II Timoteo 2
2
Babo Bekukita Busoga Bekubogiabogia Kalaga.
1Umpanga, uwe muana wane, ba na magala mu mponga zili mu Klisto Yesu. 2Nu binsania biwigile kundi ku balongeki beingi, igisiabio ku bantu bakatizia, bakavuama kuigisia bango. 3Babazibua anga bunkubabazibua, anga mukoloboyo musoga wa Klisto Yesu. 4Takuli mukoloboyo ukuitana bita ukuibika mu bitondo bia kisi; buno atananizie wozo wamusanzile buno abe mukoloboyo. 5Aba muntu ndi ekuenda kantangoa, ntanakasua nkumbu, kungua ntatanga munyage. 6Wozo ukulima atunganana kulinga kulia ku biakulima. 7Kengela bubuno bunkutenda, kubuno Mukota akukase bumenyinino mu binsania. 8Kengela buno Yesu Klisto, wa kikanga kia Davidi, ayukile ku bakuzi anga bukutenda musagu musoga wane: 9mugo umunkubabazibua nu kukandua, anga muagi; tondo idagi lia Kalaga talikukandua. 10Kubuno nikuikalila binsania ku kabamba ka basombolua, buno nubo babe na lonio luli mu Klisto Yesu nu na lutanuno lutanakuzinda. 11Uli musagu watananina kukatizibua: kubuno ndi tuakule gamozi nage, nti tukalamaga gamozi nage: 12ndi tuikalila, nti tukangata gamozi nage: ndi tuamutuna, nuwe nti akatutuna: 13ndi tatuli bakatizia, we nti eli mukatizia; kubuno ntanavuama kuituna wenyene.
BaKlisto Tabende Miango.
14Bakengelezie bibino binsania, nu kubana ku Kalaga, tamuakananie ku bitondo bitakulungana, nu bikubigia babo bakungua kubio. 15Ikokomezie buno watananizia Kalaga, mukiti wa mulimo utekukua na nsoni, ukuigisia buisanana idagi lia bulili. 16Tondo ibembukie na bitondo bitasuaga: kubuno bitondo bibino bikugalukia bantu buno tabanze Kalaga, 17nu kutenda kuabo kuabe anga kiulu kinene kikuenda kiagagana mubili unsania: bamozi kubo u babano Umenayo nu Felito; 18babano basigile bulili ku kutenda buno, iyukilo liabede kalazi, nu bagalukizie bukatizio bua bantu bamozi. 19Tondo kibanza kia Kalaga kili kibibu, nu kiemana, nu beli na kamenyikilo kakano, Mukota eizi beli bage: nu muntu unsania ukutekula izina lia Mukota, asige buteisanana. 20Tondo mu numba nnene tamuli nyungu za olo nu za feza tugu, tondo nu za miti nu zibumba; imozi za luanzo, nu ingo tazaluanzo. 21Umpanga ndi muntu eiyengia nu kuidekanukia na bibino, nti akaba nyungu za luanzo, zasuagibua, zatananina Mukota, zalongekua ku mulimo na mulimo uli musoga. 22Tondo siga ntundo za buana buto; nu uyange kuisanana, nu bukatizio, nu lutundo, nu bubobelelo, gamozi na babo bekusega ku Mukota na mitima misoga. 23Tondo somba mbuzio za bukongolo nu ziteli za menge, kubuno zikulusia nsake. 24Nu mukobe wa Mukota ntakulungana kusaka, tondo abe wola ku bantu bansania, ukuvuama kuigisia, nu na nkiki, 25ane babo bekumuenzia, buno embe Kalaga abagalukie, buno beiyanie aba nu kumenyinina buligo, 26bubo babe na bumenyinino bua kutuka muitega lia Satana, nubo bakandilue nu kulutua nage nu kuyanga lutundo luage.
Currently Selected:
II Timoteo 2: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
