2 Petelo 2
2
Petelo Ekubakengelezia Buno Kuli Balengania ba Buza.
1Tondo kuabezaga balengania ba buza ku babo bantu, anga bubo nuinyue kukaba basozi ba buza, bakamuigisia meigisia ma buza, makuzimizia, nu bakatuna Mukota wabakuluide, bakeidusizia kubiga kitangala besi. 2Nu beingi bakayanga misako za butazi buabo; ku kabamba kabo bulili bukelilikua. 3Nu mu ntundo mbi bakeimonena mutali kumuli ku kutenda kua buengelezi; nu lusungio luabo talunakuizizia, aba kubiga kuabo kukusasia kumonekako. 4Kubuno ndi Kalaga ntasigilide migenzi zagile, tondo abeisile mu kiundundu, ababikile mu kikando kia kapilo, balangue aba nu gabakasungibua; 5nu ntasigilide kisi kia wakalazi, tondo onezie Noa, musambazi wa buisanana nu bango bantu mutuba kamo, nu kuabezaga muzumbi nu mazi magagene ku kisi kinsania kia batanzaga: 6nu asungizie mino za Sodomo nu Gomola, azigalukizie luito, azibikile kalolesio ku bantu batakuanzaga Kalaga; 7nu onezie Loto wabezaga weisanana, abezaga nunse na kabebe ku misako zitasuaga za bantu babi 8(kubuno muntu wono wisanana eikalaga nabo kuko ku kumona nu kungua, asungizie kuisanana kuage wenyene busi na busi ku nkita zabo zitakulungana na mulembe): 9Mukota eizi konia basuagibua ku malindiko, nu kubika bateisanana ku lubabazio aba nu ku busi bua lusungio; 10tondo aba babo bekuyanga bumba bua buagi mu ntundo za nsese, nu kubenga buangato. Batakukua boba, bekukita bubekutunda, tabekugilimina bekulinga bangati: 11aba nu migenzi beli na magala mabibu nunse, tabakubabingaga ku Mukota. 12Tondo babano beli anga beteli na menge, beli anga nyama mu lukita lua kukatua na kuitua, nu kulingana ku bitondo bibatekumenyinina, kukubiga kuabo bakabigibua nunse, 13bakasungibua ku misako zabo zitakulungana; bekutunda kukatua na maku mu musi, tubalibango nu mikolu, nu kuyangaga lutundo lua bisagulo bia kielamo, nu kukitaga bisagulo neinyu; 14bekulengula meiso na butazi, bantu batakumenkela kuaga; nu kulubikania bantu beteli na magala; beli na mitima za kutonia; basuilidue; 15basigile nzila zabezaga zisa, nu bazimine, nu bayangile lukita lua Balama muana wa Bola, atundaga mutali wa makitilo mabi; 16tondo azugidue ku buagi buage; mpunda zitatendaga zise zamutendela kuiyuki lia muntu, zananizie busile bua mulengania.#Manganzo 22:21-31. 17Babo beli anga tunuabalongo tuakama, nu lutundutundu lukuekua na lumpumpu; babikua milanga ku muizi. 18Kubuno nti bekutenda bitondo binene ku nguza, ku lutundo lua bumba bua buagi, nu lua butazi, nu kubuluta babo bekutina babo bekulama mu buengelezi; 19bekutenda buno bakandulua, nu bobenyene beli bakobe ba kubiga; kubuno ndi muntu akindua na muntu, nti ese mukobe wa wozo muntu. 20Kubuno babo basilile kutina nsese za kisi nu kumenya Mukota, Monia Yesu Klisto, nu ndi bakindua lingo, lukita luabo luzinda nti luatinga lulo lutangi. 21Tondo bunabeide neibineibi songo tabamenyine nzila zeisanana, nu kumenya kuko kukakizia kuasililila kubakakizizibue nu kukusiga. 22Tondo buababelede anga musumo wa bulili, Mboa zikusubia lingo ku bisazi bizasalaga, nu ngulube zogibua kusubia lingo ku bisogo.
Currently Selected:
2 Petelo 2: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
