II Bakolinto 8
8
BaEkelezia ba mu Makedonia Bakungikile Biabo Bingi Bia Kukasia Basambi ba mu Yelusalema.
1Nu, mibuto zeitu, tukumulolesia musagu wa mponga za Kalaga zakitilue ku maekelezia ma ku Makedonia; 2kubuno balindikilue na malindiko meingi, tondo mbogimbogi zabo ningi nu buzambi buabo buitide mu bugumi bua kutalikila kuabo. 3Kubuno nkubalongekela, ku kuvuama kuabo, nu kuitila kuabo, bakasene biabo ku lutundo luabo bobenyene, 4batusengezizie nunse nu kutukakizia ku misagu za lukaso luluno, buno bagomie nabo bakukitila basuagibua: 5bakitile bubuno, tanga butualemaninaga, tondo balingile kuikasana bobenyene ku Mukota, nu kutuli mu kusombola kua Kalaga. 6Aba tuasengezizie Tito, amuzindilizizie lukaso luluno anga bulualingile. 7Umpanga anga bumukuitila mu binsania, ku bukatizio, nu ku kutenda, nu ku menge, nu ku lutundo lunene nunse, nu lutundo lueinyu kutuli, buno muitile bubo mu mponga zeno nunse. 8Nsikumukakizia, tondo ku lutundo lunene lua bango bantu nigeleke lutundo lueinyu. 9Kubuno mukumenya mponga za Mukota weitu Yesu Klisto, buno abezaga mugumi, tondo abede muzambi ku kabamba keinyu, buno mugume ku buzambi buage. 10Nunne nkumukengelezia kitondo kikino: kubuno kitondo kikino kili kisoga kumuli, kubuno muse muakukia muaka umozi, ta ku kukita tugu, tondo kukutunda. 11Tondo kano kaluma musililizie kuko kukita; buno anga bubo bumuatundile kukita, bubo ububo mube kayikayika ku kusililizia na bibio bimuli nabio. 12Kubuno ndi mutima ukutunda, nti uli anga ukukasana bibio biguli nabio, ta bibio biguteli nabio. 13Kubuno nsikutenda bubuno, buno bango babogeboge nuinyue mube na tubebe; 14tondo bunsania bulingimane; mu zeno nkungu kasiazi banenyu na beinyu, nu banenyu bamukasie na biabo; nu binsania bialingimane: 15anga buasanzilue bune,
We wakungikile bingi nteitide,
Nuwe wakungikile bikeke ntiyanine. #Ekesode 16:18.
Mulimo wa Tito na Basingilue Nabo.
16Tondo Kalaga asimue, wabikile lutundo mu mutima wa Tito lua kumenya bitondo bieinyu. 17Kubuno eitabizizie anga butuamubulaga; nu abede nunse na nkaso, nu endile kueinyu anga buatundaga. 18Nu tuamusingile na mubuto weitu wozo uluganuno luage luakukile mu maekelezia mansania; 19nu ta bubo tugu, tondo u wozo wasombuedue na maekelezia ende gamozi neisue mu kitondo kia lukaso luluno lutukukitila ku lutanuno lua Kalaga nu kutananizia mitima zeitu: 20tuibembukie na kitondo kikino, muntu anavua kutubinga mu musagu wa lukaso luno lutukukitila: 21tulingazi kukengela busoga, ta ku Mukota tugu, tondo aba nu ku bantu. 22Nuisue tuasingile mubuto weitu nabo utuakitaga nabo mulimo bindi bingi nu abezaga na komanizia, nu kano kaluma eli na komanizia nunse, kubuno eli na kilemanizio kinene kumuli. 23Umpanga ndi muntu ekutunda kumenya misako za Tito, nti nagomia nage, nu nti ekukitaga mulimo nanne kumuli; aba ndi ku misako za mibuto zeitu, nti beli basingua ba maekelezia, nu beli lutanuno lua Klisto. 24Umpanga lolesiazi babano ku maekelezia kakengelezio ka lutundo lueinyu, nu bubuno ubutukuika kumuli.
Currently Selected:
II Bakolinto 8: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
