II Bakolinto 11
11
Paolo Ekubakua Lugi Anga Bukutunda Kalaga.
1Buabezaga busoga songo munikalila bukongolo buane; tondo munikalile. 2Kubuno nkubakuila lugi lua Kalaga: kubuno namusongezie ku wamulume umozi, buno nilusizie Klisto kikumi kiasuaga. 3Tondo nkukua boba, buno ku nzila imozi, anga nzoka buzengelede Eva mu buenge buazo, zinabigia makengelo meinyu munasiga luanzo lua mutima umozi luli mu Yesu. 4Kubuno ndi ungo avua nu kusambala ungo musagu wa Yesu, ututasambede, aba ndi mukukasua ungo muuza, umutakasilue, aba ungo musagu musoga, umutitabizizie, nti muabeikalila busoga. 5Kubuno nkukengela buno, nsidile kena ku bibeli nabio babo basingua banene. 6Tondo ndi nsizi kutenda, luluno ta lukita luane nu menge; tondo mu bitondo binsania tuamuloleseziebio. 7Ndi nagile ku kuibotia buno inyue mubakamibue, kubuno namusambalide musagu musoga wa Kalaga geteli mutali? 8Nanyagile mango maekelezia ma Kalaga bikulo biabo, nibitole bibe biane, buno nikitile inyue; 9nu ganabezaga neinyue nu neiyaninaga, nsiakutizie muntu umozi; kubuno mibuto zane, batukile ku Makedonia, bankasile anga buniyaninaga; nu mu bitondo binsania nidangile buno nsimukutie nunse, nu bubo bunidange. 10Anga bubo buli bulili bua Klisto mundi, takuli muntu unankanda kanua ku kuikaka kukuno mu miaga za Akaya. 11Ku kitondo kikizi P Kubuno nsikumutunda? Kalaga eizi. 12Tondo bubo bunkukita nabukite, buno nibakinde babo bekulonda mulondo; buno tabamone mulondo mu kitondo kikio kibakuikaka nakio babe anga butuli. 13Kubuno babano beli basingua ba buza, bekukita mulimo ku buenge, bekuigalukia buno basusanie basingua ba Klisto. 14Aba tabuli buakuangama nabo; kubuno Satana wenyene ekuigalukagia buno asusanie mugenzi wa kiengi. 15Umpanga tabunangamia ndi bakiti bage begalukia kususania bakiti ba kuisanana; tondo kuzinda kuabo kukaba bumozi na milimo zabo.
Paolo Ekubamenesia Kitondo Kieganuine Nakio.
16Nkutenda lingo, muntu ntakengele buno nili kikongolo; tondo ndi mukunkengela bubo, nitabiziazi, buno nunne nikake tanga. 17Kikio kinkutenda nsikukitenda kuikakizio lia Mukota, tondo anga ku bukongolo, mu kilemanizio kikino kia kuikaka. 18Ku kuba beingi bekuikaka ku lukita lua mubili, nunne nikake. 19Inyue beli na menge mukutundaga kubogaboga na bikongolo, 20Kubuno mukubuzigaga, ndi muntu ekumubika ku bukobe, ndi ekumuzambia, ndi ekumunyaga, ndi ekuikaka, ndi ekumulibula ku meiso. 21Nili na nsoni kutenda bubo, anga buno isue tuabezaga tuatamba, Tondo ndi muntu ekuikaka ku kitondo kinsania (nkutenda anga kikongolo), nunne nkuikaka. 22Ndi babo beli baEbele? Nunne nti nili muEbele. Ndi babo beli baIsalele? Nunne nti nili mu Isalele, Ndi babo beli kikanga kia Abalahama? Nunne nti nili wa kikanga kia Abalahama. 23Ndi babo beli bakiti ba Klisto? (nkutenda anga musile), embe nne nkuitila nunse ku milimo, ku kulibulua bubibu; ku bikando nunse, ku lukuo mambizi meingi. 24Ku baYuda mambizi matano nasusuidue tususula makumi manazi, kutikia ku kamozi. 25Mambizi masatu nalibuidue na tususula, limbizi limozi nalibuidue na makozi, mambizi masatu nangukidue na buato bua mu luzi, musi nu kindi nikalaga muiziba lia kitatenge; 26ku ngendo mambizi meingi, ku biziki bibibu bia nuzi, mu biziki bibibu bia beibi, mu biziki bibibu bia bantu ba kueitu, mu biziki bia baBilongo, mu biziki bibibu bia mino minene, mu biziki bibibu bia kalula, mu biziki bibibu bia kitatenge, mu biziki bibibu bia mibuto za buza; 27ku milimo nu mu kukutua, ku kukeisia ntende kindi kinsania mambizi meingi, mu nzala nu mpusia, kukutalia idia mambizi meingi, mu mpego nu mundulu. 28Nu gamozi na bitondo bibino, bibio bikunvuilaga busi na busi, ubibino kulanga maekelezia mansania ma Kalaga. 29Nazi watamba, nunne nsiatamba? Nazi ukukikitanibua, nunne nsikongoa? 30Ndi natananina kuikaka, nti nikake ku mutambo wane. 31Kalaga, Isi wa Mukota weitu Yesu, ukuganunagua kuganunua kutenakuzinda eizi buno nsikueka buza. 32Ku Dameseke, muangati wa Mukota Aleta, abikile bakoloboyo kukika muino wa Dameseke, atundaga kunkata: 33nu bangezezie mu luzi geitengu mu kitutu nu bubo nasogonyokile mu maboko mage.
Currently Selected:
II Bakolinto 11: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
