na kibuti, bindi biage tabinakulinga, nu kalamo kage takanakuzinda; tondo asusananizibue na Muana wa Kalaga), ekubezaga sankoga kankanka.
4Kengelazi buabezaga muntu wono munene, nu Abalahama, tatanguluisue, amukasile kindi kikumi kia bikagi bianyagile ku bita. 5Nu ku babo bana ba Lewi ubakasagua busankoga bakakizizibue ku mulembe buno bakasue kindi kikumi na bantu, u mibuto zabo, tondo babezaga kikanga kia Abalahama: 6tondo we utabezaga wa kikanga kiabo akasilue kindi kikumi na Abalahama, nu akitide wozo uli na lilio idagano mponga. 7Tondo takuli unakania nunse, mukeke ekukitua mponga na munene. 8Nu gano bantu bekukuaga bekukasagua kindi kikumi; tondo kuko kuli wozo ukusambala buno eli na kalamo, 9nu, tunatenda buno, Lewi ukukasagua kindi kikumi, akaseine kindi kikumi mu Abalahama; 10kubuno isi abezaga ntemubuta, gakulumene na Melekezedeke.
Yesu Atinga baLewi.
11Umpanga ndi kusililila kuabezaga ku busankoga bua Lewi (kubuno kubo bantu bakasilue mulembe), buni lingo buneiyaninua ungo ku busankoga ku lukita lua Melekezedeke, nu kutamanua ku lukita lua Alona? 12Kubuno ndi busankoga buagalukibua, kasi mulembe nugo nti wagalukibua. 13Kubuno we wasambedue bubo abezaga muntu wa kingo kilongo, tondo takuli muntu umozi wa kikino kilongo wakitaga ku kayulo, 14Kubuno buligo buno Mukota weitu atukile mu Yuda; kilongo kitatekuidue na Mose ku kitondo kia busankoga. 15Nu bubo butukutenda bukumenyua nunse, buno ndi kuamoneka ungo sankoga ku lukita lua Melekezedeke, 16wabikilue, ta ku mulembe wikakizio lia mubili, tondo ku magala ma kalamo katanakuzinda. 17Kubuno ubualongekedue bune,
Uwe uli sankoga utanakuzinda,
Anga lukita lua Melekezedeke.#Luimbo 110:4.
18Kubuno kuli kutikibua kua lilio ikakizio itangi ku kabamba ka mutambo walio nu kutasuaga kualio 19(kubuno mulembe wozo tawasililizizie kena), tondo kulusia kilemanizio kisoga nunse, mu kikio tuakunda ku Kalaga. 20Nu bubo tabuabede gatalumbidue 21(kubuno babo babikilue basankoga geteli kilumbilo; tondo wono alumbidue na wozo wamubuide,
Mukota alumbide aba ntakeibezia,
Uwe uli sankoga utanakuzinda);
22umpanga ku kitondo kikino Yesu abede muima weidagano isoga nunse. 23Nu babo babikilue basankoga beingi, kubuno bakuaga: 24tondo kubuno we ekuikalaga nkiko na nkiko, eli na busankoga butekugaluka. 25Nu ku bubuno we ekuvuama konia nunse babo bekukunda ku Kalaga mueli, kubuno ekulamaga bindi binsania buno abasegele.
26Kubuno buatutananine buno tube na sankoga munene anga wono, wasililila, uteli na bubi, uteli neitondoki, walekanukizibue na bagi, asakamizibue kutinga meigulu; 27nteikitide kisansa anga buikitilaga babo bango basankoga banene busi na busi, alingaga kuikitila kisansa ku misako zage za buagi buage wenyene, nu kungua asila kuikitila wenyene, nti akitila misako za buagi za bango bantu; tondo we akitile bubo tugu limbizi limozi, geikaseine wenyene. 28Kubuno mulembe ukubikaga bantu batamba buno babe basankoga banene, tondo kulumbila kuabede, nti mulembe useli, nu kuabikile Muana wasililila ku nkiko na nkiko.
Currently Selected:
Baebelo 7: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
