II Bakolinto 4
4
Paolo Ntekutunda Kusiga Mulimo Wamukasile Kalaga: Kalaga Akamubogiabogia.
1Ku bubuno ku kuba tuli na mulimo wono, anga butuakasilue, tatukutamba; 2tondo tuasombile bitondo bia nsoni biabisilue, aba tatuende mu bumanua, aba kusambika idagi lia Kalaga na buengelezi; tondo ku kulolesia kua bulili nu kulumbibua na bantu bansania buno tuli bakiti ba Kalaga. 3Tondo ndi musagu musoga weitu tagukumenyua, nti tagukumenyua na babo bakuziminaga: 4mubo kalaga ka kisi kikino kazibile bumenyinino bua babo batakatizia, bubatanamona kiengi kia musagu musoga wa lutanuno lua Klisto, uli kisusania kia Kalaga, buno takisane kubeli. 5Kubuno tatukusambala musagu weitu, tondo musagu wa Klisto Yesu, Mukota, nuisue benyene tuli bakiti beinyu ku kabamba ka Yesu. 6Kubuno Kalaga atendile bune, Kiengi kikasana mu kapilo, u wozo wasanine mu mitima zeitu, atukase kiengi kia menge ma lutanuno lua Kalaga ku meiso ma Yesu Klisto.
Magala ma Paolo Matukile ku Kalaga.
7Tondo, tuli neisuku lilino mu mibili za bilongo, buno magala mamano makutukaga ku Kalaga, tondo tameli meitu; 8tukubabazibua ntungo insania, tondo tatukongoa; tuli na tungonongono, tondo tatukutambia kilemanizio; 9tukubengua, tondo tatukusigua; tukulibulagua gansi, tondo tatukulekanaga; 10bindi binsania tukulondua kuitua, anga bualondagua kuitua Yesu; bubo kalamo ka Yesu keitile mu mibili zeitu. 11Kubuno isue bekulama bindi binsania tukulondua kuitua ku kabamba ka Yesu, buno kalamo ka Yesu keitile mu mibili zeitu za kukua. 12Tondo isue tukukuaga, tondo inyue mukulamaga. 13Tondo ku kuba tuli na mutima wa bukatizio, anga buasanzilue bune, Nakatizizie, ukinsa natendile; nuisue tukukatizia nunse, ukinsa tukutenda; #Luimbo 116:10. 14tuizi buno anga bubo buayukizie Mukota Yesu akatuyukia nuisue, inyue nuisue akatuimika kuage. 15Kubuno binsania bili bienyu, buno mponga zeno zitile nunse ku babano beli beingi, zitile ku lutanuno lua Kalaga.
Bantu ba Kalaga Tabatine Lukuo.
16Ku bubuno tatukutamba; tondo ndi mubili weitu ukubigaga, tondo nti muntu weitu wa munda eli muto busi na busi. 17Kubuno tubebe tueitu tuli tua nkungu emozi tugu, tukututanuzia lutanuno lutanakuzinda nunse; 18tatukengele bitukumonako, tondo bitutakumonako; kubuno bikumonekako bili bia nkungu emozi tugu; tondo bibio bitakumonekako ubitanakuzinda.
Currently Selected:
II Bakolinto 4: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
