1 Petelo 3
3
Bamulume nu Bakikulu Babo.
1Bubo, nuinyue bakikulu, anzazi beiba beinyu; kubuno, ndi bamozi tabekuanza idagi babo banalutua kutekuidagi na misako za bakikulu babo; 2gabamone ku misako zeinyu misoga nu luanzo. 3Malebo meinyu, tamabe ma gantata, anga kusuika nzuili; nu kukuivualikia bia malebo bia olo, nu kuvuala nsulu; 4tondo mabe mu kalamo keinyu katakumonekako mu malebo matanakubiga; u mutima wola nu bubobelelo, buli bukunza bubibu ku Kalaga. 5Kubuno bubo ubualebaga bakikulu basuagibua ba wakalazi, balemaninaga Kalaga, nu kuanza beiba babo: 6anga buno Sela anzaga Abalahama, amumanine buno mukota: nuinyue muabe bana bage ba bulili, ndi mukukita busoga, aba kukuitibua na boba.
7Bubo nuinyue beiba babo, ikalazi na bakikulu beinyu ku menge, nu anzazi bakikulu beinyu, kubuno tabeli babibu, nu beli bapieni neinyue ba mponga za kalamo; nu bubo masego meinyu tamabiganue.
Bekusungibua ku Kukita Bitondo Bisoga Beli na Mbogimbogi.
8Umpanga, mube na makengelo mamozi, kuilanazi kiombo, tundanazi anga babutua, mube na mponga nu mole: 9tamusubie bubi ku bungo, nu kilingano ku kingo, tondo kitazi mponga; kubuno ubumuamaninue, buno mupiene busoga. 10Kubuno,
Wozo ukutunda kulama,
Nu kumona ku bindi bisoga,
Azugile lulami luage talutende bubi,
Nu kanua kage takengelele;
11Nu asige bubi, nu akite busoga;
Alonde bubobelelo, abuyange nunse.
12Kubuno meiso ma Mukota meli ku beisanana,
Nu matuzi mage makunguaga masego mabo;
Tondo malanga ma Mukota tameli ku bakiti ba bubi.#Luimbo 34:12-16.
13Nu nazi ukamukita bubi, ndi muli bakiti ba busoga? 14Tondo ndi mukusungibua ku kabamba ka kuisanana, nti muabogaboga; nu tamukue babo bekumuitia boba, aba tamuzangezange; 15tondo muganune Klisto, buno eli Mukota mu mitima zeinyu; mube kayikayika bindi binsania kuakula ku muntu na muntu ukumubuzia musagu wa kilemanizio kimuli nakio, tondo kukubota, nu boba: 16mube na kalenganio kasoga, bubo ku kitondo kikio kimukukandikua, babe na nsoni, babo bekunyega bumukukita mu Klisto. 17Kubuno buli busoga nunse kusungibua ku kukita busoga, ndi ukusombola kua Kalaga, kuteli ku kukita bubi. 18Kubuno Klisto nuwe asungizibue limbizi limozi tugu ku kabamba ka buagi, wono wisanana, ku kabamba ka bateisanana, buno atulusie ku Kalaga; mubili wage weitilue, tondo wozo wenyene alamizibue na Muuza; 19kububo endile kuigisia ku miuza zabezaga mu kikando, 20asambalide bantu batanzaga wakalazi kusigilila kua Kalaga kua lindilaga busi bua Noa; gangagua buato, mubo tamuabezaga bantu beingi, babo bantu kinana, ubonine na mazi: 21mazi mamo mabezaga kalolesio ka bubatizio bukumonia mu bindi bibino; tabukutikagia nsese za bumba bua buagi; tondo kuakula kua kalenganio kasoga ku Kalaga, ku kuyuka kuage Yesu Klisto; 22nuwe eli ku kuboko kua seidume kua Kalaga, eyendide muigulu, migenzi nu buangato, nu magala abiangatile.
Currently Selected:
1 Petelo 3: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
